¹ Hanomboky hidera-tena ndraiky va rahay ? Rahay la tsy mila reo taratasy fagnamarina aminareo na bakaminareo, manahaky gny olo sasany , sa tsy io? ² Gny vatanareo ro taratasy fagnamarinanay, zay voasoratsy ao am-pontsika , zay hay , voho vakin'ny olo manontolo. ³ Nareo la maneho fa taratasy fagnambara bakamin'i Kristy , zay natolontsika . Io la tsy voasoratsy tamin'ny ranomainty fa tamin'ny fagnahin'izay Ndranagnahary velo. Io la tsy voasoratsy teo amin'ny takela-bato, fa teo amin'ny takelaky gny fon'ny olombelo. ⁴ Sady io ro toky zay anagnantsika eo agnatrehan-Ndranagnahary amin'ny alalan'i Kristy. ⁵ Tsika la tsy mahefa amin'ny vatantsika mba handramby na ino ino zay bakamintsika. Fa koa , gny fahefantsika la bakamin-Dranagnahary. ⁶ Ndranagnahary ro nanao gnantsika mba ho mpanompon'ny fagnenkea vaovao. Io la fagnenkea tsy bakamin'ny soratsy fa gnan'ny Fagnahy. Fa gny soratsy mamono , sady gny Fagnahy magnome aina. ⁷ Sady gny asa zay niteraky fahafatesa la voasoratsy teo agnabon'ny vato_ la avy tamim-boninahitsy bevata ka gny vahoakin'Israely la tsy afaky nibanjy gny tarehin'ny Mosesy. Io la noho gny voninahitsy gny tarehiny, gny voninahitsy zay nihavelo. ⁸ Ho voninahitsy bevata manao akory gny asa zay ataon'ny Fagnahy? ⁹ Fa laha nana voninahitsy gny asan'ny fanameloha , la hanahaky gny ino gny fitomboan'ny voninahitsy gny asan'ny fahamarigna! ¹⁰ Fotony tokoa, zay namea vaninahitsy miaraky la tsy hanam-boninahitsy sasy amin'io fomba io, noho gny voninahitsy zay mampitombo gnan'io. ¹¹ fa laha zay nandalo avao ro nana voninahitsy, la tsy hana voninahitsy mandilatsy nohon'io va zay maharitsy! ¹² Fotony mana toky manahaky gnan'io tsika, la sahy tokoa. ¹³ Tsika la tsy manahaky gnan'i Mosesy , zay nisaro gny tarehiny tamin'ny voaly , mba tsy hahafahan'ny vahoakin'Israely mijery gnazy mivanta amin'ny fiafaran'ny voninahitsy zay nandalo avao. ¹⁴ Fa gny sain-drozy la donto. Ndra la mandrak'ankehitsiny io voaly io la mbo mijano eo amin'ny famakia gny fagnenkea taloha. tsy misokatsy io, fotony ao amin'i Kristy avao io ro ala. ¹⁵ Nefa ndra la ankehitsiny aza, na rahoviana na rahoviana ro vaky gny lalan'i Mosesy, la misaro gny fon-drozy gny voaly. ¹⁶ Nefa laha mitoliky amin'ny Tompo gny olo , la ala gny voaly. ¹⁷ Sady gny Tompo la Fagnahy. Zay misy gny Fagnahin'ny Tompo, la misy fahafaha. ¹⁸ Sady tsika iaby, tsy misarom-boaly, la mahajery gny voninahitsy gny Tompo. Tsika la fa voaova ho ao amin'ny voninahitsy mitovy zay bakamin'ny voninahitsy ho amin'ny voninahitsy, zay bakamin'ny Tompo , zay tsy ia fa gny Fagnahy.