¹ Lafa nanomboky nahamaro teto an-tany gny olombelo sady niteraky anaky ampela lako, ² la jerin'ny zanakin-Dranagnahary fa nampagniry gny anaky ampelan'ny olombelo. Nangalaky valy ho an-drozy, na ia ia nofiliny tamin-drozy. ³ Hoy Iaveh:"Tsy hipetraky amy tany gny olombelo mandrakizay gny 120 tao rozy." ⁴ Teto amboniny gny tany olo beveta tamin'io andro io, sady tafaran'io koa. Io ro nitranga lafa nanambaly reo anaka ampelan'ny gn' olombelo reo zanakin-Dranagnahary, sady niteraky tamin-drozy. Reo ro lehilahy mahery taloha, lehilahy nalaza. ⁵ Jerin'i Iaveh fa bevata gny faharatiany gny olombelo teto an-tany sady gny fisagnan-drozy iaby la raty avao. ⁶ Nanegny tamy gny nahariany gny olombelo teo an-tany Iaveh, sady nisosotsy gny fony. ⁷ Ka hoy Iaveh :" haringako hiala eo ambony gny tany gny olombelo zay nihariko, na gny olombelo na reo biby bevata, voho reo raha mikasika sady reo voro gny habakabaky, fotony nanegny Aho namoro an-drozy. " ⁸ Fa Noa koa nahita sitraky teo imason'i Iaveh. ⁹ Zao ro tantara mahakasiky, gnan'i Noa. Noa lehilahy la to, sady tsy nisy tsiny teo amy gny androny. Noa la nandeha nisondry tamin-Dranagnahary. ¹⁰ Niteraky anaky lahy telo i Noa: Sema, Hama, voho Jafeta. ¹¹ Simba teo agnatrehan-Dranagnahary gny tany, sady feno heriloa. ¹² Jerin-Dranagnahary gny tany, sady ingo, simba iaby, fotony nanimba gny lalan-drozy teo ambony gny tany gny nofo iaby. ¹³ Hoy Ndranagnahary tamy Noa hoe:"Jeriko fa andro hamoteako gny nofo iaby zao, fotony feno heriloha amy gny alalan-drozy gny tany. Haringako miaraky amy tany vatany rozy. ¹⁴ Manova sambo-fiara, natao tamin'ny hazo kypreso ho gnanao. Asio efitra ao agnain'ilay sambo-fira, sady asio dinty ao agnainy voho gny ambalik'izay. ¹⁵ Zao ro fomba hagnamboaranao gnazy: telonjato hakiko gny halavan'ny sambo-fiara, dimampolo hakiho gny sakany, sady telopolo metatsy gny hahabony . ¹⁶ Asio tafo gny sambo-fiara, sady vitao amy gny metatsy raiky baka agnabo agny, Asio varavagna gny ilan'ny sambo-fiara sady asio tokantanin-tsambo ambany,faharoe voho gny fahatelo. ¹⁷ Mijanjigna,fa marikitry handay gny safo-drano egny ambony gny tany Aho,mba hamotiky gny nofo iaby amboniny gny tany. ¹⁸ Kanefa hagnory gny fangnekeko aminao Aho.Ho avy ao amin'ny sambo-fiara nareo, voho reo, sady gny valinao voho reo vinantonao. ¹⁹ Amy gny zava-managnay iaby amy gny nofo iaby, la tsy maintsy hagnandesa roe isaky gny karazany ao agnaty sambo-fiara, mba hitanjahan-drozy ho velo miaraky aminao, na lahy na vavy ²⁰ Reo karazam-boro iaby, sady gny karazan'ny biby bevata iaby, gny karazan'ny raha mikisaky amy gny tany iaby , la hamonjy anao iaby gny roe amy karazany ,velomo rozy. ²¹ Ahorogno ho gnanao iaby gny karazan-kany iaby zay fihany sady hajario voho gnan-drozy." ²² Ka la nataon'i Noa zay nandidian-Dranagnahary azy ro nanovany gnazy .