¹ Fa tsy nahafaly gnan'i Jona zay ka nanjary nasiaky mare ie. ² Noho zay la nivavaky tam'i Yaveh i Jona voho nanao hoe: "Oh ry Yaveh, tsy zao va ro fa nivinolako tagnaminareo lafa tafampoly tami-gny firenenako tagny iaho? Zay ro antony niketsehako voalohany ndraiky niezahako hilay ta-Tarsisy tagny__fotony haiko fa Ndranagnahary manan-kaream-pahasoava, mahari-po, tsy tea siaky, misoloho agnaminao iaho, alao agnamiko gn'aiko, fa soa ho gn'ahy gny ho maty tozay ho velo." ⁴ Hoy i Yaveh hoe: "Mety va zao siakinao lilatsy mare zao?" ⁵ La niboaky gny tana i Jona voho nipetraky tami-gny ilany an-tignanani-gny tana tegny. Tagny ro nanaovany fialofa ka nipetraky tam-banini-gn'aloky zay teo ie mba hahitany ze mety ahazo gny tana. ⁶ nagnoma hazo Yaveh Ndranagnahary ka nampitomiry gnany zay tagnabon'i Jona teo hagnalokaloky gny lohany mba hagnamaiva gny fahoriany. La vatany faly vatany i Jona nohoni-gny hazo. ⁷ Fe nagnoma hanka Ndranagnahary tami-gny fiboahani-gny masoandro gny hamaray marandray. Nilinamany azy hazo igny ka la nimaiky. ⁸ Voho lafa niboaky gny masoandro hamaray marandray, la nagnoma tsioky mahamay baka an-tignana agny Ndranagnahary. voho koa, nahavoa gny lohan'i Jona gny masoandro ka la nilany hery ie. La nagniry gny ahafatezany Jona. Hoy ie tami-gny vatany hoe: "Aleoko maty tozay ho velo." ⁹ Voho hoy Ndranagnahary tam'i Jona: "Mety va zao siakinao bavata ami-gny hazo io zao?" La hoy i Jona hoe: "Mety gny siakiko, na ho ami-gny fahafateza aza." ¹⁰ Hoy Yaveh hoe: "Naferignay gnany hazo igny iha, tsy niasanao, na nampitirigninao. Nitomiry tagnaini-gny haly raiky zay voho maty tagnaini-gny haly raiky. ¹¹ Manahaky gnany zay koa gn'Agnamiko, tsy tokony haferignay gnan'i Ninive, gny tana bavata, misy vahoaky mandilatsy gny zato ndraiky roa aly tsy mahay gny fahasambi-hafa ami-gny tagna an-kavagna eo ndraiky gny tagana havian-drozy, ndraiky gny reo biby fihany maro avao koa va Iaho?"