¹ La malahelo mare Josefa ka la niankohoky tamin-drany teo, voho nitagny tagnaminy teo, noho nagnoroky gnazy ie. ² Nandily gny radoko ,panompony Josefa, mba hagnosotsy raha magnitsy gnan-drany. La nagnosotsy raha magnitsy gnan'i Israely rozy radoko. ³ Nangalaky efapolo andro rozy, fa zay gn'androny gny fagnosora. Nitagny gnazy tagnatiny fitopolo andro rozy Egyptiana. ⁴ Lafa tapitsy gn'andro fiojogna, la nisafa tan-tragnon'i Farao tao Josefa, ka la nisafa hoe: " Laha mba fa nahita hasoava tan-katrehanareo zaho, mba safagno lahy Farao hoe:' Fa nampifanta gnahy gny rako, nisafa hoe: " Ingo, fa ho maty zaho. Halevinao an-dolo, zay fa hinaliko ho gnahy agny amy gny tany Kanana zaho. Agny ro handevegnanao gnahy." Henanizao, engao zaho lafa bakeo." ⁶ La namaly Farao hoe: " Ndagny voho alevegno gny ranao, laha gny nampifantany gnanao." ⁷ Niakatsy handevy gny rany Josefa. Nisondry taminy koa gny mpandilin'i Farao iaby, gn'olo agnabo tan-dapa tao, voho gny beny gny mpandily iaby amy gny tany Egypta, ⁸ Rehitsy gny tarihan'i Josefa voho rozy rahalahiny iaby, sady gny avorohotan-drainy. Fa reo anany, reo aondry aman'osy, sady gny ombin-drozy kosa ro navela tao amin-gny tany Gosena. ⁹ Nisondry taminy avao koa reo kalesy voho reo mpiataingin-tsoavaly. La vahoaky maro be zay. ¹⁰ Lafa niavy tamin'i Goren-atada ampitan'i Jordana rozy, la niojo mare ndraky la malahelo bevata rozy. Niojo fito andro ho gnan-drany teo Josefa. ¹¹ Lafa nihitan-drozy mpanompony gny tany, Kananita, gny fiojogna teo am'i Goren-atada, la hoy rozy hoe:" Zao gn'andro la vatany mampalahelo gnan-drozy Egyptiana."Izay gny nahavy gny tany hoe Abela. Mizraina, zay agnolotsy Jordana ao. ¹² La nataon-drozy anakilahin'i Jakoba, ze raha nadilia gnan-drozy. ¹³ Linanjan-drozy anakilahiny nagnagny amy tany Kanana ie, voho nalevin-drozy tao amy gny lavaky vato tan-baibon'i Makpela, mariny gnan'i Mamre. Kinalon'i Abrahama ho tamy fandevegna gny lavaky gny vato tagnatiny baibo io tao. Kinalony tam'i Efroma hetita zay. ¹⁴ Lafa vinitany gny levegna gnan-drany, la nimpoly tagny Egypta, Josefa, ie, rekitsy gny rahalahiny, voho rozy iaby ze nisondry tagnaminy, mba handevy gny rany . ¹⁵ Lafa nihitany gny rahalahin'i Jozefa fa nimaty gny baban-drozy, la hoy rozy hoe:" Manao akory laha mbo mitan-keloky amintsika Jozefa voho hamaliky amintsika amy gny raha raty iaby nataontsika taminy ? ¹⁶ La nandily gny fagnatreha gnnan'i Jozefa rozy, nisafa hoe:" Fanagnome lily gny babanao talohany gny nahafaty gnazy, nisafa hoe:" ¹⁷ Safagno am'i Jozefa zao:" Magnafaha lahy gny fandikan-daly raty ndraky gny haratian-drozy rahalahinao tamy gny raty nataon-drozy taminao."Ka henanizao, la magnafaha lahy gny mpanompon-Dranahary gny babanao." Laha vo nisafa gnan'izay Jozefa tamin-drozy, la nitagny. ¹⁸ Roso avao koa rozy rahalahiny noho nagnohoky gny vatan-drozy teo. Hoy rozy hoe:" retoy rahay mpanomponao." ¹⁹ Namaly gnan-drozy Josefa hoe:" Ka mavaka. Sa amy gny toeran-Dranagnahary va zaho? ²⁰ Nareo ro, nihevitsy gnan'izay amy gny soa, mba hiarova gnain'ny gn'olo maro, laha gny hitanareo henanizao . ²¹ Henanizao, ka mavaka. Zaho ro hamaha gnanareo voho gny aja malinikareo." Nagnafatratsy gnan-drozy manahaky gnan'izay ie, noho nisafa tamy gny hatea tamy gny fon-drozy. ²² Nipetraky tagny Egypta tagny Josefa, rekitsy gnavorohotan-drozy. Nivelo tagnatiny zato noho folo tao ie. ²³ Nihitan'i Josefa gn'anak'i Efraina sikala amy gny tarihany fahatelo. Nahita gn'anak'i makira anakilahin'i Manase avao koa ie, zay nalan'i Josefa. ²⁴ Hoy Josefa tamin-drozy rahalahiny hoe:" Fa ho maty aho, fe ho avy aminareo vatany Ndranagnahary voho hisondry aminareo, hiala amy tany toy eto, ho agny amy gny tany, zay nifantany fa hamea gnan'i Abrahama, Isaka, voho Jakoba." ²⁵ La nampifanta fifantagna gnan'ny gn'olon'i Israely Josefa. Hoy ie hoe:" Ho avy aminareo vatany Ndranagnahary. Amin'izay andro zay la handesinareo henga eto gny taolako." ²⁶ La nimaty Josefa, lafa 110 tao. Nosoran-drozy raha magnitsy voho napetraky tagnatiny gny hazom-paty tagny Egypta ie.