¹ Vo maraindry tamin'ny andro voalohan'ny herinandro, la nagnagny amin'ny fasana rozy, nanday reo raha-magnitsy zay nikarakaran-drozy. ² Hitan-drozy nikodia lavitsy gny fasana gny vato. ³ Nilitsy tao rozy, nefa tsy nahita gny vatan'ny Tompo Jesosy. ⁴ Sady, laha sahiran-tsay mikasiky izay rozy, tampoky teo, la nisy johary roe nanao fitafia mamirapiratsy nitsanga teo agnilan'ireo. ⁵ Sady lafa feno tahotsy reo ampela la niankohoky tamin'ny tany, nivola tamin'ireo ampela rozy hoe: " Nagnino nareo ro mila gny velo atoy amin'ny maty? ⁶ Tsy ato ie, fa natsanga! Tadidio gny nivolagniny gnanareo tamy Ie mbo tagny Galilia, ⁷ nagnambara fa gny Anan'Olo la tsy maintsy hatolotsy ho eo an-tagnan'ny olo mpanota ka hofantsihy eo amin'ny hazo fijalia, sady amin'ny andro fahatelo la hitsanga ndraiky." ⁸ Reo ampela la nahatiaro reo volany, ⁹ Ka nimpoly bakagny amin'ny fasana sady nivola izay raha iaby izay tamin'ireo iraiky ambin'ny folo voho gny ambiny iaby. ¹⁰ Sady Mary Magdalena, Johana, Mary renin'i Jakoba, sady reo ampela hafa niaraky taminy la nitaitsy izay raha izay tamin'ireo apostoly. ¹¹ Fa izay hafatsy izay la manahaky gny tsy nisy dikany tamin'ireo apostoly, ka tsy nino reo ampela rozy. ¹² Nefa nitsanga Petara, la nilailay nagnegny amin'ny fasana, sady niondriky voho nagnenty tao, la nahajery reo lambam-paty nitoka. Sady Petera noly tagny an-tragnony, nagnontany tena gny amin'izay raha-nitranga. ¹³ Ndreo. gny roe tamin-drozy nandeha tamin'io ho agny amin'ny tana atao hoe Emaosy, zay enimpolo stadio miala an'ny Jerosalema. ¹⁴ Rozy la nifampiresaky mikasiky reo raha iaby zay nitranga. ¹⁵ Sady, laha niara-niresaky voho niara-nametraky fanontania rozy, la nagnotany voho nandeha niaraky tamin-drozy Jesosy. ¹⁶ Fa gny fijerin-drozy la nisakana mba tsy hahafantatsy Gnazy. ¹⁷ Jesosy nivola tamin-drozy hoe: " Ino ro resahanareo roe etoy am-pandehana?" La nijano rozy sady nalahelo endriky. ¹⁸ Gny raiky tamin-drozy, kinaiky hoe kleopasy, namaly Gnazy hoe: " Iha raiky va ro olo tao Jerosalema tsy nahay reo raha-nitranga tagny tamin'izay andro izay? ¹⁹ Jesosy nivola tamin-drozy hoe: " Raha ino?" Rozy namaly Gnazy hoe: " Reo raha mikasiky gnan'i Jesosy gny Nazarena, zay mpaminany, nahery tamin'ny asa voho gny safa teo agnatrehan-Dranagnahary voho gny olo iaby. ²⁰ sady gny fomba nanoloran'ireo lohan'ny mpisoro voho reo mpanapakay Gnazy mba ho meloha ho maty voho gny namonoa Gnazy teo amin'ny hazo fijalia. ²¹ Nefa rahay nanantena fa Ie ro gny hanafaky gnan'Israely. Eny sady ankoatsy izay iaby izay, telo andro androany zao ro nitrangan'izay raha iaby izay. ²² Nefa koa, gny ampela sasany tamin'ny namanay la nahatreriky gnanay, zay tagny amin'ny fasana vo maraindray. ²³ Lafa tsy nahajery gny vatany rozy, la niavy, nivola fa rozy koa la nahajery fahita anjely zay nilaza fa velo Ie. ²⁴ Gny johary sasany zay niaraky tagnaminay la nandeha tagny amin'ny fasana, sady nahajery izay araky zay voalazan'ireo ampela. Nefa tsy nahajery Gnazy rozy." ²⁵ Jesosy nivola tamin-drozy hoe: " Ry johary adala voho votsa say mino reo iaby voalazan'ny mpaminany! ²⁶ Moa va tsy nila ho gnan'i Kristy