¹ Ka misy mosary nitranga tamin-gny tany io, ankohatsy gny niseho voalohany tamin-gny gnandron'i Abrahama. Nagnagny amin'i Abimeleka, mpanjakan-gny Filistiana tagny Gerara i Isaka. ² Ka niboaky tagnaminy Yaveh ka nivola hoe: " Kamijotso agny Egypta iha, mitoera amin-gny tany zay vinolako gnanao. ³ Mijanogna amin'io tany io, homba voho hitahy gnanao zaho; fa ho gnanao voho an'ireo avorohotanao, ro hagnomezako reo tany iaby reo, ka ho tanterahiko gny fifagnenkegna zay nenkegniko tamin'i Abrahama babanao. ⁴ Hampitomboako manahaky reo basian-gny lagnitsy reo avorohotanao, ka homeko reo avorohotanao reo tany iaby reo. Bakamin'ireo avorohotanao ro hitahia reo firenena iaby eto an-tany. ⁵ Hataoko zay, gnantony Abrahama la mankato gny feoko voho nagnaraky reo toro-lalako, reo didiko, reo fagnambarako voho reo lalagnako." ⁶ Ka la nagnorim-petraky tagny Gerara i Isaka. ⁷ Laha nagnontany gnazy momban-gny valiny reo johary teo an-tana, la hoy ie hoe: " Anabaviko ie." Natahotsy ie hivola hoe: " Valiko ie", Fotony nieritseritsy ie hoe: Hamono gnahy reto johary an-tana eto reto mba hahazahoany gnan'i Rebeka, fotony ampelasoa vatany ie." ⁸ Lafa nipetraky ela tao Isaka, la nisy fotoa Abimeleka mpanjakan'i Filistiny mijilo teo ambaravarakely. Ingo, hitany i Isaka nanafosafo an'i Rebeka, valiny. ⁹ Nampikaiky gnan'i Isaka Abimeleka ka nivola hoe: " Hita vatany fa valinao ie.Nagnino iha ro nivola hoe: " Anabaviko ie?" Hoy Isaka taminy hoe: " Fotny nihevitsy zaho la hovonoan-gny gnolo zaho mba hahazahoany gnazy." ¹⁰ Hoy Abimeleka hoe: " Fa ino zao ataonao gnanay zao? Mety fa nisy olo raiky tamin'ireo olo nisondry miroro mora tamin-gny valinao, ka la nanday heloky aminay eto iha". ¹¹ Ka la namepepetsy gnolo iaby Abimeleka ka nivola hoe: " Na ia na ia mikasiky io johary io na gny valiny la azo antoky fa tena hovonoe vatany. ¹² Namboly tabiry tamin'io tany io Isaka ka nahavokatsy avo zato heny tamin'io tany io avao, fotony nitahy gnazy Yaveh. ¹³ Nanjary nanan-kanagna ralehilahy, ka nitombo avao zay mandra-pahavy gnazy ho mpanan-kanagna be. ¹⁴ Nanagnaondry voho aomby voho vavea maro ie. Nalay gnazy reo Filistina. ¹⁵ Ka reo fantsaka iaby zay hihalin'ireo mpanompon-gny babany amin-gny gnandron'i Abrahama Babany, la najanon'ireo Filistina tamin-gny fandembefa tany zay. ¹⁶ Hoy Abimeleka tamin'i Isaka hoe: " Miala lavitsy gnanay, fotony mahery lavitsy noho rahay iha. ¹⁷ Ka la miala teo Isaka ka nagnorimpetraky tagny ambaibon'i Gerara, ka nipetraky tagny. ¹⁸ Nampolin' Isaka hinaly ndraiky reo vovon-drano, zay fa voahaly tamin-gny gnandron' Abrahama Babany. Zay fa vinonon'ireo Filistina tafaran-gny nahafaty an'i Abrahama. Reo vovon-drano reo la nataon'i Isaka manahaky zay fa nikehin-gny Babany gnazy avao. ¹⁹ Lafa nandavaky tegny ambaibo gny mpanompon'i Isaka, la nahita loharano volo tegny rozy. ²⁰ Nifanditsy tamin-gny mpiarak'andron'i Isaka reo mpiarak'andro tao Gerara, ka nivola hoe: " Gnanay io rano io". Ka la nataon'i Isaka hoe: " Eseka" lay vovon-drano io fotony nifandiran-drozy. ²¹ Ka la nihaly vovon-drano hafa ndraiky rozy, ka la mbo nifandiran-drozy koa, ka la nataony hoe: " Sitna" zay. ²² Nienga teo ie ka la mbo nihaly vovon-drano hafa, fe tsy mba nifandiran-drozy zay. Ka nataony hoe: " Rehobota" zay, ka hoy ie hoe: " Amin'izao fa nagnamboatsy tana ho antsika Yaveh, ka ho tahiny eo amin'io tany io tsika. ²³ La niakatsy bakagny Isaka ka nagnagny Beri-sheba. ²⁴ Niseho taminy i Yaveh tamin'io matognaly io ka nivola hoe: " Zaho ro Ndranagnaharin'i Abrahama Babanao. Ka matahotsy, fa homba voho hitahy gnanao Zaho hampitombo reo avorohotanao, noho gny agnamin'i Abrahama mpanompoko". ²⁵ Nagnary alitara teo Isaka ka nikaiky gnagnararan'i Yaveh. Teo ro nagnoregnany gny lainy, ka nihaly vovo reo mpanompony. ²⁶ Bakeo Abimeleka niala tao Gerara ho aminy agny, niaraky tamin'i Ahozata, namany, voho Pikola lehiben-gny tafiny. ²⁷ Hoy Isaka tamin-drozy hoe: " Nagnino nareo ro magnamiko atoy, nefa nalay gnahy voho nandroaky gnahy bakaminareo agny. ²⁸ `Bakeo hoy rozy hoe: " Hitanay soa zao fa nomba gnanao Yaveh, ka la nanampakevitsy rahay fa tokony hisy fifagnenkegna eo amintsika, eka, aminay voho aminao. Aoky rahay hanao fifagnenkegna, ²⁹ fa tsy hanao ratyiha, manahaky gny tsy nanaovanay raty taminao, voho manahaky gny fomba soa nagnandesanay gnanao ka nandefasanay gnanao ampilamina. Voatahin'i Yaveh vatany iha. ³⁰ Ka nla nanao hany be ho an-drozy Isaka, ka nihina voho nino rozy. ³¹ Nifoha maraim-be rozy ka nifagnenky. Bakeo la nalefan'i Isaka nandeha rozy, ka nienga gnazy ampilamina rozy. ³² Tamin'andro io avao la nisiziky reo mpanompon'i Isaka ka nivola taminy momba gny vovon-drano zay hinalindrozy. Hoy rozy hoe: " Fa nahita rano rahay." ³³ Nataony hoe Sheba vovon-drano io, ka gnagnaran'io tana io la Beri-sheba mandrak'androany. ³⁴ Lafa efapolo tao Esao, nangalabaly an'i Jodita anakampelan'i Bery Hetita, voho Base4mata anakampelan'i Eloma Hetita. ³⁵ Nampanday fahoria an'i Isaka voho Rebeka rozy.