¹ Avy tao Sodoma reo anjely anankiroa lafa hariva, laha mbo nipetraky teo ambavahadin'i Sodoma i Lota. Hitan'i Lota rozy, nitsanga hitsena an-drozy, sady nampiankohoky gny vatany tamin-gny tany. ² Hoy ie hoe: " Tompoko, miangavy gnanareo lahy zaho mba hiodaky ao a-tragnon-gny mpanomponareo, mijano ao henanio aly, sady sasao gny tongotrareo. La afaky mifoha vao maraindray be nareo sady mandehana amin'izay lala handehananareo. Namaly ie hoe: " Aha, handany gny haly eo an-kianjan-gny tana rahay." ³ Fa nitalaho mafy gnan-drozy, ka nandroso tao an-tragnony. Niketriky hany voho nanendy mofo tsy misy masirasira ie, la nihina rozy reo ⁴ Nefa talohan-gny natorian-drozy, gny joharin-gny tana, gny joharin'i Sodoma, la nagnodidy gny tragno, gny tanora voho gny antitra, reo johary iaby avy amin-gny faritsy gny tana. ⁵ Nikaihin-drozy Lota, ka nisafa tagnaminy hoe: " Aia reo johary zay avy tato agnaminao tamin'itoy haly toy? Andeso atoy aminay rozy, mba hafahanay miara-mandry amin-drozy". ⁶ Ka niboaky gny varavagna ho eo amin-drozy Lota sady nagnily gny varavagna tao afarany. ⁷ Hoy ie hoe: Rahalahiko, misoloho gnanareo zaho, ka manao raha raty mare. ⁸ Ingo, manan'anaky ampela roa zay tsy mbo niaraky natory tamin-gny johary zaho. Engao zaho, mitalaho aminareo zaho, andesiko eto aminareo reo, sady ataony amin-drozy izay soa eo amasonareo. Ka manao ndra ino ndra ino amin'ireo johary reo, fotony avy ato ambany aloky gny tafoko rozy." ⁹ Hoy rozy hoe: " Miala!" Hoy ndraiky koa rozy hoe: " Raiky toy noho avy teto mba hipetraky ho vahiny, no zao ie ho lasa mpitsara gnatsika! no enanaikizao noho hanao ze raty mare miaraky agnaminao noho gny nisondria amin-drozy rahay." Nanosiky mare nanohitsy gnany igny johary rozy, nanosiky nagnohitsy gnan'i Lota, no nagnariny mba hanilaky gny varavagna. ¹⁰ Fa reo johary nanodrotsy gny tagna drozy no naninto gnan'i Lota hilitsy ao an-tragno hiaraky amin-drozy no nandridry gny varavagna. ¹¹ No reo vahin'i Lota namaly hajikia reo johary ze tao ambaliky gny tragno, gny kely no bevata, mba hahatonga an-drozy tsy holy maiky laha miezaky hila gny varavagna rozy. ¹² Noho nivola tagnamin'i Lota reo johary roe: " Mbo nisy olo hafa va ato agnanaminao? Vinanto johary, reo anaky lahinao no reo anak'ampelanao, no ze hanagnanao eto amy toy tana toy, noho andeso miboaky eto rozy. ¹³ Fa ho rava toy toera toy, fotone gny fiampanga zay eo agnilan'i Yaveh noho avy mahery mare ka nirahiny handrava izay rahay." ¹⁴ Nandeha Lota no nampivola reo vinanto johary, reo johary ze fa nampanantena hanambaly reo anany ampela sady nivola hoe: " Malaky, miala agnaminy toy toera toy nareo, fa ho ravan'i Yaveh toy tany toy." Fa tamin-dreo vinanto johary noho nivazavaza ie. ¹⁵ Vo mazava gny antignana, noho nangataky tagnamin'i Lota reo anjely, nivola hoe: " Mandehana, andeso gny valinao no reo anakao ampela roe ze eto, mba tsy ho arava koa iha amin'ny faikia gny tana." ¹⁶ Nefa nisaintsay ie, noho nitanjanany reo johary tana, no gny tagnany valiny, no gny tagnany reo anak'ampelany roe, fotone be fandefera tagnaminy i Yaveh. Nandesy drozy niala rozy, no napetraky drozy