¹ La tami-zay gnandro zay la nagnenga reo rahalahiny Joda ka niaraky nipetraky taminy Adolamita,zay kinaiky hoe Hira. ² Tagny ro nahaojihany tamy gnanak'ampelan'ny johary Kananita zay kaihy hoe Soa.Nanambaly gnazy ie vo niaraky niriro tagnaminy. Nanan-gnanaky ie ka niteraky anakilahy.Era ro nikaiha gnazy. ⁴ Nanan-gnanaky ndraiky ie ka niteraky anakilahy.Kaihy hoe Onana. ⁵ Sady mbo niteraky anakilahy ndraiky ie ka nikaihy hoe Sela.tagny Keziba ro niterahany gnazy. ⁶ Joda nahita valy ho gnan'i Era,talagnolony,Tamara ro agnarany. ⁷ Era talagnolon'i Joda la raty teo agnatrehan'i Yaveh.Nivonoan'i Yaveh ie. ⁸ Hoy Joda tamin'i Onana hoe:"Mandria misondry ami'ny valin-drahalahinao.Atavo gny adidy amy maha ragnaotsy gnanao,ka manangana anaky ho gnan'ny rahalahinao." ⁹ Ka hain'i Onana fa ganja la tsy ho gnazy.Ka isaky miaraky miroro amin'ny valin'ny rahalahiny ie,la nararakiny ami-gny tany gny tsirin'ainy mba tsy hanagnany aja ho gnan'ny gny rahalahiny. ¹⁰ Raty gny nataony teo agnatrahan'i Yaveh.Nivonoan'i Yaveh avao koa ie. ¹¹ La hoy Joda tamin'i Tamara,vinanton'ny hoe:"Ao iha hijano ho ampela tovo an-tragnon'ny babanao ao zisiky maha-be gnan'i Sela,anakilahiko."fotony natahotsy ie hoe:"tsy noho maty manahaky reo rahalahiny avao ie."Roso tamara ka nifitaky tan-tragnon'ny babany ao. ¹² Fotoa lako tafara atoy,la nimaty gny valin'i Joda,anak'ampelan'i Soa.Fa niaritsy Joda ka niakatry tagny ami-panety gn'aondriny tagny Timna,ie voho Hira azy Adolamita ragniny. ¹³ Nisy nivola tamin Tamara hoe:"Ingo,gny rafozanao fa miakatsy agny Timna hagnety gnaondriny." ¹⁴ Nalany gny salony maha ampela tovo gnazy la nisalorany gny voaliny ka nisarognany gny vatany.Nifitaky teo am-bavahadin'i Enaima,zay tagnilan'ny lala magnany Timna ie.Fotony fa hitany fa be i Sela kanefa tsy mba natolotry ho valiny ie. ¹⁵ Lafa nahita gnazy i Joda la nieritseritsy fa mpivaro-tena ie fotony nisarognany gny tarehiny. ¹⁶ Namonjy gnazy tegny an-dala ie ka nivola hoe:"Avia,aleo iha mba hiaraky hiroro agnaminao"Fotony tsy hainy hoe vinantony ampela ie-ka hoy ie hoe:"Ino ro homeanao gnahy la afaky miaraky miroro agnamiko iha?" ¹⁷ Hoy ie hoe:"Hagnaterako anak'aosy amy reo aondry voho aosy iha."Hoy ie hoe:"Hagnome antoky gnahy va iha zisiky hagnateranao gnanizay?" ¹⁸ Hoy ie hoe:"Ino ro antoky azoko amea gnanao?"Namaly ie hoe:"Fanombohan-kase voho gny folinaosady igny kobay an-tagnano egny igny ."Nameany gnazy reo ka niaraky niroro tagnaminy ie,ka la nibevoka tagnaminy ie. ¹⁹ Nitsanga ie la niala teo.Nalanygny voaliny voho nisikinany gny salotsy maha ampela tovo gnazy. ²⁰ Nampagnaterin'i Joda gnan'ny Adolamita ragniny gny anak'aosy tamy reo aondry voho gnaosy mba hahazony gny antoky tegny an-tagnan'ny ampela igny,kanefa tsy nahita gnazy ie. ²¹ Bakeo la nagnotany reo johary nifitaky tamy toera io azy Adolamita igny hoe:"Aia azy mpivarotena teto ami'ny lala'i Enaima igny ?"Hoy rozy hoe:"Tsy nisy mpivarotena teto." ²² La nimpoly tagny amin'i Joda ie ka hoy ie hoe:"Tsy nahita gnazy zaho.Sady hoy koa johary tamy toera io hoe:"Tsy nisy mpivarotena teto" ²³ Hoy i Jod hoe:"Engao ho tanjahiny agny regny raha regny,mba tsy nangala baraka gnantsika.Fa nampagnatitsy anak'aosy vatany zaho,fa iha ro tsy nahita gnazy." ²⁴ Ka lafa afaky telo vola teo la nisy nivola tamin'i JOda hoe:"Nivarotena i Tamara vinantonao ampela,ka fa bevoka ie."Hoy i Joda hoe:"Andeso atoy ie ka aoky horoa." ²⁵ Ka lafa naboaky ie la nagnampita hafatsy tagny amin'ny rafozany hoe:"Bakamin'ny johary tompon'ireto ro naha bevoka gnahy."Hoy ie hoe:"Mba haizo lahy hoe gnania reto fanombohan-kase voho foly voho kobay toy." ²⁶ Ka hain'i Joda reo raha reo ka hoy ie hoe:"To mandilatsy gnahy ie,fotony ie la tsy natolotsy ho valin'i Sela anako."Sady tsy niaraky niroro taminy sasy ie. ²⁷ Ka tamizay andro zay la niteraky ie,ingo,hamba ro tan-tsarotrony tao. ²⁸ Ka laha tam-piteraha teo la niboaky gny tagnany raiky tamy reo aja reo,ka nangalaky foly mena gny rasazy ka nataony vo tami-gny tagnany sady hoy ie hoe:"Intoy ro teraky voalohany." ²⁹ bakeo la nahemony agny tagnany igny,ka ingo,gny rahalahiny niboaky voalohany.Hoy rasazy igny hoe:"Tamy fomba manao akory ro nahatafaboaky gnanao!"Ka la nikaihy hoe Fareza ie. ³⁰ Ka la nibokay koa gny rahalahiny,azy nisy foly mena igny gny tagnany ka nikaihy hoe Zera ie.