¹ Nandesy nijotso tagny Egypta i Josefa.Potifara,manam-pahefa ze gnan'i Farao zay kapitenin'ny mpiamby voho gny Egyptiana,ro nivily gnazy tamy reo Ismaelita,zay nanday gnazy nijotso tagny. ² Niaro gnan'i Josefa i Yaveh ka lasa johary voatahy ie.Nifitaky tan-tragnon'ny Egyptiana tompony ie. ³ Gny tompony la nahita fa miaro gnazy Yaveh sady nampajary gny raha ataony iaby. ⁴ La natiha sitraky tagnatrehany i Josefa.Sady nanompo gnan'i Potifara ie.Nataon'i Potifara ho mpitanjaky gny tragnony i Josefa,voho ze fanagnany iaby,la nataony tambany fifezany. ⁵ Ka namototsy tamy fotoa nampintajahany gnazy gny tragnony voho ze fa nagnany iaby,la nitahin'i Yaveh gny tragnon'ny Egyptiana igny noho amin'i Josefa.Gny fitahian'i Yaveha la tagnamin'ny raha ze nanagnan'i Potifara iaby ndra tan-tragno ndra tam-baibo. ⁶ Napetrak'i Potifara tamin'i Josefa iaby gny fiembena gny fanagnany iaby.Tsy nila nivetsivetsy ndraino ndra ino afa tsy gny hany hohaniny ie .Sady Josefa la tovolahy voho soa. ⁷ Ka tafaran'izay la nagniry gnan'i Josefa gny valin'ny tompony.Hoy ie hoe:"Mandria miaraky agnamiko." ⁸ Fa nanda ie ka nivola hoe:"Ingo,gny tompoko tsy midary ze raha ataoko an-tragno,ka nametraky tagnamiko gny raha iaby ze gnazy eo ambany fifehezako ie. ⁹ tsy misy bevata mandilatsy gnahy agnatiny tragno toy.Tsy nandrara ndra ino ndra ino tagnamiko ie afa-tsy iha avao,fotony valiny iha.La manao akory ro afahako magnano raha raty bevata voho fahota manohitry gna'andranagnahary?" ¹⁰ Nivola tamin'i Josefa isa maray ie,kanefa nanda tsy hiaraky mandry agnaminy na hisondry agnaminy ie. ¹¹ Andro raiky la nilitsy tan-tragno tao hanao gnasany ie.Tsy nisy tamy reo johary nijano tan-tragno ao. ¹² Nisamboriny tami-gny salony ie voho nisafagniny hoe:"Miroroa miaraky agnamiko."Nengany tan-tagnany egny gny salony,la nilay,voho niboaky amonto agny ie. ¹³ Ka lafa jeriny fa nengany tan-tagnany teo gny salony ka la nilay niboaky an-tany agny ie, ¹⁴ la nikaihiny gnolo tan-tragny tao ka nivollagnany hoe:"Henteo,Potifara nampilitsy Hebreo toy mba handrava gnantsika.Nilitsy tagnamiko tao ie ma hiaraky hiroro agnamiko,La nikorakoraky zaho. ¹⁵ Ka lafa jany nikorakoraky zaho,la nengany agnamiko eto gny salony,la nandositsy ie,ka niboaky amonto agny." ¹⁶ Napetrany tagnilany teo salots'i Josefa igny zisiky hiavian'ny tompony tan-tragno ao. ¹⁷ Nivola tamy fanazava zao i hoe:"Gny mpanompo Hebreo zay nandesinao ho gnantsika igny,la nilitsy tato hagnaratiraty gnahy. ¹⁸ Ka lafa nikorakoraky zaho,la nengany tagnamiko teto gny salony ka nilay amonto agny ie. ¹⁹ Ka lafa jan'ny gny tompony gny fanazava nataon'ny valiny tagnaminy hoe:"Zay gny raha nataon'ny mpanomponao tagnamiko,"la neloky mare ie. ²⁰ Nangalaky gnazy gny tompon'i josefa ka nandefa gnazy ho an-gadra agny,toera zay nitanjaha gny gadran'ny mpanjaka.La tao an-tragno maiky ie. ²¹ Fa Yaveh niaro gnan'i Josefa ka nagnatoro gnt tsy fivaliham-pagnekea tagnaminy.Nampahita hatea gnazy tagnatrehan'ny mpiamby gny fonja Ie. ²² Nampandramby an-tagna gnan'i Josefa gny gadra iaby tan-tragno maiky tao gny mpiamby gny fonja.Ndra ino ndra ino nataon-drozy tao,la nandramby an-tagna anizay Josefa. ²³ Gny mpiamby gny fonja la tsy nitebiteby gny raha iaby tan-tagnany teo,fotony niaro gnazy Yaveh.Ze raha iaby nataony,la nitahin'i Yaveh.