¹ Nandeha tamigny lalany avao koa Jakoba, la nitajy tamign'Anjelin-Dranagnahary. ² Lafa nahajery an-drozy Jakoba, la hoy ie hoe he: " Toy ro tobin-Dranagnahary", ka la Mahamaima ro nikaihany an'i toera zay. ³ Nandefa mpanday hafatry nialoha gnazy Jakoba mba ho agny amin'i Esao rahalahiny agny amitanin'ny Seira, agny ami-faritriny Edoma. ⁴ Nibaiko an-dreo ie, nisafa hoe: " Zao gny hosafagninareo amin'i Esao tompoko: zao ro voasafan'i Jakoba mpanomponao manao an'izao:' Fa nipetraky niaraky tami-Labana zaho, la nagnemotsy gny foliako zisiky henanizao. ⁵ Managn'aomby, bariky, aondry vo aosy, vo mpanompo johary vo mpanompo ampela zaho. Nandefa hafatsy toy tagny ami-tompoko zaho, mba hazahoako sitraky agntrehanao eo." ⁶ Nimpoly tagny ami-Jakoba mpanday hafatsy reo la nisafa manao an'izao: " Nandeha tagny amin'Esao rahalahinao rahay. Ho avy hihao aminao ie, la efajato zahay ro hisondry aminy." ⁷ La natahotsy mare vo nangitikitiky Jakoba. Ka la zinarany gnolo nisondry taminy reo ho antoko roa, la aondry reo, aosy vo, apondra reo. ⁸ Hoy gnataony hoe he: " Laha avy amin'antoko raiky Esao ka manafiky an'izay, la ho afaky hilay gn'antoko raiky amibiny." ⁹ Hoy jakoba hoe: ' Ndra nagnahary ny Abrahama babako, vo Ndranagnahary ny Isaaka babako, Yaveh, ze nisafa tagnamiko hoe: 'Molia agny ami-taninao vo gny longonao, zaho la hagnamby gnanao, ¹⁰ Tsy mendriky gnasan'ny fagnaraha mahatoky vo gny famendreham-pitokisa iaby ze nataonao ho gnan'ny mpanomponao zaho. Fa gny tehiko ro mba nandesiko nita toy Jordana toy, la ami-henanizao fa lasa antoko roa zaho. ¹¹ Mba vonjeo ami-gny tanan'ny rahalahiko, gny tanan'i Esao zaho, fa matahotry gnazy zaho, so de ho avy ie hanafiky gnahy vo gny reny amin-jaza. ¹² Kanefa iha nisafa hoe: " Ho ambiniko vatany iha. Hataoko manahaky gny fasin-driaky gny taranakao, la tsy voa isaky." ¹³ Nipetraky teo Jakoba tami-haliky igny. Nangalaky gny sasany tami-ze nagnanany niaraky tagnaminy ie mba ho fagnomeza ho gnan'i Esao rahalahiny; ¹⁴ Aosy vaviny roan-jato vo aosy lahiny roapolo, ¹⁵ Apondra be ronono telopolo vo gnanaborikin-drozy, amby vaviny efapolo roa amby lahiny folo, apondra vaviny roapolo vo apondra lahiny folo. ¹⁶ Nameany reo mba ho antagnan'ny gny mpanompony, gn'andriany kiraikiraiky aby. Nisafa tamigny mpanompony i hoe he: " Mandehana alohako eo vo asio elagnela isaky gn'andiany gny biby." ¹⁷ Nagnome torohevitry gny mpanompo voalohany ie, nisafa manao an'izao: " Lafa nifamojy aminareo i Esao rahalahiko ka magnontany anareo, manao hoe he: " Olon'ia nareo? Hagnaia nareo? Gn'ania biby agnilanareo eo reo? ¹⁸ La nisafa nareo manao an'izao: 'Gnany Jakoba mpanomponao reo. Reo la fagnomeza nalefa ho gnan'i Esao tompoko , io, bakafaranay avao koa ie." ¹⁹ Nagnome torohevitry gny vondro faharava, fahatelo, vo gny johary iaby ze magnaraky gn'adiam-biby reo avao ho Jakoba. Hoy gnataony hoe: " Hisafa raha mitovy amin'i Esao nareo lafa mifamonjy agnaminy. ²⁰ Tsy maintsy misafa avao koa nareo hoe! Jakoba mpanomponao la bakafaranay."' Fa nametsivetsy i hoe: " Hampijano gnazy amigny fagnomeza ze nalefako talohako eo zaho, vo lafa laha Jeriko ie, la mety handramby gnahy ie." ²¹ Ka nalefa mialoha gnazy fagnomeza reo. I vatany nijano tam-toby ao halikigny ²² Nifoha Jakoba nandritrany haliky, la nangalaky gny vahiny roa, gnanak'ampelany roa, vo gnanaky lahiny raiky amibin'ny folo. Halefany tagny ampitan'ny fitan'i Jakoba rozy. ²³ Taminio ro nampitagny an-drozy tagny ampitan'ny gny rano mandeha niaraky taminireo fanagnany iaby. ²⁴ Tavela raiky Jakoba, la nisy Johary raiky nialy tagnaminy zisiky maraindray. ²⁵ Lafa hitany Johary igny fa tsy handresy gnazy ie, la vinangony gny foto-pen'i Jakoba. Nikaritsy gny foto-pen'i Jakoba laha nialy tagnaminy ie. ²⁶ Nisafa johary igny hoe he: " Aleo zaho handeha, fa ho vaky andro." La Jakoba nisafa hoe: " Tsy engako handeha iha tsy hagnenga gnanao handeha zaho, laha tsy mitsipi-rano gnahy iha". ²⁷ La hoy johary igny tagnaminy hoe: " Ia gnagnaranao?" Jakoba namaly hoe: " Jakoba". ²⁸ Hoy johary igny hoe: " Gnagnaranao la tsy ho Jakoba sasy, fa Israely. gnantony iha nialy tamin-Dranagnahary vo tami-gnolo la fa nandresy." ²⁹ Nagnotagny gnazy Jakoba manao na'izao: " Mba safagno gnahy tompoko gnagnaranao." Hoy i hoe: " Nagnino iha ro magnontany gnagnarako?" Bakeo la nitsipi-rano gnazy teo ie. ³⁰ Jakoba nikaiky toera igny ho Paniela gnantony hoy i hoe: " Fa mifagnatriky tarehy tamin-Dranagnahary zaho , la avotsy gnaiko." ³¹ Niboaky gny masoandro laha mandalo an'i Poniela Jakoba. Kolitsaky ie nohon'ny gny foto-peny. ³² Zay ro gnantony tsy nisakafoanan'ny gnanak'Israely gny hozatry gny foto-peny eo ami-fitohizan'ny gny fotrogna zisiky henanizao, gnantony namparatsy hazatry re johary igny laha nahakaritry gny foto-potrognany Jakoba.