V 1 La nanjeky mare gny mosary tamy tany io. ² Zao gny raha nisy, lafa nilanin-drozy gny vary nandesin-drozy bakagny Egypta, hoy gny baban-drozy tamin-drozy hoe: " Ndagny ndraiky; ka mikaloa hany ho gnantsika". ³ Nisafagnanin'i Joda taminy hoe: " La namepetsy gnanay lihy zay hoe:"tsy hahita vata gnahy nareo,laha tsy misondry agnaminareo gny rahalahinareo." ⁴ Laha enganao hisondry agnaminay gny rahalahinay,la handeha hizotso ndraiky,hikalo hany ho gnanao rahay. ⁵ Fe, lafa tsy enganao hisondry agnaminay ie;tsy hizotso,handeha agny rahay.Fotony,lehe io nisafa tagnaminay hoe:" tsy hahita vata gnahy nareo,laha tsy misondry agnaminareo gny rahalahinareo." ⁶ La hoy Israely hoe: "Nagnino koahy nareo nampilitsy loza tamiko gny nivolagnareo tamin'ny lihy zay fa mana rahalahy hafa nareo?Hoy rozy hoe:"Namotopototsy laliky gny momba gnanay voho gny tarihanay lihy zao. ⁷ Hoy ie hoe:" mbo velo va gny babanareo?Mbo mana rahalahy hafa va nareo?ka la vinalinay araky ze tandrify gnazy gny fagnontaniany.akory moa gny ahaizanay gnazy fa,hisafa hoe:"Andesonareo bakao gny rahalahinareo?" ⁸ Hoy Joda tamin'Israely babany hoe:"Alefaso misondry agnamiko zaza io.Henga rahay ndraiky handeha,mba ho velo fa tsy ho maty tsika,rahay voho iha ndraiky gn'anakay koa. ⁹ Zaho gny miantoky gnazy. Zaho ro tanjano hiankignany.Laha tsy handesiko mimpoly agnaminareo eto ie, la engaonareo hidridriako gny havoa. ¹⁰ Laha tsy niela rahay zay, lafa nimpoly teto fagnindroe." ¹¹ Hoy Israely babany tamin-drozy hoe: " Laha zao ie, zao gn'atavo. Atavo an-kitaponao gn'ilany amy gny vokatry gny tany farany soa. Ndagny, noho magnandesa fagnomeza ho gnany lihy io:balsama noho tantely, raha magnitsy noho miora, kapiky noho amandy. ¹² Atavonareo maro gny drala an-tagnanareo egny. Gny drala nampoly tambavany gny sakinareo, andesonareo mimpoly an-tagnanareo egny ndraiky. Tsy noho hadisoa avao zay. ¹³ Andesonareo avao koa gny rahalahinareo. Miongaha, ka mandena ndraiky amy lihy io agny. ¹⁴ Ka ao, hangoankoahan-Dranagnahary avao nareo an-katrehany lihy io, mba hafahiny gny rahalahinareo hafa voho Benjamina ho aminao. Laha mionjo gnan-drozy anako aho, la mionjo vatany." ¹⁵ Nalan-drozy, nataon-drozy tamin'i Benjamina egny, gny fagnomeza, voho nanday drala maro tan-tagnan-drozy teny rozy. Roso rozy, ka nimpoly, nizotso tagny Egypta voho niseho magnatriky gnan'i Josefa. ¹⁶ Lafa nihitan'i Josefa, fa nisondry tamin-drozy Benjamina, la hoy ie tamy gny tompony gn'andraikitsy, mpandramby vahiny tan-tragnony tao hoe: " Ampiliro an-tragno rozy, lentao gny biby raiky voho ketreho zay; fa hiaraky hihina agnamiko rozy, lafa masaky zay." ¹⁷ La nataony gny mpanompo, ze raha nisafagnin'i Josefa. Nandesiny tan-tragnon'i Josefa lihy