¹ Lafa baka niresaky reo raha reo Jesosy, la nanandratsy gny masony ho amin'ny lagnitsy Ie ka nanao hoe:" Ray o, avy gny fotoa, mankalaza gny Anakao mba hankalazan'ny Anaky Gnanao_ ² manahaky gny nagnomezanao Gnazy fahefa agnabon'ny nofo iaby mba hagnomeza fiaigna mandrakizay ho gnan'izay iaby nameanao Gnazy. ³ Zao ro fiaigna mandrakizay :la gny ahaizan-drozy Gnanao, lay Ndranagnahary tokoa sady marina, voho Ie zay nirahy la Jesosy Kristy. ⁴ Nankalaza Gnanao aho teto an-tany. Fa vitako. ⁵ Amizao , gny Ray, hankalazao miaraky amin'ny vatanao Aho amin'ny voninahitsy zay nanagnako niaraky taminao talohan'ny naharia zao tontolo zao. ⁶ Nampahay gny agnaranao tamin'ny olo zay nameanao Gnahy bakamin'izao tontolo zao Aho. Gnanao raiky, voho nameanao Gnahy, voho nitandremany gny safanao. ⁷ Amizao hain-drozy fa gny raha iaby zay nameanao Gnahy la bakaminao, ⁸ fotony nameako gnan-drozy iaby gny safa zay nameanao Gnahy. Nirambesin-drozy regny ka hainy matina tokoa fa bakaminao Aho, ka nino rozy fa Iha ro nagniraky Gnahy. ⁹ Mivavaky ho gnan-drozy Aho, Tsy mivavaky ho gnan'izao tontolo zao Aho fa ho gnan'ireo zay nameanao Gnahy, nohon'ny rozy Gnanao. ¹⁰ Gny raha iaby zay Gnahy la Gnanao, voho zay Gnanao la Gnahy, ka hankalaza amin'iregny Aho, ¹¹ Tsy amin'izao tontolo zao sasy Aho fa reo olo reo la ato amin'izao tontolo zao, sady mamonjy gnanareo Aho, Ray Masina o, tanjaho amin'ny agnaranao zay nameanao Gnahy rozy mba hitambatsy ho raiky, manahaky maha raiky gnantsika. ¹² Laha mbo teo amin-drozy Aho, la nitanjaky gnan-drozy tamin'ny agnaranao, zay nameanao Gnahy. Niaro gnan-drozy Aho, sady tsy nisy trobo ndra la raiky aza, afa-tsy gny anaky gny fahavereza avao, mba ho tanteraky gny Soratsy Masina. ¹³ Sady ho agny aminao Aho fa milaza reo raha reo amin'izao tontolo zao Aho mba hahatanteraky gny fahazotoako ao amin-drozy. ¹⁴ Fa nameako gnan-drozy gny safanao , voho nalay gnan'izao tontolo zao rozy fotony tsy bakamin'izao tontolo zao, manahaky Gnahy tsy gnan'izao tontolo zao. ¹⁵ Zaho la tsy mangataky Aminao gny hangalanao gnan-drozy amin'izao tontolo zao, fa gny mba hiarivanao gnan-drozy amin'ilay raty. ¹⁶ Rozy la tsy gnan'izao tontolo zao, manahaky Gnahy tsy gnan'izao tontolo zao. ¹⁷ Hamasigno amin'ny fahamarigna rozy. Fa gny safanao ro fahamarigna. ¹⁸ Manahaky gny nagnirahanao Gnahy ho amin'izao tontolo zao, ro nagnirahako gnan-drozy ho amin'izao tontolo zao avao koa. ¹⁹ Fa nohon'ny fitiavako gnan-drozy ro nagnamasinako gny vatako,mba hagnamasina gny vatan-drozy amin'ny fahamarigna avao koa. ²⁰ Zaho la tsy mivavaky ho gnan'ireo avao, fa ho gnan'ireo zay hino Gnahy amin'ny alalan'ny safan-drozy koa ²¹ mba ho raiky avao rozy iaby, manahaky gnanao Ray , ato amiko, voho zaho ao aminao. Mivavaky Aho mba hinoan'iza tontolo zao fa nagniraky Gnahy Iha. ²² Gny voninahitsy zay nameanao Gnahy,la nameako gnan-drozy, mba ho raiky rozy, manahaky gny maha raiky gnantsika. ²³ Zaho ao amin-drozy, voho Iha ato amiko__ ka ho tena raiky tanteraky tokoa rozy, mba ho hain'izao tontolo zao fa nagniraky Gnahy Iha, ka nitia gnan-drozy manahaky nitiavanao Gnahy. ²⁴ Ray o, reo zay nameanao Gnahy la tiako hiaraky amiko na aia aia misy Gnahy, voho hahita gny voninahitso, lay voninahitsy zay nameanao Gnahy fotony nitia Gnahy Iha talohan'ny naharianao zao tontolo zao. ²⁵ Ray marina o, tsy nahay Gnanao zao tontolo zao, fa Zaho mahay Gnanao, voho rozy mahay fa nagniraky Gnahy Iha. ²⁶ nampahaiziko gnan-drozy gny agnaranao , voho mbo ho hampahaiziko gnan'io mba ho ao amin-drozy gny fitiava zay nitiavanao Gnahy, ka Zaho ho ao amin-drozy."