¹ La tsy nahata gn'ainy Josefa tan-katrehan-drozy, mpanompony, nitranga tagnilany teo. La nisafa mare ie hoe: " Menga iaby nareo". La tsy nisy mpanompo nijano gny taminy teo; lafa Josefa ro nagnambara vata tamin-drozy ralahiny. ² La nirohadrohaky gny tagny ie, ka jan-drozy Egyptiana zay; voho jan-drozy tan-tragnon'i Farao tao. ³ Hoy Josefa tamin-drozy rahalahiny hoe: " Zaho ro Josefa. Mbo velo va gny babako? La nizehatry rozy rahalahiny, ka la tsy nisy ho safagny, fotony; nangitikitiky rozy ndraiky tseriky. ⁴ Bakeo, nisafa tamin-drozy rahalahiny Josefa hoe: " Mihariniha gnahy nareo." La nihariniky gnazy gny rahalahiny. Hoy ie hoe: " Zaho ro Josefa rahalahinareo navilinareo tagny Egypta. ⁵ Ka malahelo ndraiky ka meloky amy gny vatanareo gn'amy namarota gnahy tatoy, fotony; Ndranagnahary ro nandefa gnahy alohanareo mba ho voaaro gn'ainareo. ⁶ Fotony, tamy tany toy telo zay gny mosary, tagnatony roe tao; noho mbo hisy limy tao, zay tsy hisy fambolea ndraiky gny famokara. ⁷ Ndranagnahary ro nagniraky gnahy talohanareo, fotony, hitanjaky gnahareo, mba tsy ho lany an-tany eto; voho hitanjaky gnanao, ho velo amy gny fahafaha bevata. ⁸ Sady noho izay tsy nareo ro nandefa gnahy taty fa Ndranagnahary, sady ie nanao gnahy ho rain'i Farao, tompon-gny tragnony iaby, voho mpanampaka gny tany iaby manera an'i Egypta. ⁹ Masika noho ndagny amin-drako agny, voho safagno aminy hoe: ' Zao gn'ambarany gn'anakao Josefa: " Nataon-Dranagnahary, mpandily gnan'i Egypta iaby aho. Mizotsoa amiko atoy, fa ka mandigny andro. ¹⁰ Hipetraky amy gny tanin'i Gosena iha ka ho agnilako eo, iha retsiky gn'anakao, noho gn'anaky gn'aosy ndraiky gn'aomby, rekitsy gny fanagnanao iaby. ¹¹ Zaho ro hamaha gnanreo, fotony, mbo haharitsy limy tao gny mosary, mba tsy ho avy aminareo gny halatsy, aminao, noho gny tokantragnonao, ndraiky gny fanagnanao iaby."' ¹² Ingo, la hitany gny masonareo vatany, noho gny mason'i Benjamina rahalahiko, fa gny tsihoviko ro misafa aminareo. ¹³ Ho safagniko amin-drako gny momba gny voninahitso, atoy Egypta; voho gny raha iaby ze hitany gny masonareo. Ndagny, masika nareo, voho andeso mizotro atoy gny rako." ¹⁴ Rinakony gny vozon'i Benjamina rahalahiny, ka nitagny ie; voho Benjamina nitagny tan-bozony teo koa. ¹⁵ Norofany iaby gny rahalahiny iaby, voho nitagny tamin-drozy teo ie. Tafaran'izay, la nisafa taminy rozy rahalahiny. ¹⁶ La nambara tan-tragnan'i Farao tao gny vaovao hoe: " Avy gny rahalahin'i Josefa". La nazoto ndraiky nisinisiny Farao rekitsy gny mpanompony, laha nahaja gnan'izay. ¹⁷ Hoy farao tamin'i Josefa hoe: " Safagno amin-drozy rahalahinao hoe: ' Zao gn'atao: aondrano gn'enta handesiny gny bibinareo, voho roso magnagny amy tany Kanana. ¹⁸ Andeso gny ranareo, noho gny tokantragnonareo voho mandena amiko atoy. Hameako gnanareo gny raha soa an-tanin'i Egypta etoa, voho nareo hihina gny soa amy tany toy eto.' ¹⁹ Voho homean-dily nareo hoe: 'Zao gn'atao, mangala katraka amy tany egypta ho gnan-gny gn'anakareo voho gny valinareo. Andeso gny ranareo, voho mandena atoy. ²⁰ Ka misantsa gn'amy fanagnanareo, fa gnanareo ze soa an-tany eto iaby, ketriketrik'i Egypta."' ²¹ La nataon-drozy anak' Israely zay. Nagnome katraka gnan-drozy Josefa, laha gny fandilian'i Farao; voho nagnome gnan-drozy vatia, handesy amy lala egny. ²² Nameany salotsy hagnovan-drozy, rozy iaby; fe Banjamina koa, nameany sekely volafoty telonjato voho salotsy limy hagnovany. ²³ Zao gny fapaitsy nalefany ho gnan-drany" Lahin-boriky folo, nanday gny raha soan'i Egypta; voho vavim-boriky folo nanday vary noho mofo; voho vatia hafa koa ho gnan-drany, handesy an-dala egny. ²⁴ La nalefany gny rahalahiny, ka la roso rozy. Hoy ie tamin-drozy hoe: " Ao ndreo tsy hifanditsy lafa an-dala egny." ²⁵ La niakatsy baka Egypta tao rozy, ka la niavy tagny amy tany Kanana, tagnamin'i Jakoba rany. ²⁶ nNisafa taminy hoe: " Mbo velo Josefa, noho ie ro mpandily gny tany Egypta iaby." Nanintsy gny fony, fotony, tsy nagnenky gny raha nisafagnin-drozy ie. ²⁷ Nisafagnin-drozy taminy iaby, gny safa nambaran'i Josefa tamin-drozy. Laha nihitan'i Jakoba gny katraka nalefan'i Josefa mba hagnandesa gnazy, la nivelo ndraiky gny fagnahin'i Jakoba ran-drozy. ²⁸ Hoy Israely hoe: " Fa soa zay. Mbo velo anako igny Josefa. Handeha zaho voho hanenty gnazy, alohany gny hahafaty gnahy.