¹ Lafa afaky roe tao soa, la nana nofy raiky Farao. Laha mbo nitsanga teo amin'i Neily ie. ² La ingo, nisy aomby fito vavy niboaky bakao amin'i Neily, soasoa noho vondraly, voho nihina mbeo amy sisiny. ³ Ingo, nisy aomby fito vavy hafa koa niboaky bakao amin'io Neily io ndraiky, raty volo noho boroka. Namonjy an'ireo aomby vavy hafa teo antsisin-gny renirano rozy. ⁴ Bakeo, aomby vavy boroka reo nihina gnan'ireo aomby vavy soa voho vondraky reo. Bakeon'igny nifoha Farao. ⁵ Nisaofin-droro ndraiky ie, ka la nagnonofy fagnin-droe. Ingo, nisy voam-bary fito nitiry bakamin-gny taho raiky, mamokatry voho soa. ⁶ Ingo koa nisy voam-bary fito hafa koa tafaran'ireo matify ndraiky kafony. ⁷ Voam-bary fito ka fony regny nihina gnan'ireo voam-bary soa noho vokatry reo. Nahatiaro Farao, hondy nofy raha rey. ⁸ Loak'andron'igny, nangorohoro Farao mbamy gny fagnahiny. Nagniraky voho nampikaiky gnan'ireo ambiasa noho olo mahay raha tao Egypta iaby ie. Nambaran'i Farao tamin-drozy gny nofiny, fe tsy nisy nahay nagnazava gny nofy tamy Farao rozy ndra raiky. ⁹ Gny beny gny mpitan-kapoaky nisafa tamy Farao hoe: " Henanizao aho vo mahatiaro gny hadisoako. ¹⁰ Neloky gny mpiasany Farao, ka nampilitsy gnahy tam-pigadra tao an-tragnony kapiteniny mpiamby, zaho voho gny beny gny mpamboatsy mofo. ¹¹ Samby nagnonofy rahay, tamin-draiky matognaly, zaho voho ie. Samby nana gny nofiny voho gny dikany iaby rahay. ¹² Nisy lehe raiky jiosy nisondry taminay tao, mpiasany gny Kapiteniny gny mpiamby. Nitantaragniny taminy gny nofinay, ka la nivolagniny iaby gny heviny. Nadikany kiraikiraiky taminay gny dikany nofinay. ¹³ Laha nandika gny hevits'ireo nofy taminay ie, Ingo ka la nisy vatany. Zaho nampolin'i Farao ndraiky tany gnasako, voho gny raiky namako nahanto." ¹⁴ Bakeo amizay, nagniraky ndraiky nampikaiky gnan'i Josefa Farao. Naboa-drozy masika bakao am-pigadra ie. La niboaky bakao ie voho nengnova salotsy ka nagnatriky gnan'i Farao. ¹⁵ Hoy gny Farao tamy Josefa hoe: " Nagnonofy aho, fe tsy nisy nahay gny heviny. Reko gny momba gnanao, fa lafa mahanja nofy iha, la hainao vatany gny magnazava gnazy. ¹⁶ Namaly Josefa ka la nisafa tamy Farao hoe: " Tsy agnamiko ato zao. Ndranagnahary ro hamaly gnan'i Farao ze sitra-po." ¹⁷ Hoy gny Farao tamy Josefa hoe: " Tagnatiny nofiko tao, ingo, nitsanga teo an-tsisin'i Heily aho. ¹⁸ Ingo, nisy aomby fito vavy niboaky bakao amin'i Neily, vondraky noho soa, voho nihina akata mbamy sisiny mbeo rozy. ¹⁹ Ingo koa, nisy aomby fito vavy hafa koa niboaky nagnarakaraky an'ireo, mahia noho boroka. Mbo nisy haratia manahaky gnan'izay aho, lafa atao hoe ketriketry gny Egypta. ²⁰ Aomby vavy mahia noho boroka reo nihina gnan'ireo aomby vavy vondraky voalohany. ²¹ Lafa lanin-drozy zay, tsy nisy nahay hoe, nihaniny gny aomby mahia reo, fotony, mbo raty manahaky gny taloha avao rozy. Bakeon'igny, la nifoha aho. ²² Nagnonofy ndraky aho, ka ingo, nisy voam-bary fito bakaminy gny taho raiky, vokatry mare noho soa. ²³ Tafaran'izay, ingo, nisy voam-bary fito hafa koa matify noho kafony. ²⁴ Natelin-drozy voam-bary matify noho kafony reo, gny voam-bary soa. Nitantaragniko tamin-drozy ambiasa ndraiky gny mahay raha zay, fe tsy nisy tamin-drozy gny mahay nagnazava gnazy tamiko". ²⁵ La hoy Josefa tamin'i Farao: " La mindry iaby gny nofin'i Farao. Raha hisy, hataon-Dranagnahary, nambara tamy Farao zao. ²⁶ Gny aomby fito vavy soa ro fito tao, voho gny voam-bary fito koa ro fito tao. La mindry vatany nofy reo. ²⁷ Gny aomby fito vavy mahia noho boroka izay niavy tafaran-drozy ro fito tao, voho gny voam-bary matify fito koa, ro fito taony gny mosaro. ²⁸ Izay gny raha nambarako tamy Farao. Gny raha hataon-Dranagnahary ro nambara tamin'i Farao. ²⁹ Ingo, gny fito taony gny halakoany gny vokatsy magnetriketreky gny taniny gny Egypta iaby. ³⁰ Lafa tampitsy zay, la hisy gny fito taony gny mosary, voho gny fahavokara iaby, la ho larony gny mosary gny tany iaby. ³¹ Ingo, la ho haligno ao aminy gny faritsy gny fahavokara, fotony, la ho haligno ao aminy gny tanin'i Egypta, noho