¹ Mifalia amin' i Yaveh, nareo ry olo marina, gny fandrengea la magneva ho gnany gny mahity. ² Misaora an' i Yaveh ami-gny lokanga; miantsa fandrengea ho gn'Azy ami-gny harpa toro folo. ³ Mihira fihiram-bao ho gn' Azy; mintendrea soa voho miantsa an-kafalia. ⁴ Fa mahity gny safan' i Yaveh, ndraiky gny raha iaby ataony la araky gny rariny. ⁵ Tea gny rariny ndraiky gny fahamarigna Ie. feno gny famindram-pon'i Yaveh gny tany. ⁶ Taminy gny safan' i Yaveh ro namorognany lagnitsy, ndraiky gny basia iaby ka la natao taminy gny fofognain'ny vavany. ⁷ Mamory gny ranony gny riaky iaby manahaky gny karazan-draha Ie, ataony aminy gny fagnajaria gny riaky bavata. ⁸ Ao mba hatahotry gnan' i Yaveh gny tany iaby iaby; ka mba hifantoky amign' olony gny tany iaby. ⁹ Fa nisafa Ie, la tanteraky zay; nibaiko Ie, ka la tafapetraky zay. ¹⁰ Yaveh mandrava gny fifagnarahany gny firenena manapaky amboniny gny fikasany gn'olo maro Ie. ¹¹ Maharitsy mandrakizay gny fagnirian' i Yaveh, gny fikasany gny fony ho gn'ny gny taranaky iaby. ¹² Sambatsy gny firenena mana gnan'i Yaveh ho An-dranagnaharin, la gn'olo nifiliny ho lovany. ¹³ Magnenty baka an-dagnitsy egny i Yaveh; mahita gny olo iaby Ie. ¹⁴ Bakegny ami- gny toera ze ipetrahany ro hagnenteany ze iaby mivelo agnabony gny tany. ¹⁵ Ie ro namolavola gny fon-drozy iaby ro mandiniky gny asan-drozy iaby. ¹⁶ Tsy misy mpanjaka voalombakiny gny miaramila maro zao, voho gny johary mpialy la tsy voalombakiny gny habevatany gny heriny. ¹⁷ Gny sovaly la fiaron-diso ho any gny fandresea; Na la eo aza gny tanjakiny bevata, la tsy afaky handomba Ie. ¹⁸ Ingo, gny fijerin' i Yaveh la ami- gny ze mavaka Azy; ami- gny ze manantena gny famindrapony mahatoky ¹⁹ mba hagnafaky gn' ain-drozy ami-gny fahafateza, ndraiky mba hamelo gnan-drozy ami-gny fotoany gny mosary ²⁰ Miamby an' i Yaveh tsika, Ie ro mpandomba ndraiky fiaron-tsika . ²¹ Mifaly Aminy gny fontsika, fotony matoky gnagnarany masy. ²² Ao gny famindramponao matoky, Yaveh, ro hitahy anay laha mametraky gny fanantenanay Aminao rahay.