regny. ¹⁸ Navaka rozy, fotony, rozy nandesy tan-tragnon'i Josefa tao. Ka hoy rozy hoe: " Noho egny nampoly tagnaty sakintsika tao taloha egny, ro nampilira gnantsika tato; soa hahahiany magnararaotsy antsika. Vasa hanamboatsy gnantsika, voho hagnandevo gnantsika ie, noho hangalaky gny borikintsika." ¹⁹ Vinonjin-drozy mpanompon'i Josefa agny; voho nisafa taminy tambaravagna teo, ka nisafa hoe: ²⁰ " Ragnandria, la niavy tatoy rahay tamy voalohany, mba hikalo hany. ²¹ Lafa rahay ro niavy tamy tany nitolahanay, ka nanokatsy gny sakinay; la ingo, samby tambavany gny sakinay kiraikiraiky iaby, gny drala; la mbo tsy nisy pitotsy gny dralanay. Fe nampolinay, noho an-tagnanay eto zao. ²² Mbo nanday drala hafa avao koa rahay, hikaloa hany. Tsy hainay gn'olo nampimpoly gny dralany tantsakinay tao." ²³ Ka hoy mpanompo igny hoe: " Ho aminareo gny fiadagna, ka matahotsy. Gny Ndranagnaharinareo noho gny Ndranagnahariny rinambiko gny dralanareo." La nandesin-gny mpanompo igny tamin'i Simeona teo rozy. ²⁴ Nampiliriny mpanompo igny tantragnon'i Josefa tao rozy. Nameany rano rozy, voho sinasan-drozy gny tombon-drozy. Noho finahany hany gny borikin-drozy. ²⁵ La nihetsiketsiky gn'aminy gny fagnomeza gnan'i Josefa rozy; fa ren-drozy, fa hihina ao ie. ²⁶ Laha niavy tantragno tao Josefa, la nandesin-drozy tan-tragno tao, gny fagnomeza; voho niondriky tan-tany teo rozy, tan-katrehany tao. ²⁷ La nagnontany gnan-drozy, momba gny fahasalaman-drozy ie, ka nagnontany hoe: " Tsy magnahy va gny ranareo, zay nahoda antitsy nisafagninareo igny? Mbo velo va ie?" ²⁸ Hoy rozy hoe: " Tsy magnahy gny mpanomponao zay babanay. Mbo velo ie. Niondriky ndraiky nandohaliky rozy. ²⁹ Laha vo nanenty ie, la nahita gnan'i Benjamina rahalahiny, anan-dreniny; ka hoy ie hoe: " Toy va zainareo lehilahy farany zao, nisafanareo tamiko igny?" La hoy ie: " Ndranagnahary ro hitahy gnanao lahy anako." ³⁰ Niboaky malaky baka angn'efitsy tao Josefa, fotony, lako mare gny fitsognany gnan-drozy rahalahiny. La nila tany hitagniany ie. Nilitsy tangn'efitsy tao ie, voho nitagny tao. ³¹ Sinasany gny vatany, ka niboaky ie. La tinindriny gny fony, nisafa hoe: " Alefaso amizay gny fihinana." ³² Nameany gny mpanompo gnan'i Josefa gn'anjarany voho gnany gny rahalahiny. Niaraky nihina taminy reo Egypta tao; fotony, gny Egypta, fafaly mijabo miaraky amy gny Jiosy; fotony, raha mampangoritsy gnan-drozy Egyptiana zay. ³³ Nipetraky tan-katrehany teo gny rahalahiny, gny talagnolo amy gny maha zoky gnazy, voho gny faran-jaza amy gny maha zay gnazy. La nitseriky lihy reo. ³⁴ Namean'i Josefa anjara tamy gny hany tan-katrehany teo rozy. Fe gn'anjaran'i Benjamina, indiminy gnan-drozy rahalahiny. La nino rozy, noho mazoto niaraky taminy.