¹ Atavo amigny akasia gny alitara , limy metatsy gny halavany no limy metatsy gny sakany . Ho efa-joro gny alitara no telo metatsy haabony . ² Asio tsifa maragnitsy manahaky gny tsifan'aomby gny zorony efatsy . Haharo raiky amigny alitara reo tsifa , no apetaho takela -barahina reo . ³ Magnamboara fitaova ho gnany alitara: noho valagnin-davenoky, no koa fandraofa, kovety bevata, sotro rovitsy no valagny fagnandesa bolo. Varahina avao no hagnanovanao reo fitaova iaby reo. ⁴ Magnamboara makarakara ho gnany alitara, harato varahina. Magnamboara mason-drozo varahina ho gnan'ireo zoro efatsy gny makarakara. ⁵ Atavo eo ambaniny rindriny alitara gny makarakara bakeo antegnantegnany hatrany ambany. ⁶ Manova bao ho gnany alitara, bao vita amigny hazo akasia, no rakofo amigny varahina reo. ⁷ Tsy maintsy atao agnaty mason-drozo gny bao, no gny bao noho eo amigny lafiny roe amigny alitara, mba hilanja gnazy. ⁸ Atavo poakaty gny alitara, amigny hazo fisaky. Atavo araky ze naseho gnanao tao an-tendrombohitra zay. ⁹ Manova toera mpivoria ho gnany tabernakely. Eo amigny lafiny antimony kianja noho hisy fefy siky, fefy siky hasy bazaha foty maliniky voatretsiky mirefy zato metatsy. ¹⁰ Asio fiankigna roapolo reo fefy siky, miaraky amigny lela tombony varahina roapolo. Hisy farango avao koa apetaky eo aminy reo fiankigna, no koa fihantogna volafoty. ¹¹ Hanahaky anizay koa aminy lafiny avaratsy, hisy fefy siky mirefy zato metatsy misy fiankigna roapolo, lela tomboky roapolo varahina, farango apetaky eo amin-dreo fiankigna, no fihantogna volafotsy. ¹² Aminy lafiny andrefa amigny kianja noho hisy siky mirefy dimampolo metatsy gny halavany. Noho manova fiankigna folo, no lela tomboky folo. ¹³ Atavo dimampolo metatsy avao koa gny halavany kianja agny amigny lafiny atignana. ¹⁴ Gny fefy siky amigny lafiny raiky fidira noho tsy maintsy atao dimy ambin'ny folo metatsy gny halavany. Tsy maintsy miaraky aminy reo fiankigna telo no lela tomboky telo reo. ¹⁵ Eo amigny lafiny raiky koa noho hisy fefy siky mirefy limy ambiny folo metatsy gny halavany. Tsy maintsy miaraky aminy reo fiankigna telo ni lela tombony telo reo. ¹⁶ Siky mirefy roapolo metatsy ro atao vavadiny kianja. Fitaova manga, volomparasy, no mena no hasy bazaha foty maliniky voatrebiky, asany gny mpanao peta-kofehy ro hanova gny siky. Tsy maintsy miaraky amigny fiankigna efatsy no lela tombony efatsy ¹⁷ Gny fiankigna kianja iaby noho tsy maintsy hasia fihantogna volafotsy, farango volafotsy, no lela tomboky varahina. ¹⁸ Ho zato metatsy gny halavany kianja, dimam-polo metatsy gny sakany, no ho limy metatsy koa gny haabony miaraky amigny fefy tsiky hasy bazaha foty maliniky, no lela tombony varahina. ¹⁹ Gny fitaova iaby ze hampiasa ao amigny tabernakely no gny kianja noho tsy maintsy atao amigny varahina. ²⁰ Ao iha handidy gny vahoakan'i Israely mba handay menaky oliva, malio sady nofihazy, ho gnany jiro mba hirehetany reo san'andro. ²¹ Ao an-tragno lay fihaogna, eo ambohony siky zay manoloana gny tabernakely zay misy gny farany vavolombelona, ro handrehetan'i Arona no reo anaky lahiny jiro eo ankatrehan'i Iaveh, manomboky hariva tra maraindray. Izay fepetrea zay noho lalagna maharitsy manerana gny avorohota gny vahoakan'i Israely.