¹ Kale oba nga mwayimbokere amwei no Kristo, muswaganenge ebiri aigguru oKristo jaali nga aikaire okukono ogulyo ogwa Nyamwanga. ² Mulowozenge ebyamwiguru, so tikweebyo ebiri omunsi. ³ Kubanga mwafwiire, n'obulamu bwanywe bubbisirwe amwei noKristo omu Nyamwanga. ⁴ O Kristo, obwomi bwaiswe, bwaalibonesebwa, era naanywe nemulwoka mubonesebwe amwei nayye omukitiinisya. ⁵ Kale mufwiisye ebyansi omunywe: obwenzi, obuggwaggwa, okwegoomba okwansoni, omwoloonko, okuyaayaana, nikwo okuramya ebifwananyi. ⁶ Olweebyo obusungu bwa Nyamwanga bukwiza kubona abatawura. ⁷ Era nyweena omweebyo nimwo mwatambuuranga eirai, nimwabikolanga ebyo. ⁸ Naye ati ati nyweena muyewo ebyo byoona, obusungu, ekinigga, eitima, okuzuma era n'okubaza ebyansoni omumunwa gwaanywe. ⁹ Temwebeyeganga nywenkai na nywenkai: kubanga weyambwireku omuntu wairai amwei n'ebikolwa byamwei, ¹⁰ nimuzwaala omuntu omuyaaka, afuuke omuyaaka olwakutegeera omukifwananyi ky'oyo ayamutondere. ¹¹ Awo waabba nga tiwakyaliiwo kwawula Muyonaani no Muyudaaya, eyakomoleibwe n'atakomoleibwe, omunaiyaanga n'Omusukusi, omwiru n'attali, naye oKristo niye byoona omubyoona. ¹² Kale muzwaalenge nka abakomye ba Nyamwanga abaikiiri era abendebwa, omwoyo wa kissa, obusai, okwewuumbeeka, obuteeki, obugumiikiriza. ¹³ Nga mukuswekeryangana, era nga mukuganyirangana nywenkai na nywenkai, omuntu yeena niyaabbanga n'ensonga oku muntu owondi, era nk'omukama waiswe niyatuganyiire iswe, era naanywe musonyiwenganenge. ¹⁴ Okulweebyo byoona era muzwalireku okwendya kubanga nikwo kuggumya ebintu byoona. ¹⁵ Era emirembe gya Nyamwanga jiramulenge omu myoyo jaanywe, era jemwayeterwe omu mubiri ogumwei; era mubbeenge n'okwebalya. ¹⁶ Ekigambo kya Kristo kibbeenge omunywe, n'obuggaiggai omumagezi goona: nga mukwegesyangana era nga mukulabungana nywenkai na nywenkai omu Zabuli ne nyeembo n'ebiyiye ebyamwooyo, nga mukwebalya oNyamwanga omumitima jaanywe. ¹⁷ Era buli kyamwakolanga, omukigambo oba omukikolwa, mukolenge byoona omwibara lya mukama waiswe o Yesu nga mukwebalya oNyamwanga otaata nga mukwakaara omu ye. ¹⁸ Abakali, muwurenge abaibowaanywe, nka nikiri ekisai omu mukama waiswe. ¹⁹ Abasaiza, mwendyenge abakali baanywe, naye temubakambuwaaranga. ²⁰ Abaana, muwureenge ababyaire baanywe omu byoona kubanga ebyo bisanyusa omukama. ²¹ Abaitowaabwe, temugongeryanga baaba baanywe, balekenge okwiriira omumwooyo. ²² Abairu, mureenge abakama baanywe aba munsi ombyoona, tikubasemeerya kubanga bakubabona, naye mubagonderenge n'omutima ogutaluku bukuppya, nga mukutiina omukama waiswe. ²³ Buli kyemwakolanga mukikole n'omutima gwaanywe gwoona, nk'abakukoora omukama waiswe, so tibaantu: ²⁴ nga mumaite nti mwalisasulwa omukama waiswe empeera eyabugwettwa; muwereze omukama waiswe oKristo. ²⁵ Kubanga asiisa yalisasulwa nka niyasiisire, so tiwaalibba kusaliirya.