¹ Hoy Ndranagnahary tamin'i Jakoba hoe he: " Nitsangana, mandena niakatry agny Betela la mifitaky agny. Magnambara alitara agny ho gnan-Dranagnahary, ze niseho taminao fahakin'iha milay gnan'i Esao rahalahinao." ² La Jakoba nisafa tamingn'ankohonany vo reo iaby nisondry taminy hoe he: " Engao Ndranagnahary hafa ze aminanareo eo reo, liovo gny vatanareo, vo avao gn'akanjo nareo. ³ Ndao tsika hiongaky agny Betela. Hamboatry alitara agny zaho gn'andragnahy, ze namonjy gnahy tamign'ndro nijaliako, vo nisondry tagnamiko avao ndra taia nandenako." ⁴ La namean-drozy gnan'i Jakoba Ndranagnahary hafa reo iaby tan-tagnany, vo reo kiviro tan-tsofin-drozy. Nalevin'i Jakoba tam-bany hazo gny teribina ao marikitry gnan'i Sekema reo. ⁵ Laha nandeha rozy, la mandatsahan-Dranagnahary horohoro tamireo tana magnodidy an-drozy, ka la tsy nagnenjiky reo gnanaky lahin'i Jakoba reo gnolo reo. ⁶ Niavy tao Lozy Jakoba ( ze a Betela avao), ami-tany Kanana ao, i vo reo gn'olo iaby ze nisondry tagnaminy. ⁷ Nampitsanga alitara tao ie la kinainy ho El-betela zay toera zay, gnantony tao Ndranagnahary ro nagnatoro gny vatany tagnaminy, laha nilay gny rahalahiny ie. ⁸ La maty i Debora, mpiteza gnan'i Rebeka . Naleviny, laha ambanimbanin'ny Betela tam-banin'ny hazo terebinta ie, ka la kiraiky zay ho Aloma-bakota. ⁹ Lafa nimpoly bakagny Padan-Arama Jakoba, la niseho tagnaminy ndraiky Ndranagnahary vo nitsipi-rano gnazy. ¹⁰ Hoy Ndranagnahary tagnaminy hoe: " Jakoba ro agnaranao, kanefa tsy kaihy ho Jakoba sasy iha. Fa atao ho Israely." La kinaikin-Dranagnahary ho Israely gnagnarany. ¹¹ Hoy Ndranagnahary tagnaminy hoe: " Zaho Ndranagnahary Tsitoha. Miteraha maro vo mihamaroa. Hisy firenena vo gny fihambanam-pirenena hiboaky bakaminao, la mpanjaka ro ho amireo taranakao eo. ¹² Tamy ze nameako gnan'i Abrahama vo Isaaka igny, la hameako gnanao. Ho gnan'ireo taranakao ze misolo gnanao la hameako an'i tany igny avao koa. ¹³ La niakatry ka niala taminy eo, tami-toera ze nisafagnany tagnaminy Ndranagnahary. ¹⁴ Nagnory tsangam-bato tami-toera nisafagnan-Dranagnahary taminy Jakoba, tsangam-bato vita tamigny vato. Nampiraraky fagnatitsy inomy vo nampiraraky diloilo tamizay ie. ¹⁵ Kinainy Jakoba ho Betela toera ze nisafagnan-Dranagnahary tagnaminy. ¹⁶ Niala tao Betela ao rozy. Laha mbo lavidavitsy gnan'i Efrata rozy, la tsinongon-jaza Rahely. Saro-piteraha ie. ¹⁷ Laha tagnatin'ny fangirifirian'ny gny fahasarota-piteraha ie, la nisafa tagnaminy Rasazy igny hoe he: " Ka matahotsy, fa henanizao la hahazo aja johary raiky hafa iha." ¹⁸ Laha tam-pialany gnay eo, tamy farany fofony gnainy ro nikaihany gnazy ho Benony ie, nefa gny babany nikaiky gnazy ho Benjamina.

19 Maty Rahely, la nalevy tegny ami-lala magna Efrata ( ze atao ho Betlehema). ²⁰ Nampitsanga tsangam-bato tagnabon'ny gny lalany Jakoba. Zay ro ahaiza gny lolon'i Rahely zisiky henanizao. ²¹ Nanohy gny liany Israely, vo mampitsanga gny tragno lainy tambaliky gny tilikambo fiambena reo aondry amign'aosy. ²² Laha nifitaky tamizay tany zay Israely, la niaraky niroro tami-Bila valitsindranon-drainy Rebena, ka janjin'Israely zay. La nana-gnanaky lahy roa ambin'ny folo Jakoba. ²³ Reo gnanany johary bakamin'i Lea la Robena, talagnolony Jakoba egny, vo simeona, Levi, Joda, Isakara, vo Zebolona, ²⁴ Reo gnanany johary bakamin'i Rahely la Josoa fa vo Benjamina. ²⁵ Reo gnanany johary bakamin'i Bila, ze mpanompo ampelan'i Rahely, la Dana vo Naftaly. ²⁶ Reo gnanaky lahy bakamin'i Zilpa, mpanompo ampelan'i Lea, la Gada vo Asera. Reo iaby reo ro gnanaky lahin'i Jakoba, nateraky ny tagny Padana-Arama. ²⁷ Jakoba avy tagny amin'i Isaaka, babany, tagny Mamre agny Kiriat-Arba ( na hebrona avao koa), toera nifitahan'i Abrahama vo Isaaka. ²⁸ Niay valopolo ami-zato tao Isaaka. Niala ay Isaka la maty vo navory ho agny amireo razambeny Zokiolo vintsy andro ie. ²⁹ Esao vo Jakoba, la reo gnanany johary, ro nandevy gnazy.