¹ Niavy tam'i Jona fagnindroany indraiky gny safan'i Yaveh manao hoe: ² "Mitsangana, mandehana magn'a Ninive agny, tana bavata, voho torio agnaminy gny hafatsy ibaikoako gnanao." ³ Voho la nitsanga Jona ka nagn'a Ninive agny tami-gny fankatoava gny safan'i Yaveh. Voho Ninive la tana bavata vatany, raiky ami-gny reo lala hateloa. ⁴ Nanomboky nilitsy gny tana i Jona voho tafarany gny lala andro raiky la nikaiky mare ie voho nisafa hoe: "Horava i Ninive agnaini-gny efapolo andro." ⁵ Nino gnan-dranagnahary gny vahoaky ta Ninive tao voho nikaiky fifalian-kany rozy. Nanao lamba fisaogna iaby rozy iaby, baka ami-gny bavata mare ka la zisiky ami-gny maliniky mare agnamin-drozy. ⁶ Tsy ela avao la niavy tami-gny mpanjakan'i Ninive teo gny vaoavao. La nitsanga baka ami-gny seza fiandrianany eo ie, nalay gn'akanjom-boninahiny, ka nanaro gny vatany tami-gny lamba fisaogna, voho nipetraky tan-davenoky teo. ⁷ Nandefa fagnambara ie nivoala hoe: "Ninive etoa, ami-gny fahefany gny mpanjaka ndraiky gn'olo-manan-kajany, ao tsy hisy olo na biby, aomby na aondry voho aosy, hanendry raha. Ao tsy ihina rozy, na hinon-drano. ⁸ Fa ao gny biby ndraiky gn'olo hisaro lamba fisaogna voho ao rozy hitoreo mare amin-Dranagnahary. Ao samby hiala ami-gny lalan-draty kiraidraiky iaby ndraiky ami-gny serisery an-tagnany eo. ⁹ Ia ro mahay? Mety hanegny avao Ndranagnahary ka hiova hevitsy voho hiala ami-gny fahasiahany ka tsy ho ringa tsika." ¹⁰ Jerin-Dranagnahary gny raha nataon-drozy, fa niala tami-gny lalan-dratin-drozy rozy. Nohony zay la niova hevitsy Ndranagnahary ami-gny fandilova nivinolany hataony agnamin-drozy igny, ka la tsy nataony zay.