¹ Nipetraky tagny ami-gny tany ze nipetrahan'ny babany Jakoba,tamy tany Kanana ao. ² zao gny raha mikasiky gnan'i Jakoba.Josefa,mpamaraky fito amby folo tao,niamby aondry voho aosy nisondry tami-reo rahalahiny.Ie la nisondry tami-reo gnanakilahin'i Bila voho reo gnanakilahin'i Zilpa,reo valin'ny babany.Nagnasisy raty mifototsy gnan-drozy tami-babany Josefa. ³ La tian'i Ysraely mandilatsy gnanakilahiny hafa I Josefa noho ie anany tamin'ny haantitsiny.Nitrebehany salotsy soa ie. ⁴ Jerin'ny reo rahalahiny fa tean'ny babany mandilatsy gnandrozy iaby ie.Nalay gnazy rozy voho tsy nisafa amin-katea tagnaminy sasy. ⁵ Nahazo nofy i Josefa, ka la nintantara tamy reo rahalahiny zay.La vo maiky nihalan-drozy ie. ⁶ Hoy i tamin-drozy hoe :"Mba njanjigno moa gny nifiko ze ninofisiko zao. ⁷ Ingo,nandrohy kobognam-bary tagny am-baibo tsika ka ingo,nireny gny kobognam-bariko ka la tafatsanga soa,ka ingo,nilahatsy magnodidy ny ganhy koa reo kobognam-barinareo la nanongaliky tagnantrehan'ny gny kobognam-bariko." ⁸ Hoy reo rahalahiny tagnaminy hoe:"La hanjaka agnaminay vatany va iha?Handidy gnanay vatany va iha?"Vo maiky rozy nalay gnazy nohon'ny gny nofiny voho gny safany. ⁹ La mbo nagnonofy hafa ndraiky ie ka la nosafagniny tamy reo rahalahiny.Hoy i hoe:"Mbo nagnonofy hafa ndraiky zaho:"Nanongaliky tan-gnatrehako gny masoandro voho gny vola voho gny kinta raiky amby folo." ¹⁰ Nitantarany tamin'ny babany zay manahaky gny gnataony tamin'ny rahalahiny reo,,ka la nisafagnin'ny babany mare ie.Hoy ie tagnaminy hoe:"Ino zao nofy azonao?La hanongaliky ami-gny tany agnatrehanao vatany va zaho voho gny reninao voho gny rahalahinao?" ¹¹ Nialo gnazy reo rahalahiny,fa gny babany koa nametsivetsy gnan'i raha zay tan-tsainy ao. ¹² Roso niamby aondry voho gnaosin'ny babany tagny Sekena reo rahalahiny. ¹³ Hoy gnataon'i Israely tagnamin'i Josefa hoe:"Kanao tsy nandeha niamby aondry voho aosy tagny Sekena va gny rahalahinao?Avia,fa hirahiko ho agny amin-drozy iha."Hoy Josefa tagnaminy hoe;"vonona zaho." ¹⁴ Hoy i tagnaminy hoe:mandena,ndagny,henteo laha tsy magnahy gny rahalahinao voho gnaondry miaraky gnaosintsika,la tatero agnamiko atoy ".La naboakin'i Jakoba handilatsy gny baibon'i Hebrona ie,sady Josefa nagnany Sekema. ¹⁵ La nisy johary raiky nahajery gnan'i Josefa.Ingo,i Josefa nikariokarioky tam-baibo egny.Nagnontany gnazy johary igny hoe:"Ino ro ilanao? ¹⁶ Hoy Josefa hoe:"Mila gny rahalahiko zaho.Azafady,mba safagno gnahy lahy,aia rozy ro niaraky aondry voho aosy rey." ¹⁷ Hoy johary igny hoe:"Fa niala tami-toera toy rozy,la janjiko rozy nisafa hoe:'Ndao tsika ho agny Dotana."Nagnoriky gny liany reo rahalahiny