¹ Ka tafaran'izay raha iaby zay,la nahakamo gny tompony rozy,azy mpanjakan'i Egypta igny,gny mpanday kapoakin'ny mpanjaka voho gny mpamboatry gny mofony. ² Meloky tamy reo manam-pahefany roe lahy i Farao,la gny johary mpanday gny kapoaky voho gny mpamboatry mofo. ³ Ninginadrany tan-tragnon'ny gny lehiben'ny mpiamby rozy,tamy fonja azy nitanjaha gnan'i Josefa igny. ⁴ Nintingy gnan'i josefa gny lehiben'ny gny mpiamby mba hanompo gnan-drozy.Sady rozy nipetraky la nipetraky fotoa ela tan-gandra ao. ⁵ Samby nagnonofy rozy-raiky mpanday kapoaky igny voho raiky mpamboatsy mofon'ny mpanjakan'i Egypta nitanjahy tan-gandra tao igny-la sanby nana gny nofiny aby rozy roe lahy tamy halikigny,ka gny nofy kiraikiraiky la samby nana gny dikany iaby. ⁶ Niavy maraindrai-be tagnamin-drozy tao Josefa ka nahita gnandrozy.Ingo,nalahelo rozy. ⁷ Nagnontagny tamy reo tandapan'i Farao ze nisondry tagnaminy tan-gandra tao an-tragnon'ny gny tompony ie,ka nanao hoe:"Nagnino nareo hoy ro meloky? ⁸ Hoy rozy tagnaminy hoe:"Nagnonofy rahay roe lahy fe tsy misy afaky hagnambara agnaminay gny dikany."Hoy Josefa tagnamin-drozy hoe:"Tsy bakamin-Ndragnahary va gny fagnomeza gny dikan'izay?Mba volagno gnahy moa lahy." ⁹ La nivola gny nofiny tamin'i Josefa gny lehiben'ny mpanday kapoaky.Hoy ie hoe:"Tagnatin'ny nofiko,la ingo,nisy voaloboky tagnilako teo. ¹⁰ Nisy tahony telo tamin'ny voaloboky igny.Laha nitiry zay,la namogny gny vogniny ka masaky reo tahon'ny voaloboky reo. ¹¹ Tan-tagnako gny kapoakin'ny mpanjakan'i Farao.Nalako voaloboky reo ka nifiaziko tangnanty kapoakin'i Farao teoka nampetrako tan-tagnan'i Farao zay. ¹² Nivola tagnaminy Josefa hoe:"Ino gny dikan'izay.Gny tahon'ny gny voaloboky telo la midika ho telo andro. ¹³ Agnatin'ny telo andro Farao ro hampiranga gny lohanao ka hampoly gnanao amy gnasanao.Hametraky gny kapoakin'i Farao eo an-tagnany iha ,manahaky gny naham-panday gny kapoaky gnanao. ¹⁴ Fa tiarovo zaho lafa milamy gny agnaminao,ka mba magnatoroa hasoafagnahy agnamiko.Rehafo agny amin'i Farao zaho ka alao an-gandra ato. ¹⁵ Fa nala an-keriloha tamin'ny gny tany Hebreo tokoa zaho.Eto avao koa la tsy nisy raha nataoko zay tokony hampigadra gnahy ." ¹⁶ Lafa hitan'ny lehiben'ny gny mpambotsy mofo fa soa gny dikan'izay,la hoy ie tamin'i Josefa hoe:"Nagnonofy avao koa zaho,ka,ingo,nisy sobiky telo nisy mofo tan-dohako teo. ¹⁷ Teo amin'ny sobiky farany agnabo mare igny la nisy kazazan-draha lako natao mofo ho gnan'i Farao,kanefa nihanin'ny gny voro bakan-tsobiky tao zay. ¹⁸ Namaly Josefa ka nanao hoe:"Zao ro dikan'izay.Gny sobiky telo la midika ho telo andro. ¹⁹ Agnatin'ny telo andro ro hangalan'i Farao gny lohanao voho hagnatognany gnanao agnabo zaho.Ka hihina gny vatanao reo voro reo." ²⁰ Ka tami-gnadro fahatelo gny fimpolianin'gnandro niterahan'i Farao.Nagnano fety ho gnan'ny gny mpanompony iaby ie."Nasondrotriny "gny lohan'ny azy lehiben'ny mpanday kapoaky igny voho gny lohan'ny azy mpamboatsy mofo igny,tamin'ireo mpanompony. ²¹ Nampoliny tamin'ny gnasany gny lehiben'ny mpanday kapoaky, ka nametraky gny kapoaky tan-tagnan'i Farao ndraiky ie. ²² Fa nahantony koa gny lehiben'ny mpamboatsy mofo,manahaky gny nivolagnan'i Josefa tamin-drozy. ²³ Kanefa tsy mba nahatiaro gnan'i Josefa azy lehiben'ny mpanday kapoaky igny,fa halignony koa aza gny mikasiky azy.