¹ Sady nanomboky nampianatsy teo amoron'ny ranomasina ndraiky Ie , voho nisy vahoaky lako nivory nagnodidy Gnazy. Nilitsy tao an-tsambokely zay teo an-dranomasina Ie, sady nipetraky tao amin'io. Gny vahoaky iaby koa la nijano teo agnilan'ny ranomasina. ² Nampianatsy gnan-drozy raha maro tamin'ny alalan'ny fagnohara Ie, sady tao amin'ny fampianarany, la zao ro niresahany tamin-drozy. ³ " janjigno, nisy mpamafy handeha hamafy voa. ⁴ Sady laha namafy ie, la nisy voa sasany niraraky tamin'ny lala, ka avy reo voro ka nihina gnan'io. ⁵ Gny voa sasany niraraky tamin'ny feno vatovato, zay tsy nisy tany firy. Avy la nitsimoky avy hatrany rozy, fotony tsy laliky gny tany nisy gnazy. ⁶ Fa lafa niposaky gny masoandro, la nalazo rozy, ary satria tsy nisy fakany rozy, la maiky . ⁷ Gny voa hafa niraraky tamin'ny tany feno fatiky. Sady nitsimoky niha-bevata reo fatiky la nangeja gnazy, ka tsy namoa voa. ⁸ Gny voa hafa niraraky tamin'ny tany soa ka namokatsy voa teo am-pitomboa sady nihamaro, voho gny sasany nitombo avo telopolo heny, gny sasany enimpolo, voho gny sasany zato." ⁹ Bakeo la hoy Ie hoe:" Zay manan-tsofy handesy mijanjy, ao ie hijanjy." ¹⁰ Lafa Jesosy avao teo,la nagnontany Gnazy momba io fagnohara io reo zay akaiky Gnazy voho reo mpianany foloroamby. ¹¹ Hoy Ie tamin-drozy hoe:" Ho gnanareo ro nagnomeza gny raha mietakin'ny fanjakan-Dranagnahary. Fa ho gnan'ireo zay agny ivelany la fagnohara iaby, ¹² mba amin'ny fotoa hanentean-drozy; eka hijery rozy, nefa tsy hahajery, voho mba amin'ny fotoa hijanjignan-drozy, eka hahajanjy rozy, nefa tsy hahay gnan'io , na koa hiodiky rozy la hamindra fo amin-drozy Ndranagnahary." ¹³ La hoy ie tamin-drozy hoe:" tsy azonareo va io fagnohara io? Manao akory zany ro hahazoanareo reo fagnohara hafa iaby? ¹⁴ Gnyy mpamboly zay mamafy gny voa la gny raiky zay mamafy gny safa. ¹⁵ Reto ro gny niraraky tegny an-dala, zay namafaza gny safa, fa lafa ren-drozy io, la avy hatragny Satana voho hangalatsy gny safa zasafa zay voafafy tamin-drozy. ¹⁶ Reto gny voafafy tamin'ny tany feno vato, zay lafa nahare gny safa, la nandramby gnan'io avy hatrany tamim-pazotoa. ¹⁷ tsy misy fakany ao amin-drozy fa maharitsy fotoa tsy ampy avao. La avy gny fahoria na fagnenjeha noho gny safa, ka avy hatrany la lavo rozy. ¹⁸ Reo hafa ro lay voafafy tamin'ny tany feno fatiky. Ren-drozy gny safa, ¹⁹ fa gny fanahian'izao tontolo zao, gny famitahan'ny hanagna, voho gny fila gny raha hafa la tafilitsy ka mangeja gny safa, ka tsy mamoa iaby io. ²⁰ Voho reo zay voafafy tegny amin'ny tany soa la reo zay nahare gny safa sady mandramby gnan'io, ka namoa vokatsy rozy_ telopolo, enimpolo, na avo zato henin'izay nafafy." ²¹ Jesosy niresaky tamin-drozy hoe:" Moa andesinao ao an-tragno va gny jiro mba hatao ao ambany sobiky , na ambanin'ny farafara? Andesinao militsy io la hataonao agnabon'ny fipetrahan-jiro. ²² Fa tsy misy raha mietaky zay tsy ho hay, sady tsy misy tsiambaratelo zay tsy hiboaky. ²³ Laha misy manan-tsofy handesy mijanjy , ao ie hijanjy!" ²⁴ Hoy Ie tamin-drozy hoe:" Mitandrema amin'ny safa zay renareo, fa araky gny ohatsy agnoharanareo avao, ro agnohara nareo, sady hampia aminareo io. ²⁵ Fotony ndra ia ia mana, la hamea maro tokoa ie, fa ndra ia ia tsy mana , na zay anagnany aza hala aminy." ²⁶ Sady hoy avao koa Ie hoe:" Gny fanjakan-Dranagnahary la manahaky gny olo raiky mamafy gny voany amin'ny tany. ²⁷ miroro ie amin'ny haly voho mifoha amin'ny maray, fa tsy hainy hoe manao akory. ²⁸ Gny tany la mamoa amin'ny vatany avao:Voalohany gny rantsany, bakeo gny tahony, bakeo gny voa matoe eo amin'ny tahony. ²⁹ Voho lafa matoe gny voa la avy hatragny ie la handefa fijinja , fa fa avy gny fotoam-pijinja." ³⁰ Sady hoy ndraiky Ie hoe:" Ino ro azontsika ampitaha gny fanjakan-Dranagnahary, ndra ino ro fagnohara hampiasantsika hagnazava gnan'io? ³¹ Io la manahaky gny voatsinampy zay lafa hafafy, la ie ro voa kely mare amin'ny voa iaby eto ambonin'ny tany. ³² Nefa, lafa voafafy io, la mitsimoky ka lasa bevata noho gny hazo manontolo, voho mamoa rantsa bevata, ka azon'ny voromanidina hanaova gny tragnony eo amin'ny alokiny." ³³ Sady fagnohara maro manahaky gnan'io ro nagnambarany gny safa tamin-drozy, araky zay fahazoan-drozy gnazy, ³⁴ sady tsy niresaky tamin-drozy afa-tsy tamin'ny fagnohara Ie, fa zao lafa Ie raiky avao teo, la nihazavagniny tamin'ireo mpianany manoka gny raha iaby. ³⁵ Tamin'io andro io , lafa avy gny hariva , la hoy Ie tamin-drozy hoe:" andeha tsika hita egny am-pita." ³⁶ ka niala teo amin'ireo vahoaky rozy, nanday gnan'i Jesosy niaraky tamin-drozy, laha igny Ie, tao agnaty sambokely igny. Nisy sambokely hafa nandeha niaraky taminy. ³⁷ bakeo nanomboky nisy tafio-drivotsy mare voho gny ojan-drano nanafotsy gny sambokely ka fa saiky feno rano gny sambokely. ³⁸ Sady Jesosy niroro raiky teo ambodin'ny sambokely, tagnabon'ny onda. Nifohazin-drozy Ie, nanao hoe:" Mpampianatsa o, tsy mampagnino Gnanao va laha ho maty eto tsika?" ³⁹ Ka nifoha Ie, la niresaky mareo tamin'ny tsioky , sady niresaky tamin'ny ranomasina hoe:" Mijanogna! mitonia!" ka nijano gny tsioky , ka nisy fitonia be. ⁴⁰ Sady hoy Ie tamin-drozy hoe:" nagnino nareo ro matahotsy? Mbo tsy manam-pinoa avao va nareo?" ⁴¹ Feno tahotsy rozy ka nifampiresaky hoe:" ia moa toy, fa ndra la gny tsioky voho gny ranomasina aza magnenky Gnazy?"