Josefa ka la nahajery an-drozy tagny Dotana. ¹⁸ Jilon-drozy baki-lavitsy egny ie,ka talohan'ny hiaviany agnilan-drozy teo,la nanao tetiky hamonoa gnazy rozy. ¹⁹ Nifampisafa reo rahalahiny hoe :"Henteo,igny mpagnonofy igny. ²⁰ Avia henanizao,ndao ho vonoantsika ie la hatorakintsika ami-gny raiky amy lavaky reto.Ka ho volagnintsika hoe:'Niham-biby ie'La ho hitantsika gny hiafaran'ny gny nofiny." ²¹ Nahare gnanizay Robena ka la namonjy gnazy tan-tangnan-drozy.Hoy ie hoe:"Engao tsy halan-tsika gnainy." ²² Hoy Robena tami-drozy hoe:"ka mandatsaky lio.Atoraho an-davaky an-diomonto agny ie,fa ka mikasi-tagna gnazy"-mba ahafahany magnavotsy gnazy an-tagnan-drozy eo ka la handay mimpoly gnazy mimpoly ami-babany agny. ²³ Lafa avy tamy rahalahiny teo Josefa,la nalan-drozy gny salotsiny soa igny. ²⁴ Rinambin-drozy ie voho natorany tagnaty lavaky.Tsy misy raha lavaky io ka sady tsy nisy rano tagnatiny tao. ²⁵ Nifitaky rozy mba hihina mofo.Nanandratsy gny masony rozy ka nagnety, indregny,nisy Ismaelita niara-dia bakagny Gileada,niarakt tamign'apondran-drozy nanday hagnitsy,voho balsama voho miora.Nandeha rozy mba handay gnan'izay hijotso ho agny Egypta. ²⁶ Hoy Joda tami-reo rahalahiny hoe:"Ino ro tombotsoa ho azontsika laha mamono gny rahalahintsika voho hagnajary gny liony tsika? ²⁷ Ndao,havilintsika ami-reo Ismaelita ie la ao tsy hamono gnazy tsika,gnatony rahalahintsika ie,nofotsintsika ie."Nijanjy gnazy reo rahalahiny. ²⁸ Nandalo reo Midianita mpanao kinanga.Sininton-drozy bakan-davaky ao Josefa.Navilin-drozy drala volafotsy roapolo tamy reo Ismaelita Josefa.La nandesin'ireo Ismaelita tagny Egypta Josefa. ²⁹ Nimpoly tamy lavaky eo Robena,ingo tsy tagnatiny lavaky tao i Josefa.Nitatahany gny salotsiny. ³⁰ nimpoly tagny ami-reo rahalahiny ie ka nivola hoe:"Tsy ao aja igny!aia gny tagny handenako?" ³¹ Namono aosy raiky rozy voho nangalaky gny salots'i Josefa ka nampijobo gnanizay tamin'ny lion'ny gnaosy igny. ³² La nandesin-drozy tagny ami-babany zay ka la hoy rozy hoe:"Hitanay toy.Mba henteo laha salotsy gnanako toy na tsy ii." ³³ Hain'i Jakoba zay ka la hoy ie hoe:"Salotsy gnanako toy.nihanin'ny gny biby lia ie.Vatany la torotoro tokoa Josefa." ³⁴ Nanataky gny salony Jakoba voho nagnisy siky fiojea tam-balahany teo.Niojy gnanany ie tagnatin'ny gnandro maro. ³⁵ Nitsanga nagnafatratsy gnazy iaby gnanakilahiny vohp gnamak'ampelany iaby,fa la tsy nety nankaherezy ie.Hoy gnataony hoe:"Hijotso ho agny ami-fiaigna tsy hita vatany zaho hiojy gnanakilahiko igny." nitagny gnazy babany. ³⁶ Navilin'ny reo Medianita reo tagny Egypta tami-potifara ie,tami-lapan'i Farao,lehiben'ny mpiamby igny.