¹ Nijilo agnabo Jakoba, la io Esao nagnanto, vo nisy johary efa jato nisondry taminy. Nizarany Jakoba tamin'i Lea, Rahely, vo reo ,panompo ampela reo aja. ² Bakeo la nafitaky taloha egny reo mpanompo ampela vo gnanaky dorzy, norihiny ka vo gnanany reo, la norihiny Rahely vo Josefa gny farany mare. ³ I mihintsy ro nandeha talohan-drozy. Nanongaliky gnim-pito tami-gny tany ie, zisiky niaviany tagnilany rahalahiny eo. ⁴ Nilay mba hanalaka gnazy Esao, nandrakaky gnazy, nandrakoky gny tendany vo nagnoroky gnazy. Bakeo la nitagny rozy. ⁵ Lafa nijilo agnabo Esao, la nahajery gn'aja vo ho gn'ampela ie. Hoy i hoe: " Ia gn'olo misondry aminareo reo?" la hoy gnataony Jakoba hoe: " Reo gn'olo nomen-Dranagnahary tamigny fasoava ho gnan'ny mpanomponao." ⁶ Bakeo la nagnanto taloha eo mpanompo ampela nisondry tamy gnanany reo, vo nanongaliky rozy. ⁷ Bakeo la nagnanto taloha egny avao koa Lea vo gnanany reo la nanongaliky, la farany Josefa vo Rahely nagnanto taloha egny vo nanongaliky. ⁸ Hoy Esao hoe he: " Ino ro gnantony nandefasanao regny tariky iaby nifananjy tagnamiko regny?" Hoy Jakoba hoe: " Mba hazahoa sitraky agnilany tompoko." ⁹ Hoy Esao hoe: " Fa mana-gny ampy zaho, rahalahiko. Tanjako gnan'ny vatanao ze anagnanao. ¹⁰ Hoy Jakoba hoe: " Aha, la miangavy, la fa nahita fitia tagnilanao eo zaho, fa nahita gn'endrikao zaho, la ho mahita gn'endriky Ndranagnahary zay, la rinambinao zaho. ¹¹ Mba rambeso lahy gny fagnomeza ze nandesy ho gnanao, gnantony fa nagnome fahasoava gnahy Ndranagnahary, la gnantony fa mana gny ampy zaho." La manahaky an'izay ro nanddrisihany Jakoba gnazy, la nekeny Esao zay. ¹² La hoy Esao hoe he: " Ndao tsika hiongaky. Handeha alohanareo eo zaho." ¹³ Le hoy Jakoba taminy hoe: " Gny tompoko la mahay fa mbo kely aja reto, la mbo miteza gnanany aondry vo aomby reo. Laha andesy mare ndrandraik'andro avao aza rozy, la ho maty iaby biby iaby reo. ¹⁴ Mba angalao lahy gny tompoko mba handeha aloha ny gny mpanompony. Handeha avao zaho, araky gny famindrany biby fihary reo ze alohako eo, vo araky gny lian'ny aja reto, zisiky hiaviako agny ami-tompoko agny Seira. ¹⁵ Hoy gnataony Esao: " Engao hajanoko aminao gn'ilany ami-johary misondry agnamiko reo: " Fa hoy Jakoba: " Nagnino ro manao an'izay? Fa ampy gny hasoafagnahiny gny tompoko tagnamiko." ¹⁶ Ka la namotitsy gny liany himpoly ho a Seira agny Esao tamign'andro. ¹⁷ Roso tagny Sokota Jakoba, nananga tragno ho gnazy, vo nagnory fialofa ho gnan'ny biby fihariny reo. Noho zay la kinaiky ho Sokota toera io. ¹⁸ Lafa bakagny Padana-Arama Jakoba, la avy soa avao tantanan'ny Sakema, tami-tany Kanana. Nijano tagnilany tany eo ie. ¹⁹ Bakeo i nivily tany kelikely, nagnoregnany gny tragno lainy tami-gnanaky Harona, baban'i Sekema, tami-volafoty kelikely zato. ²⁰ Teo ro nagnoregnany gn'alitara vo kinainy hoe El-Elohe Israely zay.