¹ Nitsanga gny olo iaby tamin-drozy, sady nanday gnan'i Jesosy teo agnatrehan'i Pilato. ² Nanomboky niampanga Gnazy rozy, nivola hoe: " Hitanay toy johary toy nametaveta gny firenenay, nandrara gny hanomeza gny hetra ho gnan'i Kaisara, sady nivola fa Ie vatany mihitsy ro Kristy, mpanjaka." ³ Pilato nagnontany Gnazy, nivola hoe: " Iha va ro mpanjakan'ny Jiosy?" Jesosy namaly gnazy sady nivola hoe: " Voalazanao." ⁴ Pilato nivola tamin'ireo lohan'ny mpisoro voho reo vahoaky hoe: " Tsy mahajery fahadisoa amy toy johary toy aho." ⁵ Fa mbo nanizingizy rozy, nivola hoe: " Manakoronta gny vahoaky io, mampianatsy bakagny Galilia na hatretoy amy toy toera toy aza." ⁶ Ka lafa njanjin'i Pilato izay, la nagnontany ie laha toa ka Galiliana gny johary. ⁷ Lafa hitany fa tao ambany fahefan'i Heroda Ie, la nalefany Jesosy nagnagny amin'i Heroda, zay tagny Jerosalema avao koa tamin'izay andro zay. ⁸ Lafa jerin'i Heroda Jesosy, la tena falifaly ie, fotony fa te-hahajery Gnazy hatry gny ela. Nahanjanjy gny mikasiky Gnazy ie sady nagnantena gny hahajery fahagaga maro nataony. ⁹ Heroda nametra-panontania gnan'i Jesosy tamin'ny teny maro, nefa Jesosy tsy namaly na ino na ino gnazy. ¹⁰ Reo lohan'ny mpisoro voho reo mpanora-dalana nitsanga, niampanga mare Gnazy. ¹¹ Heroda voho reo miaramilany nanevateva gnan'i Jesosy sady nanesoeso Gnazy. Bakeo la nampiakanjo Gnazy lamba soa tarehy rozy sady nalefan-drozy nimpoly tagny amin'i Pilato Ie. ¹² Fa i Heroda voho Pilato la lasa mpinama tamin'ny androtr'io ( talohan'izay la mpifahavalo rozy). ¹³ Bakeo Pilato nikaiky reo lohan'ny mpisoro voho reo mpanampaky sady reo vahoaky maro niaraky, ¹⁴ sady nivola tamin-drozy hoe: " Nandesinareo teto agnamiko toy johary manahaky gny johary zay mitariky gny olo hanao raty, sady henteo, zaho, laha nametra-panontania tagnaminy teo agnatrehanareo, la tsy mahajery fahadisoa amy toy johary toy mahakasiky reo raha zay hiampanganareo Gnazy. ¹⁵ Tsia, na la Heroda aza, fotony nalefany nimpoly tatoy amintsika Ie, sady henteo, tsy misy na ino na ino zay mendriky fahafatesa vitany. ¹⁶ Noho izay la ho faiziko Ie, sady ho havotsoto Ie." ¹⁷ [ Fanamariha: Reo fandika soa mare la tsy manisy gny And 17 hoe: Sady Pilato la voatery namotsotsy gadra raiky ho gnan'ireo Jiosy tamin'ny andro firavoravoa.] ¹⁸ Fa niaraky nikoraky mare rozy, nanao hoe: " Andeso agny io johary io, sady avotoro ho gnanay Barabasy!" ¹⁹ Barabasy la johary raiky zay nailitsy an-gadra nohon'ny fikomia maro tao an-tana voho famonoa olo. ²⁰ Sady nivola tamin-drozy ndraiky Pilato, nagniry gny hamotsotsy gnan'i Jesosy. ²¹ Nefa nitabataba mare rozy, nivola hoe: " Vonoy Ie, vonoy Ie." ²² Nivola tamin-drozy fanintelony ie hoe: " Nagnino, fa ino ro raty vitany toy johary toy? Tsy nahajery na ino na ino zay mendriky sazy famonoa tao aminy aho. Noho izay lafa avy manafay Gnazy, la hamotsotsy Gnazy aho." ²³ Fa rozy nanizingizy tamin'ny feo abo, nangataky Gnazy mba hovonoa. Gny feon-drozy la nandresy lahatsy gnan'i Pilato. ²⁴ Ka la nanapa-kevitsy gny hagnenky gny fangatahan-drozy Pilato. ²⁵ Navotony gny raiky nangatahin-drozy zay nalefa tagny am-ponja nohon'ny fikomia voho famonoa olo. Fa natolony ho amin'ny sitrapon-drozy Jesosy. ²⁶ Sady teo am-pitondra Gnazy rozy, la nitandraky gnan'i Simona bakagny Syrenia, zay bakagny ambanivohitsy, sady napetrakin-drozy teo aminy gny hazo fijalia mba ho andesiny, nagnaraky gnan'i Jesosy. ²⁷ Maro tamin'ireo vahoaky, voho reo ampela zay nalahelo mare voho nisao Gnazy, ro nagnaraky Gnazy. ²⁸ Fa lafa nitoliky tagny amin-drozy, la nivola Jesosy hoe: " Ry anak'ampelan'i Jerosalema, ka