gny nijaly tamin'iregny raha regny, ka hilitsy agny amin'ny voninahitsy?" ²⁷ Sady nanomboky tamin'i Mosesy ka hatramin'ireo mpaminany iaby, la nadikan'i Jesosy tamin-drozy ao amin'ny Soratsy Masy gny mikasiky gny Vatany. ²⁸ Nony nagnariny gny tana zay nandehanany rozy, la naneho fihetsika manahaky gny hoe handeha lavidavitsy jesosy. ²⁹ Fa nanery Gnazy rozy, nivola hoe: " Mijano eto agnaminay, fa ho hariva zao sady fa hifara gny andro." Ka nilitsy mba hijano niaraky tamin-drozy Jesosy. ³⁰ Sady, lafa nipetraky mba hiaraky hihina tamin-drozy Ie, la nangalaky gny mofo, nisaotsy izay, voho namaky izay, sady nagnome izay gnan-drozy. ³¹ Bakeo nisokatsy gny mason-drozy, ka nahafantatsy Gnazy, sady nanjavo teo imason-drozy Ie. ³² Rozy nifampiteny hoe: " Moa va gny fontsika tsy niredareda tao agnatitsika, laha nivola tamintsika tegny an-dala Ie, laha nanokatsy gny Soratsy Masy tamintsika Ie?" ³³ Nitsanga rozy tamin'io ora io, ka nimpoly tagny Jerosalema. Nahajery reo iraiky ambin'ny folo niara-nivory rozy, voho reo zay niaraky tamin-drozy, ³⁴ Nivola hoe: " Gny Tompo la nitsanga tokoa, sady niseho tamin'i Simona." ³⁵ Ka nambaran-drozy zay raha nitranga tegny an-dala, voho gny fomba nisehoan'i Jesosy tamin-drozy tamin'ny fanapaha gny mofo. ³⁶ Laha nivola izay raha izay rozy, la nijoro teo agnivon-drozy Jesosy vatany, sady nivola tamin-drozy hoe: " Fiadagna anie ho gnanareo." ³⁷ Nefa taitsy voho raiki-tahotsy rozy, sady nihevitsy fa nahajery fa nahajery fagnahy. ³⁸ Jesosy nivola tamin-drozy hoe: " Nagnino nareo ro matahotsy? Nagnino ro misy fagnontania ao am-ponareo? ³⁹ Henteo gny tagnako voho gny tomboko, fa Zaho vatako toy. Kasiho Aho ka henteo. Fa gny fagnahy tsy mana nofo voho taola, araky gny ahitanareo Gnahy hoe mana." ⁴⁰ Lafa nivola izay Ie, la nasehony tamin-drozy gny tagnany voho gny tombony. ⁴¹ Mbo tsy nino izay rozy nohon'ny hafalia, sady treriky rozy. Jesosy nivola gnan-drozy hoe: " Mana raha hohany va nareo?" ⁴² Nomen-drozy fia voatono ie, ⁴³ ka nalany izay sady nihaniny teo agnatrehan-drozy. ⁴⁴ Ie nivola tamin-drozy hoe: " Taminy Zaho niaraky tagnaminareo, la nivola tagnaminareo fa zay iaby voasoratsy tao amin'ny lalan'i Mosesy voho reo mpaminany sady reo Salamo la tsy maintsy ho tanteraky." ⁴⁵ Sady nisokafany gny sain-drozy, mba hazoan-drozy gny Soratsy Masy. ⁴⁶ Nivola gnan-drozy Ie hoe: " Zao ro voasoratsy, fa gny Kristy la hijaly, sady hitsanga amin'ny maty ndraiky amin'ny andro fahatelo. ⁴⁷ Fibebaha voho famelan-keloky ro tokony ho toria amin'ny agnarany agny amin'ny firenena iaby, manomboky ao Jerosalema. ⁴⁸ Nareo ro vavolombelon'iregny raha regny. ⁴⁹ Ingo, halefako agnaminareo zay nampanantenain'ny Babako. Nefa mitoera ao an-tana mandra-pitafianareo gny hery bakagny ambony." ⁵⁰ Sady Jesosy nitariky gnan-drozy mandra-pahavin-drozy tagny Betania. Nasandrany gny tagnany nitso-drano gnan-drozy Ie ⁵¹ sady lafa nitahy gnan-drozy ie la nagnenga gnan-drozy Ie sady lasa naakatry an-dagnitsy agny. ⁵² La nandrengy Gnazy rozy, sady nimpoly tagny Jerosalema tamin'ny fifalia bevata. ⁵³ Nitohy nagnagny amin'ny tempoly rozy, nankalaza an-Dranagnahary.