¹ Sady Iaveh nisafa tamin'i Noa hoe:" Milira ao agnatin'ilay sambo-fiara iha voho gny avorohotanao, fotony iha ro olo jeriko fa to eo agnatrehako amin'ity. ² Gny amy gny biby malio iaby la agnandeso fito lahy voho fito vavy. Sady gny amin'ireo biby tsy malio, la mangala roe iasany, lahy voho vavy. ³ Gny amin'ireo voro gny habakabaky koa, la mangala fito lahy voho vavy, ho fiarova gny avorohotany etoy amboniny gny tany. ⁴ Afarany gny fito andro la handefa ora mikija mandritsa gny efapolo andro voho efapolo haliky aho. Haringako iaby reo zava-managnay nohariako teto amboniny gny tany." ⁵ La nataon'i Noa iaby ze nandidian'i Iaveh gnazy. ⁶ Eninjato tao i Noa tamin'ny andro niavian'ny safo-drano teto an-tany. ⁷ Noa, reo anakilahiny, gny valiny, sady reo vinanto vaviny la niaraky nilitsy tao agnaty sambo-fiara noho gny ranon'ny safo-drano. ⁸ Reo biby malio voho reo biby maloto, reo voro, sady reo zavatra mandaly amy gny tany iaby, ⁹ La avy kiroeroe, lahy voho vavy, nagnegny amin'i Noa sady nilitsy tao amin'ny sambo-fiara, araky gny fa nandidian-Dranagnahary gnan'i Noa. ¹⁰ Sady fito andro tatoy afra, la nanomboky nilatsaky gn'ora ka feno rano gny tany. ¹¹ Tamy gny faha eninjato tao niaignan'i Noa, faha roe vola, andro faha folo fitoamby vola, tamin'izay andro za, la nipoitry iaby reo loharano laliky ambanin'ny tany, sady nisokatr'ireo varavagnakelin'ny lagnitry. ¹² Nanomboky nikija nandritsa gny efapolo andro voho efapolo haliky gny ora teto amboniny gny tany. ¹³ Tamin'izay andro zay koa i Noa voho reo anaky lahiny, Sema, Hama, voho reo Jafeta, sady gny valin'i Noa, voho reo vananto vaviny telo niaraky amin-drozy, la nilitsy tagnatin'ny sambo-fiara. ¹⁴ Sady rozy nilitsy niaraky tamin'ireo bibi-dia isan-karazany iaby, voho gny biby fihary isan-karazany, voho gny raha mikasiky amy gny tany isan-karazany, sady gny karazam-boro isan-karazany iaby, voho reo zava-managnay managn'elatry kiraikiraiky isan-karazany. ¹⁵ Avy kiroekiroe teo amin'i Noa iaby manam-porofogn'ay isan-karazany sady nilitsy tao amin'ilay sambo-fiara. ¹⁶ Reo biby zay nilitsy tao la lahy voho gny vavy isan-karazany iaby, nilitsy tao rozy araky zay nandidian-Dranagnahary azy. Bakeo Iaveh nagnily gny varavagna lafa tafilitsy rozy. ¹⁷ Bakeo la avy teto an-tany nandritra gny efapolo andro gny safo-drano, sady nitombo gny rano ka nanainga ilay sambo-fiara voho nampiakatsy azy ho eo ambonin'ny tany. ¹⁸ Feno rano tanteraky gny tany, ka nitsangevaeva tegny agnabony rano lay sambo-fiara. ¹⁹ Nisondrotsy be teo amy gny tany gny rano ka feno iaby reo tendrombohitsy abo ambanin'ny lagnitsy. ²⁰ Nandilatsy folo limiamby metatsy tamy gny tampon'ny tendrombohitsy gny rano. ²¹ Maty iaby reo zava-managnay zay nirerirery tety ambony tany: reo voro, reo biby fihary, reo bibi-dia, voho reo zava-managnay ze niay tety an-tany, sady gny olombelo iaby. ²² Reo zava-managnay iaby niay teto amboniny gny tany miay gny fofognay iaby amy gny vorony, la maty. ²³ Noho zay, la ringa iaby reo zava-managnay tety ambony tany, hatramin'ny olombelo ka hatramy gny biby fihary, voho reo biby mikasiky, sady gny habakabaky. ringa tety ambony tany rozy iaby. Noa voho reo zay nisondry taminy tao agnatin'ilay sambo-fiara ro sisa tavela. ²⁴ Tsy nihena tamboniny tany nandritsa gny dimampolo zato andro gny rano.