ambaliky gny tana. ¹⁷ Lafa tafavoaky rozy tegny ambaliky ,la nisafa gny raiky tamin-dreo johary hoe:" Miala ho agnaminy nareo! Fa ka mipoly, na mijanojagno amigny tany lemaky. Mandena agny an-tendrombohitsa mba tsy ho rava nareo." ¹⁸ Hoy Lota tamin-drozy hoe: "Aha tompoko o! ¹⁹ Fa nahajery sitraky teo amasonao gny mpanomponao, no fa naneho hasoa fagnahy bevata tagnamiko iha tamigny namonjenao gnaiko, nefa tsy afaky gny hila ho agny an-tendrombhitsy zaho, fotone hatratsy gnahy gny loza, no ho maty zaho. ²⁰ Fa ingo, roy tana roy noho agnilako mare azo ila soa, no kely io, Tompoko, nagnino lahy zaho hilay (tsy kely va io?), no ho voavonjy gnaiko". ²¹ Hoy ie tagnaminy hoe: " Eka lahy, ekegniko avao zao fangataha zao, fa tsy hamotiky gny tana ze nambaranao teo zaho. ²² Malaky! Miala agny, fa tsy afaky hanao na ino ino zaho mandra-piavia agny." Nony zay ro nikehy gny tana hoe: Zoara. ²³ Fa niposaky tamigny tany gny masoandro lafa niavy tao Zoara i Lota. ²⁴ Noho nandatsaky solifara no bolo baka an-dagnitsy tamigny Sodoma voho Gomora i Yaveh. ²⁵ Notorotoa reo tana reo, no gny lemaky iaby ,no reo olo mipetraky aminio tana io iaby, no reo raha mitiry ze tomany tamigny tany. ²⁶ Nefa gny valin'i Lota, zay teo afara, nitoliky, noho avy vongo tsira ie. ²⁷ Nifoha maraindray Abrahama ka nagnegny amigny toera ze nitsangany teo agnilan'i Yaveh. ²⁸ Nijelo gnan'i Sodoma voho Gomora no gny tany lemaky iaby ie. Nijery ie ka igno, miakatsy manahaky gny setroky laforo bevata gny setroky avy tamigny tany. ²⁹ No lafa nandrava reo tany lemaky Ndranagnahary, noho matiaro gnan'i Abrahama. Nivola niala avy teo agnivony fandrava i Lota lafa nandrava gny tana ze namea gnan'i Lota Ie. ³⁰ Noho niakatsy avy tao Zoara i Lota mba hipetraky agny amin-dreo tendrombohitra miaraky reo anako ampelany roe, fotone navaka gny hipetraky ao Zoara ie. Nipetraky agnatiny lava-bato raiky ie, ie no reo anak'ampelany roe. ³¹ Hoy gny talagn'olony ampela tamigny zainy hoe: " Fa antitsy gny babantsika, no tsy misy johary hiaraky miroro agnamin-tsika manahaky ze ataony zao tantolo zao. ³² Avia, andeha hampinomintsika divay gny babantsika, no hiaro firoroa agnaminy tsika, mba hafahantsika ho maro taranaky. ³³ Ka noho nampinomy drozy divay baba drozy tamigny aly igny. Bakeo nilitsy gny anak'ampela voalohany no niaraky miroro tagnaminy babany; nefa ie noho tsy mahay gny fotoa ze niroroany, na gny nifohazany. ³⁴ Lafa hamaray noho nivola tagnaminy zainy igny gny zoky ampela hoe: " Janjigno, niroro niaraky tagnaminy babako zaho nankaly koa andeha ampinomy tsika divay ndraiky ie enanikio, no tokony militsy ao iha no miroro miaraky agnaminy, mba hahafahantsika mampitombo gny avorohota gny baba tsika." ³⁵ Ka nampinomy drozy divay ndraiky babany tamigny aly igny, no nandeha niaraky niroro tagnaminy gny zainy. ³⁶ Farane noho samy nanagn'anaky tagnaminy babany reo anak'ampelan'i Lota. ³⁷ Gny talagn'olo ampela noho niteraky johary, no nikehy hoe Moaba. Ie no lasa razambeny Moabita enanikizao. ³⁸ Sady lay faravavy, la niteraky johary avao koa, sady nikaiky gnazy hoe Benamy. Lasa razamben'ny taranak'i Amona ie enanikizao.