¹ Tafarn'ny limy andro, Ananiasy gny mpisoro be, reo loholona sasany, sady mpikabary kinaiky hoe Tertylo la nandeha tagny. Reo johary reo la nanday fiampanga gnan'i Paoly teo agnatrehan'ny governora. ² Lafa nitsanga teo agnatrehan'ny governora i Paoly, la nanomboky niampanga gnazy i Tertylo ka nivola tamin'ny governora hoe: " Noho iha la mana fiadagna bevata rahay, sady gny fahitanao la manday fanova soa eo amin'ny firenenay; ³ Koa am-pankasitraha tanteraky ro handrambesanay gny raha iaby zay ataonao, ry Feliksa soa mare. ⁴ Mba tsy hitandrahako gnanareo ela loatsy, la mangataky fotoa kelikely agnaminareo aho mba hinjanjy gnahy am-pahatonia. ⁵ Fa io johary io la jerinay fa mpanakoronta sady raiky zay nitariky gny Jiosy iaby manera zao tontolo zao hikomy. Ie ro mpitariky gny sekta nazareana. ⁶ Sady ie avao koa ro niezaky gny handoto gny tragnobe Ndranagnahary, ka la nisamborinay ie. (Fanamariha: Reo antontan-taratasy taloha la nagnampy hoe: " Teanay ho tsara araky gny lalanay ie.") ⁷ ( Fanamariha: Reo antontan-taratasy taloha la ahita ao amin'ny andininy faha 7 hoe: " Fa Lysia, mpiandraikitsy, avy sady nangalaky gnazy an-keriny teo an-tagnanay.") ⁸ Lafa magnontany gnan'i Paoly mikasiky regny raha iaby regny iha, la ho hainao gny mikasiky regny fiampanga nataonay mikasiky gnazy regny." ( Fanamariha: Reo antontan-taratasy taloha la nagnampy ao amin'ny tapany voalohany amin'ny andininy faha 8 hoe: " Nandefa gnanay teo agnaminao.") ⁹ Reo Jiosy avao koa la nagnampy trotraky regny fiampanga regny, sady nagnamafy fa to iaby regny. ¹⁰ Fa lafa nitondroin'ny mpanampaky hivola i Paoly, la namaly Paoly hoe: " Haiko fa iha fa mpitsara teto amy toy firenena toy tagnatiny gny tao maro, ka la faly gny vatako magnazava agnaminao. ¹¹ Ho haiko fa tsy mbo nihoatsy gny roe ambin'ny folo andro zay ro niakarako nandrengy tagny Jerosalema. ¹² Lafa jerin-drozy tao an-tempoly aho, la tsy nialy hevitsy na tamin'ia na tamin'ia aho, sady tsy namporisiky gny vahoaky, na tao amin'ireo synagoga, na tao an-tana. ¹³ Tsy afaky manaporofo agnaminao reo fiampanga zay ataony agnamiko henanizao rozy. ¹⁴ Nefa zaho magnenky zao agnaminao araky gny Fampianara zay kinaikin-drozy hoe sekta, la manahaky izay koa ro hanompoako gny Ndranagnahariny gny razambentsika. Zaho la mahatoky amin'ny iaby zay ao amin'ny lalagna voho reo voasoratr'ireo mpaminany. ¹⁵ Mana gny fahatokisa an-Dranagnahary manahaky reo olo reo aho, fa hisy gny fitsanganan'ny to voho gny raty fagnahy amin'ny maty. ¹⁶ Noho izay aho la miezaky mandrakariva mba hana fisaigna malio eo agnatrehan-Dranagnahary voho gny olombelo. ¹⁷ Sady tafaran'ny tao maro la avy aho handay fagnampia ho gnan'ny fireneko voho fanomeza ara-bola. ¹⁸ Lafa vitako izay, nisy Jiosy vitsivitsy bakagny Asia nahajery gnahy tagny amin'ny fetin'ny fanadiova tao amin'ny tragnobe Ndranagnahary, tsy niaraky tamin'ny vahoaky na tabataba. ¹⁹ Reo olo reo la tokony ho eo agnatrehanareo henanizao ka hivola zay hiampangan-drozy gnahy, laha mana raha rozy. ²⁰ Na koa, reo olo reo avao ro tsy tokony hivola zay jerin-drozy tsy mety atoy agnamiko lafa nitsanga teo agnatrehan'ny filan-kevitsy gny Jiosy aho, ²¹ laha tsy hoe mikasiky gny raha raiky zay nikorakorahako lafa nijoro teo agnivon-drozy aho: ' Izay la mikasiky gny fitsanganan'ny maty zay hitsara gnahy eto agnatrehanareo androany.' ²² Sady Feliksa, zay nampahay soa mikasiky gny Fampianara. Ie la nivola hoe: " Lafa mizotso bakagny Jerosalema i Lysia mpandidy, la hanapa-kevitsy gny amin'ny raharahanao aho." ²³ Bakeo ie nandidy gny kapiteny fa i Paoly la tokony hambena, fa mba hisy fahafaha la tsy hisy amin'ireo namany ho sakana amin'ny fagnampia zay raha ilany. ²⁴ Andro kelikely tafaran'izay, la nimpoly niaraky tamin'i Drosila valiny i Feliksa, zay ampela Jiosy, ka nalefa ho gnan'i Paoly ie sady nahanjanjy taminy mikasiky gny finoa ao amin'i Kristy Jesosy. ²⁵ Fa lafa nialy hevitsy niaraky tagnaminy i Paoly mikasiky gny fahamarigna, fahononan-tena, voho gny fitsara ho avy la najary natahotsy i Feliksa ka nivola hoe: " Mandehana manomboky zao. Fa lafa mana fahafaha aho afara ao, la handefa ho gnanao." ²⁶ Nandritr'izay fotoa izay avao, la nagnantena ie fa hagnome jala gnazy i Paoly, noho izay la nandefa ho gnazy matetiky ie sady niresaky taminy. ²⁷ Fa lafa afaky roe tao, la najary governora nandimby gnan'i Feliksa i Porsio Festosy, nefa Feliksa te hahazo sitraky tamin'ireo Jiosy, la nengany ho hambena avao i Paoly.