mitomany Gnahy, fa mitomania ho gnan'ny vatanareo voho ho gnan'ireo anakareo. ²⁹ Fa ingo, ho avy gny andro zay hivolagnan-drozy hoe: ' Sambatsy reo mikasiky voho reo kibo zay tsy niteraky, sady gny nono zay tsy nampinono aja.' ³⁰ Sady la hanomboky hivola amin'ireo tendrombohitsy rozy hoe: ' Mitonta agnaminay,' sady amin'ny haboana hoe: " Manarona gnanay." ³¹ Fa laha manao izay raha izay rozy laha mbo mikaiky gny hazo, ino ro hitranga lafa maiky izay?'' ³² Nisy johary hafa, olo-draty roe, nandesy niraky tagnaminy mba ho vonoe. ³³ Lafa avy teo amin'ny toera raiky zay kinaiky hoe " Ikarandoha" rozy, la teo ro nanomonoan-drozy Gnazy, voho reo olo-draty - gny raiky teo amin'ny ankavanany voho gny raiky teo amin'ny ankaviany. ³⁴ Jesosy nivola hoe: " Ray o, mamela gnan-drozy, fa tsy haindrozyzay ataony." Bakeo la niloka rozy nizarazara reo fitafiany. ³⁵ La nijoro nagnenty teo reo olo laha mbo nisomonga Gnazy koa reo mpanapaky, nivola hoe: " Namonjy reo hafa Ie. Engao Ie hamonjy gny vatany, laha Ie ro kristin-Dranagnahary, gny raiky voafily." ³⁶ Reo miaramila avao koa la nangalaky baraky Gnazy, namonjy Gnazy, nagnome Gnazy vinaingitsy, ³⁷ sady nivola hoe: " Laha Iha ro mpanjakan'ny Jiosy, vonjeo gny vatanao." ³⁸ Nisy famantara avao koa teo agnabon'ny hoe: " Toy ro mpanjakan'i Jiosy." ³⁹ Gny raiky tamin'ireo olon-draty zay nihantogna teo ro namingavinga Gnazy tamin'ny nivolagnany hoe: " Tsy iha va ro Kristy? Vonjeo gny vatanao voho rahay." ⁴⁰ Fa gny raiky nivola mare gnazy, nanao hoe: " Tsy mba matahotsy an-Dranagnahary va iha, laha samby ambanin'ny fanameloha mitovy avao? 41 Tsika la eto ara-drariny tokoa, fotony mandramby zay mendriky gny asantsika tsika. Fa toy johary toy tsy nanao raha raty." ⁴² Bakeo ie nivola hoe: " Jesosy o, tiarovo aho lafa avy agny amin'ny fanjakanao Iha." ⁴³ Jesosy nivola tagnaminy hoe: " Ambarako marina agnaminao, fa henanio iha la hiaraky agnamiko agny paradisa." ⁴⁴ Sady ora faha-enina teo ho eo tamin'izay, sady gny maiky avy nandrakotsy gny tany manontolo hatramin'ny ora fahasivy ⁴⁵ laha niha maiky gny hazavan'ny masoandro. Bakeo gny lamban'ny tempoly la nizara avy teo agnivony. ⁴⁶ Nikoraky tamin'ny feo mare, Jesosy nivola hoe: " Ray o, eo an-tagnanao ro ametrahako gny fagnahiko." Lafa baka nivola izay, la maty Ie. ⁴⁷ Lafa hitan'ny kapiteny gny raha nitranga, la nagnome voninahitsy an-Dranagnahary ie, nivola hoe: " Azo antoky tokoa fa olo-to toy johary toy." ⁴⁸ Lafa jerin-drozy vahoaky iaby zay niaraky niavy ho vavolombelo nanatri-maso reo raha nitranga reo, la nimpoly niteha-tratra rozy. ⁴⁹ Fa reo iaby zay nahay Gnazy, voho reo ampela, zay nagnaraky Gnazy bakagny Galilia, la nitsanga tegny alavidavitsy, nagnenty izay raha izay. ⁵⁰ Sady ingo, nisy johary raiky kinaiky hoe Josefa, zay mpikamba tao amin'ny Synedriona. Olo soa sady to ie. ⁵¹ Io johary io la tsy nagnenky gny fanapahan-kevitsy gny Synedriona voho gny asan-drozy. Bakagny amin'ny tagnan'ny Jodiana tagny Armatia ie; sady ie la nikatsaky gny fanjakan-Dranagnahary. ⁵² Io johary io, laha namonjy gnan'i Pilato la nangataky gny vatan'i Jesosy. ⁵³ Nalany nizotso izay, nirakotsy hariry madiniky, sady napetrany tao agnaty fasana raiky zay nivaky tamin'ny vatolampy, zay tsy mbo nisy olo nalevy mihintsy. ⁵⁴ Andron'ny Fiomana tamin'izay, sady mbo nazava raty gny Sabata. ⁵⁵ Reo ampela, zay niaraky tamin'i Jesosy niala tao Galilia, la nagnaraky bakao afarany sady nahajery gny fasana voho gny fomba nametraha gny fatiny. ⁵⁶ Nimpoly rozy, sady nanoma raha-magnitsy voho menaky magnitsy. Sady tamin'ny sabata la nitsahatsy rozy araky gny lily.