¹ Nanapa-kevitsy zaho hoe: " Hitandry zay safagniko zaho mba hagnotako amin'ny lelako. Hofeheziko gny tsihoviko lafa eo amin'ny fagnatrehan'ny olon-draty zaho." ² Nitanjaky fahangina zaho; tsy nisafa zaho na la tamin'ny fivolagna gny soa aza, sady nitombo gny fanaintaignako. ³ Niha-nafana gny foko; lafa nihevitsy gny momban'ireo raha reo zaho, niredareda manahaky gny afo zay. La nisafa avao zaho lafa farany. ⁴ Yaveh o, Ampahaizo gnahy zay fetran'ny aiko voho gny faran'ny androko. Atoroy gnahy gny hafohezan'ny fiaignako. ⁵ Ingo, nataonao manahaky gny sakan'ny tagnako avao gny androko, sady gny androm-piaignako la manahaky gny tsy inon-tsy ino eo agnatrehanao. Ndraiky mandeha avao gny fofon'ainy olo iaby. Sela ⁶ Mandehandeha manahaky gny aloky tokoa gny olo iaby, sandraky hamory hanagna vatany gny olo iaby na la tsy hain-drozy akory aza zay handramby reo. ⁷ Henanizao, Tompo o, ino ro andrasako? Iha avao ro hany fagnatenako. ⁸ Avoto amin'ny fahotako zaho; aza manao gnahy ho fanakoran'ny adala. ⁹ Mangina zaho sady tsy afa-manokatsy gny tsihoviko, fotony Iha ro fa nanao zay. ¹⁰ Ao zay gny fandratra gnahy; magnafotsy gnahy gny fitsokan'ny tagnanao. ¹¹ Lafa magnanatsy olo noho gny fahota Iha, la mandevo reo raha zay iriany manahaky gny kalalao; azo antoky tokoa fa tsy inon-tsy ino gny olo fa raha tsy. Sela ¹² Njanjigno gny fivavako, ry Yaveh, sady mijanjigna gnahy; mijanjigna gny tomagniko! Ka manampin-tsofy agnamiko , fa manahaky gny vahiny zaho agnamiko, mitsoa-ponenana manahaky reo razambeko iaby. ¹³ Alao agnamiko gny sazinao mba hahafahako mitsiky ndraiky mialohan'ny hahafatesako.