¹ Nandily gny mpanao asa tan-tragno tao Josefa, ka nisafa hoe: " Feno hany gny sakin'ireo johary reo, ze ho leon-drozy; voho ataovo agnaty sakiny gny dralan-drozy iaby. ² Ataovo am-bavan-tsakiny gny zain-drozy mare, gny kapoako, kapoaky volafoty igny, noho gny dralany tamy vary igny." La nataon'igny mpanao asa an-tragno igny, ze raha nisafagnin'i Josefa. ³ Loaky gn'andro, voho nenga handeha lihy reo, rozy rekitry gny borikiny. ⁴ Lafa niboaky tana eo rozy, fe mbo mariny, la nisafa tamy gny mpanao asa an-tragno tao Josefa hoe: " Fohava, oriho lihy regny, voho lafa tratsinao rozy, safagno hoe: " Nagnino nareo ro mamaly raty gny soa? ⁵ Ka tsy kapoaky inoman-gny tompoko igny toy, noho kapoaky ampiasany amy gny faminaniany? Nanao raty nareo, zay raha nataonareo zay."' ⁶ La nahatratsy gnan-drozy lehe mpanao asa an-tragno igny voho nisafa tamin-drozy, safa regny. ⁷ Nisafa taminy rozy hoe: " Nagnino lahy manao safa manahaky an'izao gny tompony? Faly gny mpanomponao, gny hanao raha manahakan'izao. ⁸ Ingo, gny drala nihitanay tambavany gny sakinay, nandesinay, nimpoly taminao tagny ndraiky, zay baka an-tany Kanana agny. Amy manao akory, ro ho nangalaranay gny volafoty na gny volamena tan-tragnony gny tompoko tao? ⁹ Ze ahatrara gnan'izay amin-drozy mpanomponao, la engao ie ho maty, voho rahay koa ho andevony gny tompoko." ¹⁰ Lay mpanao gn'asa tan-tragno tao igny, misafa hoe: " Ndao fa horihy gny safanao. Ze raiky ahatrara kapoaky igny ro ho andevoko, noho nareo hafa koa hafahy." ¹¹ Bakeo, la nandeha malakilaky gny lehilahy kiraikiraiky, ka nametraky gny sakiny tan-tany teo, voho samby nanokatsy gny sakiny iaby. ¹² La nisava igny mpiandraikitsy gny fampilira vahiny igny. Nafotony bakamy gny zoky mare, voho gny farany tamy gny faran-jaza; la nihita tan-trakin'i Benjamina tao gny kapoaky igny. ¹³ La tinatatatan-drozy gny salon-drozy. Samby nanganiky tagnabony gny borikiny, gny johary kiraikiraiky, noho nimpoly tamy tana eo tagny. ¹⁴ Roso Joda, tan-tragnon'i Josefa tao, ndraiky gny rahalahiny. Mbo tagny ie, voho niankohoky tan-katrehany tan-tany teo rozy. ¹⁵ La hoy Josefa tamin-drozy hoe: " Ino koahy raha nataonareo zao? Va tsy hainareo, fa gny lehe manahaky gnahy zao ro manao gny faminania?" ¹⁶ Nisafa Joda hoe: " Ino gny raha hosafagninay tompoko? Ino gny raha azonay safagny? Manao akory, gny hagnamaignanay gny vatanay? Hitan-Dranagnahary gny hadisoany gny mpanomponao. Ingo, la fa andevony gny tompoko rahay, rahay noho ie nahatrara kapoaky tan-tagnany tegny." ¹⁷ Hoy Josefa hoe: " Faly gnahy gny hanao gnan'izay. Ze lehe nahatrara kapoaky tan-tagnany tegny igny, ro ho andevoko; fa nareo hafa koa, ro hiakatsy am-piadagna ho amy babanareo agny." ¹⁸ Bakeo amizay, la sinizik'i Joda mariny ie, ka nisafa hoe: ' Ragnandria, engao hisafa raha raiky an-tsafony gny tompoko gny mpanomponao, voho gny helokao la hirehitsy amy mpanomponao, fa iha manahaky gnan'i Farao. ¹⁹ Nagnontany gny mpanompony gny tompoko, nisafa hoe: " Manadra va iha, ndraiky rahalahy raiky?' ²⁰ La hoy rahay tamy tomponay hoe: " Manan-dra rahay, nahoda antitsy, noho anaky raiky amin'ie antitsy io. Fa gny rahalahiny, fa nimaty; la ie raiky avao ro sisa tamin-dreniny, noho tia gnazy gny babany.' ²¹ Bakeo, nisafa tamy gny mpanomponao iha hoe: 'Andeso mizotso mizotso amiko ato ie, mba hahitako gnazy.' ²² Tafaran'izay, la nisafa tamy tompoko rahay hoe: " Tsy hagnenga gnan-drany zaza zay. Fa laha menga gnan-drany ie, la ho maty gny babany. ²³ Sady iha, nisafa tamy gny mpanomponao hoe: ' Laha tsy misondry miaraky aminao, gny faralahinareo, la fa tsy hahita gny vatako iha.' ²⁴ Ingo la niavy vatany zay lafa rahay niakatsy nagnamin-drako mpanomponao tagny; la nisafagninay taminy ,gny safa nisafagniny tompoko. ²⁵ Hoy gny babany hoe: " Ndagny ndraiky, mikaloa hany ho gnantsika.' ²⁶ Bakeo amizay, la nisafa rahay hoe: ' Tsy mahazo mizotro agny rahay. Laha misondry aminay rahalahinay farany io, la hizotro rahay; fotony, tsy hahita gny vatan-gny lihy io rahay, laha tsy misondry aminay rahalahinay farany io' ²⁷ Gny mpanomponao tompoko, ro nisafa taminay hoe: ' La hainareo soa fa, niteraky johary roe tamiko gny valiko. ²⁸ Gny raiky tamin-drozy nenga gnahy, ka hoy zaho hoe:' La nihanim-biby vatany ie, ndraiky tsy nihitako ie traky henanizao." ²⁹ Laha nareo henanio, ro mangalaky raiky amiko eto, laha misy loza mahazo gnazy, la nareo ro handraraky gny volon-dohako reki-keloky, magnagny amy gny faty.' ³⁰ Laha izay, lafa zaho ro avy agny amy mpanomponao, laha tsy misondry aminay zaza io, fotony, mifamehy amy gn'ain'aja eo gn'ainy, ³¹ La ho avy zay, laha hitany fa tsy misondry aminay zaza eo, la ho maty vatany ie. Gny mpanomponao, ro hagnitsa gny volo fotin-drako mpanomponao reko-keloky, magnagny amy gny faty. ³² Fotony, gny mpanomponao ro, nampiankigna aja eo tamin-drako, voho nisafa hoe: " Laha zaho ro mimpoly, ka tsy manday gnazy an-katrehanao eo, la hanan-kavoa tsy domo amin-drako zaho. ³³ Laha zao ie, engao lahy gny mpanomponao, hijano ho solon'aja ao; manahaky gn'andevony gny tompony, voho engao zaza eo, hisondry amin-drozy rahalahiny. ³⁴ Amy manao akory moa, ro handenako amy babako agny, laha tsy misondry amiko zaza io? Mavaka gny raha raty hahazo gnany babako zaho."