¹ Niongaky nanomboky tamizay Israely, nanday gny fanagnany iaby, voho nagnagny Beri-sheba. Tao, ro nagnaterany fagnatitsy ho gnan- Dranagnarin' Isaka rainy. ² Nisafa tamin' Israely tagnatiny gny fahita Ndranagnahary, tamy gny haly, nisafa hoe: " Jakoba, Jakoba". Hoy ie hoe: " Intoy aho". ³ Hoy ie hoe: " Zaho ro Ndranagnahary, Ndranagnaharin-dranao. Ka mavaka gny hizotso magnagny Egypta, fa Zaho ro hanao gnanao tana bevata agny. ⁴ Zaho ro hisondry aminao, hizotso magnagny Egypta, voho zaho ro handay anao himpoly hiakatsy, voho gny tagnan'i Josefa handreny gny masonao amy gny tagnany. ⁵ Nenga bakao Beri-sheba Jakoba. Nandesin-drozy anany Jakoba ran-drozy, voho gny valin-drozy, tamy gny katraka zay nalefan'i Farao, mba hagnandesa gnan-drozy anak' Israely. ⁶ La nandesin-drozy iaby gny biby harin-drozy noho gny fanagnan-drozy, ze fa niazon-drozy tamy tany Kanana eo tao. La nilitsy rozy tao Egypta, miaraky amin'i Jakoba rekitry gny tarihany iaby. ⁷ Nandesiny nisondry taminy, tagny Egypta rozy anakilahiny voho gny zafiny johary; gn'anakapelany gny zafiny ampela, ndraiky gny tarihany iaby. ⁸ Reto iaby gn'agnarany gn'anak' Israely, zay niavy tagny Egypta, Jakoba rekitsy gn'anany: Robema, talagnolon'i Jakoba; ⁹ rozy anak'i Robema, hanoka noho Palo voho Hezrona noho Karmy; ¹⁰ rozy anak'i Simeona, Jemoela, Jamina, Ohada, Jakina, Zohara, noho Saoly, rozy anakalahiny gn'ampela Kananita; ¹¹ rozy anakilahin'i Levy: Gersona, Kehata, Merary. ¹² Rozy anakilahin'i Joda: Era, Onana, Sela, Fareza, noho Zera (fe Era noho Onana nimaty tagny amy tany Kanana). Rozy anakilahin'i Fareza: Hezrona voho Hamola. ¹³ Rozy anakilahin'i Isakara la i Tola, Pova, Joba, sady Simrona; ¹⁴ Rozy anakilahin'i Zebolona la Sereda, Elona, noho Jahalela. ¹⁵ Rozy ro anakilahin'i Lea, naterany tamin'i Jakoba tagny Padana-Arama, noho Dina anakapelany. Telopolo teloamby gn'anakilahiny noho gn'anakapelany. ¹⁶ Rozy anakilahin'i Gada la I Zifiona, Hagy, Sony, Ezbona, Ery, Aroda, sady Arely. ¹⁷ Reo anakilahin'i la Jimna, Jisva, sady Beria; voho i Sera ro anabavin-drozy . Rozy anakilahin'i Beria la Hebera voho Malkiela. ¹⁸ Reo ro anakilahin'i Zilpa, zay nomen'i Labana an'i Lea anakampelany. Reo ro anakilahy naterany tamin'i Jakoba__enina ambin-gny folo ro fitambarany. ¹⁹ reo anakilahin'i Rahely valin'i Jakoba la Josefa voho Benjamina. ²⁰ Latsak'anaky tamin'i Asenata anakapelan'i Potifara mpitankazo manga tao Ona, Josefa tagny Egypta. ²¹ Rozy anak'i Benjamina la Bela, Bakera, Asbela, Gera, Namana, Ehy, Rosy, Mopima, Hopima, voho Arda. ²² Rozy ro anak'i Rahely naterany tamin'i Jakoba, folo efatsamby gn'isany. ²³ Gn'anakilahin'i Dana, Hosima. ²⁴ Rozy anakilahin'i Naftaly la Jaziela, Gony, Jezera noho Silema. ²⁵ Rozy ro anaky nateran'i Jakoba tamin'i Bila, zay namean'i Labana gnan-dRahely anany__ fito vavy gny fitambarany. ²⁶ nRozy nagnagny Egypta nisondry tamin'i Jakoba, zay tarihany; laha tsy isaky rozy valiny gn'anakilahiny, la enimpolo enignamby gny fitambarany. ²⁷ Fitopolo gn'isany gny tarihany nagnagny Egypta, tagnatiny zay tao iaby, gn'anakilahin'i Josefa roe, zay naterany tagny Egypta. ²⁸ Nalefan'i Jakoba talohany Joda, handeha alohany, mba hanoro lala gnazy magnamin'i Josefa agny, ho agny Gosena; la niavy tagny amy tanin'i Gosena rozy. ²⁹ Nagnetsiketsiky gny katrakany Josefa, vohoroso niakatsy, nanegnategna gnan' Israely rany. La nitany ie, rinakony gny vozony, voho nitagny ela tambozony teo ie. ³⁰ Hoy Israely tamin'i Josefa hoe: " Engao zaho ho maty amizay, fotony, fa nahita vata gnanao zaho, fa mbo velo iha." ³¹ Nisafa Josefa tamin-drozy rahalahiny noho gny tarihan-drany hoe: " Hiakatsy zaho voho hisafa amin'i Farao, ka hisafa hoe: ' Fa avy amiko aoty gny rahalahiko voho gny tarihan-drako, zay tagny amy gny Kanana. ³² Mpiarak'aondry lihy reo, fotony, rozy ro mpamaha gny biby haren-drozy. Nandesin-drozy gn'aondry rekitsy gn'aosy, ndraiky gn'aombin-drozy, voho gny raha iaby nanagnan-drozy' ³³ Ka laha mikaiky gnanareo Farao noho magnotany hoe: " Ino gn'asanareo?' ³⁴ Hamaly nareo hoe: ' Gny mpanomponao, fa mpamaha biby hary leny nahakely gnanay traky henanizao, rahay voho gny razanay.' Zay gn'atao, mba hahazoanareo mipetraky amy tanin'i Gosena, fotony, raty amy Egyptiana gny mpiarak'aondry iaby."