¹ Tafarany reo raha reo noho avy tagnamen'i Abrama tamigny fahita gny volan'i Yaveh, nanao hoe: " Ka mavaka Abrama! Zaho ro fiarova batanao ro valisoa bevata mare ho gnanao." ² Hoy Abrama hoe: " Tompo Yaveh, ino ro hameanao gnahy, fotony tsy gnanaky avao zaho, sady i Elijiera avy agny Damaskosy ro mpandova gny tragnoko?" ³ Hoy Abrama hoe: " Fotony tsy namenao avorohota zaho, la ingo, gny mpitatan-draharaha gny tragnoko ro mpandova gnahy." ⁴ Bakeo, la ingo, avy tagnaminy ro safan'i Yaveh, manao hoe: " Tsy ho mpandova gnanao lehilahy zany ze avy amigny nofonao avao ro lasa mpandova gnanao." ⁵ La nanday gnazy nimboaky ie, sady nanao hoe: " Enteo gny lagnitsy, sady isao reo kintana, laha afaky gny hagnisaky andreo iha." Bakeo nivola tagnaminy Ie hoe: " La hanahaky gnanareo gny avorohotanao." ⁶ Nino gnan'i Yaveh ie, sady nisainy ho to ho gnazy zay. ⁷ Nivola tagnaminy ie hoe: " Zaho ro Yaveh, zay nanday gnanao nimboaky avy taoagnaminy Oran-gny Kaldeanina, mba hagnome gnanao toy tany toy mba handova zany." ⁸ Hoy ie hoe; " Tompo Yaveh, ino gny hahaizako fa handova gnan'izay zaho? " ⁹ Bakeo hoy Ie tagnaminy hoe: " Angnandeso anak'aomby vavy telo tao zaho, Aosy vavy telo tao, aondry vavy telo, voromailala,sady anam-boromailala." ¹⁰ Nandesiny teo amin-gny avokoa iaby reo, sady nanapaky reo ho roe, ka nametraky gny vakimirarany kiraikiraiky avy nifagnatriky, fa reo voro koa tsy nizarany. ¹¹ Lafa nitily teo agnabony sarety reo voron-gny hazo, la noroasin'i Abrama rozy. ¹² Sady lafa nitsofotsy gn'andro, la latsaky tao agnaty firoroa mare i Abrama sady, ingo, nisy faikia voho nampiroro handentiky gnazy. ¹³ La nivola tagnamin'i Abrama i Yaveh hoe: " Haizo soa fa reo avorohotanao la ho vahiny agnamin-gny tany ze tsy reo gnazy, reo, sady ho andevozy voho ampinjaly mandritra gny efajato tao. ¹⁴ Hitsara zay firenena zay ho tompon-drozy zaho, sady lafa afaky zay la hiboaky miaraky agnaminy gny fanagnany mitobaky rozy. ¹⁵ Fa iha la ho agny amin-gny razambenao ampiadagna, sady halevy amin-gny hahatitsao. ¹⁶ Agny amin-gny avorohota nhafa efatsy la ho avy eto draiky rozy, fa gny siakin-dreo Amorita la tsy mba nahatratsy gny fetrany." ¹⁷ Lafa nitsofotsy gny masoandro sady naiky, la ingo, nisy valagny nimboaky setroky bolo voho fanilo nandalo teo agnelagnelany reo singany. ¹⁸ Tagnamin'io andro io la nanao fifagnaraha niaraky tagnamin'i Abrama i Yaveh, nanao hoe: " Hameako ho gnany avorohotanao etoa toy tany toy, manomby amin-gny reniranon'i Egypta ka hatragny amin-gny renorano bevata, Eofrata__ ¹⁹ Reo Kenita, Kenizita, Kadmonita, ²⁰ Hetita, Perizita, Refaita, ²¹ Amorita, Kananita, Girgasita, sady reo Jebosita."