¹ Bakeo, la nampikaiky gnan-drozy anakilahiny Jakoba, voho nisafa hoe: " Mivoria, nareo, mba hagnambarako aminareo gny raha hisy aminareo afara agny. ² Mivoria ndraiky mijanjigna, nareo anakilahin'i Jakoba. Janjigno Israely, ranareo. ³ Iha Robena, iha ro talagnolo, gny maheriko, ndraiky voalohan-keriko, ro miavaky gnany gny fagneva, voho miavaky gnany fahefa. ⁴ Mandroandroatsy manahaky gny rano mandeha mare, ro tsy hahazoanao gny lohany, fotony, niakatsy tagnabo fandrian-dranao iha. Bakeo linotonao zay; niakatsy ta-pandriako teo iha. ⁵ Simeona noho Levy mpirahalahy. Gny raha fialia an-keriny ro ho meson-drozy. ⁶ Gny fagnahiko, ka militsy amy gny filan-kevi-drozy; ka militsy amy gny fivorian-drozy, bevata mare gny voninahitsy gny foko laha amizay. Tagnatiny gny helon-drozy ro namonoan-drozy olo. Tamy gny fahasakia ro nangalan-drozy aomby. ⁷ La hozogny gny helo-drozy, fa raha raty zay, ndraiky gny haromotan-drozy, fa loza bevata zay. Hizara gnan-drozy agny amin'i Jakoba zaho, voho haparitako rozy agny amin'i Israely. ⁸ Iha Joda, hagnavohavo gnanao rahalahinao reo. Ho am-bozon-drozy rafenao gny tagnanao. Hiankoahoky an-katrehanao eo, rozy anakilahin-dranao. ⁹ Joda la anaky gny liona. Iha anakilahiko, niakatry tany gny fijanjignanao iha. La niondriky ie, noho tinanjany gny fignafignany, manahaky gny vaviny gny liona. Ia moa ro hahasaky hamoha gnazy? ¹⁰ Gny tehim-panjaka, tsy henga amin'i Joda. ndra gny tehin-drozy mpandily agnelagnelan-tombony, traky hiavian'i Silo. La hagnenky gnazy gny tany. ¹¹ Nandrohy gny borikiny tam-boaloboky teo , ndraiky gn'ana-borikiny tamy voaloboky voajabo, nandriry gny salony tagnatiny gny divay ie, voho gny salony lava tagnatiny gny lion-boaloboky. ¹² Ho maiky manahaky gny divay gny masony, voho ho foty manahaky gny ronono gny hiny. ¹³ Hipetraky magnolotsy gny riaky, Zebelona. Ho fitolaham-tsambo ie, voho sikala agny Sidona gny faritsy gny taniny. ¹⁴ Isakara ro boriky henja, mandry am-pagnivoany gny valan'aondry. ¹⁵ Mahita tany hiala tsiotsioky soa noho tany soa ie. Haondriny gny sorony ho amy gn'enta mavesatsy voho ho gnany gn'asa. ¹⁶ Dana, ro hisara gn'olo manahaky gny raiky amy gny tarihan'i Israely. ¹⁷ Dana ro ho bibilava marine-dala, bibilava misy poizy an-dala eo, magnehitsy gny tombon-tsoavaly, ka hiravoky gny mpanday gnazy. ¹⁸ Mandigny gny fandombanao zaho Yaveh. ¹⁹ Gada__hanafiky gnazy gn'ilany fe hanafiky gnan-drozy amy gny ratsam-tombo-drozy ie. ²⁰ Ho soa gny hanin'i Asera, voho ie ro hamaha gny hanim-piny gny mpanjaka. ²¹ Naftaly ro ho vavin-diera hinaha biby soa volo ie ²² Josefa ro tarehan-bokatsy, tariham-bokatsy mariny lohatao, gny sampany ro magnaniky mandilatsy gny vola. ²³ Rozy mpitoraky voloso ro hanafik'azy ndraiky hitifitsy gnazy voho hampijaly gnazy. ²⁴ Fe, gny volosony ro ho henja, voho gny tagnany ro hahay hanao noho gny tagnany gny andrarangin'i Jakoba, noho gn'agnarany gny mpiarak'aondry, gny lafihan-baton' Israely. ²⁵ Gny Ndranagnahary gny ranao ro hagnampy gnanao, voho Ndranagnahary raiky avao hitaky gnanao amy gny fandomban-dagnitsy agnabo, gny fitahiany gny laliky, zay nandry ambany, voho gny fitahian-tratra ndraiky gny troky. ²⁶ Gny tsipi-ranon-dranao ro bevata, noho gny tendrony gny vohitsy taloha, ndra gny raha iriny gny hahabo taloha. Ho an-dohan'i Josefa eo iaby rezay, la amy gny satro-boninahitsy gny printsin-drozy rahalahiny. ²⁷ Benjamina ro alika kapiky mosare. Amy gny maray, hihina gny haza ie, voho gn'amy hariva, hizara andevo ie." ²⁸ Rozy ro tariha folo roambiny gny Israely. Izay gny raha nisafagnin-dran-drozy tamin-drozy, lafa nitsipi-rano gnan-drozy ie. Gny kiraikiraiky iaby, la nitsipazan-drano tamy gny tsipi-rano tandrify iaby. ²⁹ La nandily gnan-drozy ie voho nanao tamin-drozy hoe: " Fa handeha agny amy oloko zaho. Alevegno misondry amin-dro razam-beko ao an-dolo, ao amy baibon'i Efrona Hetita zaho, ³⁰ ao an-dolo ,ao amy gny baibon'i Makpela, zay mariny gnan'i Mamre ao amy gny tany Kanana, gny baibo vinilin'i Abrahama, ho tany fandevegna tagny amin'i Efroma Hetita. ³¹ Tao ro nandevegnan-drozy gnan'i Abrahama, noho Saraha valiny; tao gny nandevegnan-drozy gnan'i Isaka noho Rebeka valiny; voho tao koa ro nandevegnako gnan'i Lea. ³² Gny baibo ndraiky gny lolo, tagnatin-gny zay tao, la vinily tamy gn'olon'i Heta. ³³ Lafa nivitan'i Jakoba tamin-drozy anany, lily zay, la navokiny gny tombony am-pandrea egny ,la nangalaky gn'ainy ie, voho roso nagnagny aminy gn'olony.