¹ Nijanjy gnan'i Saraha manahaky ze fa nivolagniny ho nasany i Yaveh,ka la nasan'i Yaveh tamin'i saraha manahaky ze fa nampitamagnany. ² Nibevoka Saraha ka niteraky anaky lahy tamin'i Abrahama tamin'ny fahanterany,tamin'ny gnadro fa voatondro zay fa nivolagnin' Andrianagnahary tagnaminy. ³ Abrahama nagnome agnara gny anany johary,azy nateraky ho gnazy,zay naterak'i Saraha ho gnazy,hoe Isaka. ⁴ Nisavarin'i Abrahama Isaka anany tamin'ny faha valo androny,magnaraky gny nandidian'Andrianagnahary gnazy. ⁵ Zato tao Abrahama laha niteraky gnan'i Isaka anany. ⁶ Hoy Saraha hoe:"Fa nampihehezin-dragnahary zaho;gnolo iaby mahare gnahy la hisondry hihehy agnamiko. ⁷ Hoy koa ie hoe:"Ia moa ro afaky nivola tamin'i Abrahama fa hiteza aja Saraha,kanefa niteraky aja johary ho gnazy tamin'ny haantitsiny zaho!" ⁸ Nihabe gny zaza ka nota,ka Abrahama nagnano fety bevata tamign'andro nagnota gnan'i Isaka. ⁹ Saraha nahita gnan'i anaky Hagara Egyptiana,zay naterany tamin'i Abrahama,nagnaraty gnazy. ¹⁰ La hoy ie tamin'i Abrahama hoe:"Roaho ampela andevo tia voho anany io:fa gnanan'io ampela andevo io la tsy hikamba lova amin'ny gnanako,la Isaka". ¹¹ Zay raha zay la vatany nampijaly gnan'i Abrahama nohony amin'ny gnanany. ¹² Fa hoy Ndranagnahary tamin'i Abrahama hoe:"Ka meloky nohony amin'ny gnanakao lahy,voho amin'ny ampela mpanomponao.Janjigno gny safagny iaby ze nivolagnany gnanao mikasiky zay raha zay,fotony baka amin'i Isaka ro hagnomeza agnara gny havorohotanao. ¹³ Hataoko ho firenena avao koa gnanaky ny ampela mpanomponao,fotony havorohotanao ie." ¹⁴ Nifoha maray Abrahama,nangalaky mofo voho sihoa angozy misy rano,la nomeany gnan'i Hagara zay,napetrany tan-tsorony teo.Nomeany azy aja iny ka nampandehaniny lavitsy rozy.Lasa i Hagara ka nirerirery tagny an-diomonton'i Beri-Sheba. ¹⁵ Lafa lany gny rano tao agnatanin'ny sihopa angozy iny,la negnan'i Hagara tam-poto-kazo raiky aja iny . ¹⁶ Bakoe lasa ie nifitaky lavidavitsy gnan'ny aja igny,sahabo ho halaviran'ny fandefasa kititsy,fa hoy ie hoe:"Akoaky zaho tsy hagnety gny hafatesan'ny aja toy."Ka nifitaky magnandrify azy ie,la nandranga gny feony la nintagny. ¹⁷ Andranagnahary nahare gny feon'ny aja igny,ka gny anjelin'Andrianagnahary nikaiky gnan'i Hagara baka an-danitsy agny,ka nivola tagnaminy hoe:"Ino gny manahira gnanao ry Hagara?Ka matahotsy fa ren-dragnahary gny feon'ny aja io . ¹⁸ Mitsangana, atsangano aja io ka herezo ie,fa Zaho hanao gnazy ho firenena bevata." ¹⁹ Bakeo Ndranagnahary la nampahiratsy gny fijeriny,ka nahita fantsaka ie.La lasa ie nagnatsiky rano sihoa angozy igny ka nampinon-drano an'aja igny. ²⁰ Nagnaro gnan'aja igny Ndranagnaharya,ka niha-bevata ie.Nifitaky tan-diomonto ie ka lasa mpitifitsy kititsy. ²¹ Nifitaky tagny an-diomonton'i Parana ie,ka nangalan-dreniny valy bakany Egypta. ²² Ka tamizay fotoa zay Abimeleka voho Pikola filohan'ny gny tafiny nirehaky tamin'i Abrahama ka nivola hoe:"Andrianagnahary la momba gnanao amizay raha atsanao iaby. ²³ Amizao mifanta agnamiko agnatrehan-Dranagnahary fa tsy hagnisy raty agnamiko iha,na gnanako,na gny havorohotako iha.Atoro gnahy amy toera nifitahanao toy gny fitokiam-panekea zay natoroko tagnaminao." ²⁴ Hoy Abrahama hoe:"mifata zaho." ²⁵ Nitaray tamin'i Abimeleka avo koa Abrahama mikasiki-gny lavaky fantsaka nalan'ny gny mpanompon'ny Abimeleka an-keriloha tamgnaminy. ²⁶ Hoy Abimeleka hoe:"Tsy haiko gny nanao zao raha zao.Tsy nivola taloha tagnamiko iha;tsy mbo nahare mikasiky zay zaho laha tsy androany." ²⁷ Noho zay Abrahama la nangalaky aondry voho aomby ka nagnome azy gnan'i Abimeleka,la nanao fagnekea rozy roe lahy. ²⁸ Abrahama nagnavaky anak'aondry fito vaviny tamy reo aondriny. ²⁹ Hoy Abimeleka tamin'i Abrahama hoe:"Ino gny dikan'ny reto anak'aondry fito vaviny reto navahanao reto? ³⁰ Namaly ie hoe:"Reto anak'aondry fito vaviny reto la ho rambesinao bakamin'ny gny tagnako,mba ho vavolombelo agnamiko,fa zaho ro nandavaky intoy fantsaka toy." ³¹ Ka la nikaihiny hoe Beri-sheba IO toera io,fotony toe rozy roe ro nanao fifanta. ³² Tao Beri-sheba rozy roe lahy ro nanao fifanekea,bakeo Abimeleka voho Pikola lehiben'ny gny tafiny nimpoly tagny amin tanin'ireo Filistina. ³³ Namboly hazo kily tao Beri-sheba i Abrahama.Nanompo gnan'i Yaveh,zay Ndranagnahary mandrakizay tao ie. ³⁴ Nipetraky ho vahiny tagnatiny andro lako tagny amin'ny tanin'ny Filistina i Abrahama.