¹ Mijanjigna zao, nareo olo iaby; magnoriragna sofy, nareo olony gny tany iaby, ² ndra ambany ndra ambony, ndra manan-kanagna ndra mijaly misondry. ³ Gny vavako hivola fahendrea ndraiky gny fametsivetseany gny foko hivola fahazavan-tsay. ⁴ Hagnorira sofy amin-gny fagnohara zaho; hanomboky gny fagnoharako amin-gny valiha zaho. ⁵ Nagnino zaho ro tokony havaka gnany reo andro raty, laha magnodidy gnahy amin-gny lelan-tomboky gny heloky? ⁶ Nagnino zaho ro tokony havaka gnany reo ze mitoky amin-gny hanagna ndraiky mirehareha amin-gny habavatan-kanagnany? ⁷ Azo antoky vatany fa tsy misy afaky ahalomba gny halahiny ndra hagnomea takalo an-Dranagnahary ho gn'azy, , ⁸ fa gny fagnavota gnanay la lafo, ndraiky tsy misy afaky handra ze tokony havahintsika. ⁹ Tsy misy afaky mivolo zisiky amparany zay ka tsy ho simba gny nofotsiny. ¹⁰ Fa ahajery fahasimba ie. Gny reo olo hendry ho maty; gny adala ndraiky gny maherisetra samby ho rava ndraiky hagnenga gny hanagnany ho gnany hafa. ¹¹ Gny fandinihan-drozy la gny longony hitohy zisiky amparany, ndraiky gny reo toera ipetrahany koa, la ho gnanay reo taranakiny; kehiny araky gnagnarany avao gny tanin-drozy. ¹² Fa gny olo, mana hanagna koa, la tsy hipetraky ho velo; manahaky gny reo biby ze ho rava. ¹³ Toy lalan-drozy toy, ro adalan-drozy, nefa afaran-drozy, la ankasitrahan'ny olo gny fomba fiteniny Sela ¹⁴ Manahaky gn'aondry ro nanandrea gnan-drozy ho amin-gny fiagna tsy hita, ndraiky fahafatesa ro ho mpiamby gnan-drozy. Gny olon-to hanapaky ay namin-drozy lafa maray, ndraiky ho rava amin-gny fiagna tsy hita agny nofotsiny, ka tsy toera hipetrahan-drozy. ¹⁵ Fa Ndranagnahary koa handomba gnaiko amin-gny heriny gny fiagna-tsy hita; handramby gn'aly ie. Sela ¹⁶ Ka mavaka laha misy olo lasa mpagnarivo, ndraiky mitombo gny voninahiny gny vavany. ¹⁷ Fa lafa maty ie la tsy handay ndra ino ndra ino aza; tsy hijotso hagnaraky gn'azy gny voninahiny. ¹⁸ Niarahaba vata ie laha mbo niaina__ndraiky mandrengy anao gny olo hafa mivelo ho gnany gny vatavao iha__ ¹⁹ handeha amin-gny taranaky reo razany agny ie ka tsy ahajery gny hazava sasy rozy. ²⁰ Zemanan-kanagna fe tsy mana fahazavan-tsay la manahaky gny biby, ze ho rava.