ho larony gny mosary gny tany iaby. ³² Nimpolimpoly tamy Farao gny nofy, fotony, raha iaby hisy zao, la fa vinolavolan- Dranagnahary, noho tsy ho ela, la hataon-Dranagnahary iaby zay. ³³ Sady ao Farao hila olo manan-tsay ndraiky mahay raha, voho hametraky gnazy amy taniny gny Egypta. ³⁴ La eo gny Farao hanao an'izao: hanondro gny mpihany limy aminy tany Farao. Laha eo rozy hangalaky gny ampahany limy aminy gny vokatry gny Egypta aminy gny fito taony gny fahavokaram-bokatry. ³⁵ La amizay rozy, hamory gny hany iaby amin'io tao sao eo, zay ho avy io, ka la hagnajary gny vokatsy eo ambaniny gny fandilin'i Farao, ka reo ro ho hany ho gnan'olo maro. La ho tahirizin-drozy vatany zay. ³⁶ Gnhy hany ro hatao famatsia ho any gny tany, aminy gny fito taony gny mosary, zay ho aminy gny tany Egypta. Ka amizay hevitry zay ro tsy haharembony gny mosary gn'olo. ³⁷ Ingo, la soa vatany an-katrehan'i Farao ndraiky gny mpanompony iaby hevitsy zay. ³⁸ Hoy gny Farao tamin-drozy mpanompony iaby hoe: " La mbo hahita olo manahaka an'izao va tsika, zay misondry agnaminy gny fagnahin-Dranagnahary?" ³⁹ La hoy Farao tamin'i Josefa hoe: "Fotony Ndranagnahary ro nanoro gnanao, zay iaby zay, la tsy misy olo hafa mahataka-draha voho mahay raha manahaky gnanao zao. ⁴⁰ Iha ro hiandrekitsy gny tragnoko, laha gny safanao, ro handilia gn'olo iaby. Eo aminy gny seza fiebegna avao ro ho agnabo aho noho iha. ⁴¹ Hoy Farao tamin'i Josefa hoe: " Ingo, atolako agnaminao gny tanin'i Egypta iaby." ⁴² Nalan'i Farao tamin-gny tagnany gny peratsy ahita gny tombo-kaseny, voho natsofony tany gny tagnan'i Josefa. Nampiasaloriny siky rongony matify ie, voho niravahiny ravaky volamena gny vozony. ⁴³ Nampanganiky tagnabony gny katraka faharoeny gny Farao ie. Nandrengy gnazy gn'olo iaby hoe: " Manongalefa". Nataony gny Farao nandily gny taniny gny Egypta iaby ie. ⁴⁴ La hoy Farao tamin'i Josefa hoe: " Zaho ro Farao, sady olo hafa mihotry gnanao, la tsy hagnonjo gny tagnamy ndra gny tombony aminy gny taniny gny Egypta iaby. ⁴⁵ Nikaiky Farao hoe: " Zafenata Panea" gn'agnaran'i Josefa nameany valy ie, Asenata, gn'anakapelany gny Potifera mpitakanzo mangan'i Ona. Vinakivakin'i Josefa iaby gny taniny gny Egypta iaby. ⁴⁶ Telopolo tao Josefa, laha nitsanga tankatrehany gny Farao ie, mpanjakany gny Egypta. Niala tamy fagnatreha gnan'i Farao ie, ka vinakivakiny iaby gny taniny gny Egypta iaby. ⁴⁷ Tagnatiny gny fito tao soasoa, la namokatry maro vatany gny tany. ⁴⁸ Navoriny iaby gny hany iaby tagnatiny gny fito tao tamy gny tany Egypta, voho nataony tagny aminy gny tana gny bevata. Napetrany, lafa atao tana gny hany ze bakaminy gny baibo mariniky gnazy. ⁴⁹ Navorin'i Josefa manahaky gny fasy an-driaky egny eo, lafa atao voa iaby; lako mare gny voa, ka najanony gny gn'isaky, fotony, tsy vatsy gny magnisaky gnazy. ⁵⁰ Talohany gny tao niaviany gny mosary, la nana gn'anaky roe lahy Josefa, tamy Asenata, anakapelany gny Potifara mpitankazo manga tao Ona. ⁵¹ Kinaik'i Josefa hoe Manase gny talagnolo, fotony, hoy ie hoe: " Ndranagnahary ro nampagnaligno gnahy gn'olo iaby, voho gny tarihan-drako iaby." ⁵² Kinainy koa hoe Efraima gn'anany hafaroe, fotny, hoy ie hoe: " Ndranagnahary ro nahamaro gnahy tamy gny tany fangirifiriako". ⁵³ Ingo andala zao, gny farany amy gny fito taony gny halakoany gny vokatry. ⁵⁴ La namototsy amizay, gny fito taony gny mosary, laha gny safan'i Josefa. Rembony gny mosary gny tany iaby, fe ingo, nisy hany avao gny tagny amy gny Egypta iaby. ⁵⁵ Lafa niaigna tagnatiny gny mosary, gny tany iaby tao Egypta, la nangataky hany tamin'i Farao gn'olo. Ka hoy Farao tamin-drozy hoe: " Dagny, mandena magnamin'i Josefa agny; voho orihonareo, ze raha safagniny aminareo." ⁵⁶ Nagneniky gny faritsy gny tany iaby gny mosary. Sinokats'i Josefa iaby gny tragno famorian-kany, voho navarony tamin-drozy Egyptiana gny vokatry. La nanjeky vatany gny mosary tamy gny tany Egypta. ⁵⁷ Niavy tao Egypta gny tany iaby, mba hitako vary amin'i Josefa, fotony, fa nanjeky mare gny mosary tagny aminy gny tany iaby.