¹ Kuganga nkwendya nywe okumanya okweikaamba nekuli okukooto kwendina okulwaanywe n'abo abamu Lawodikiya, naboona abatabonaanga maiso gange omu mubiri; ² emwoyo jaabwe jimale jisanyusibwe, nga bakugaitibwa amei omukwendyangana, n'okwika omubuggaiggai bwoona obwakumanyira kimwei okwa magezi, beetejenge ekyaama kya Nyamwanga niye o Kristo, ³ omu ye obuggaiggai bwoona obwa magezi n'obwakutegeera nijo jebubbisirwe. ⁴ Kini nkukibategeeza waleme kubbaawo muntu yeena akubakyaamya n'ebigambo byakusendasenda. ⁵ Kubanga nebwewankubbaire nga tendiyo omu mubiri naye omu mwoyo ndi naanywe, era nga nkusemeerwa era nga nkubona emppisa zaanywe ezisai n'obugumu obwakwikiriza kwaanywe omu Kristo. ⁶ Kale nkanimwaweibwe oKristo Yesu omukama waiswe, mutambuleenge mutyo omu ye, ⁷ nga mulina emizzi era nga mwombokebwa omu ye, era nga muggumira okwikiriza kwanywe, nka nibwayegeseibwe, nga mukwakaara omukwebalya. ⁸ Mwenkuume tiwabbaangayo muntu akubakuppya omu bufirosoofa n'ebyabubeyegi ebitalumu, n'ebikwegesya obantu omubuwangwa bwabwe obwo, n'okuseengeerya emyoyo egyansi okuttali kusengeerya Kristo. ⁹ Kubanga omu oyo omubiri nimwo gwikaara okwikaara kwoona okwa bwa Nyamwanga. ¹⁰ Era mwafunire obwomi obwizuli omu ye, niye mutwe gwa byabufuzi n'obuyinza bwoona. ¹¹ Era mwakomoleirye omu oyo obukomole obutali bwa mikono, nimwayaabwiire omubiri omukukomolebwa okwa Kristo; ¹² nimwaziikiibwe amwei nayye omukubatizibwa, era nywe mwazukiire amwei nayye olwa kwikirizza kwa Nyamwanga, eyamuyimboire omu baffu. ¹³ Nyweena nimwaali nga mufiire olwa bibonobono byanywe n'obuttakomolebwa mubiri gwanywe, nabafwiire boomi amwei nayye, niyamaare okutusonyiwa ebibbi byaiswe; ¹⁴ era naiyawo endagaano eyawandikiibwe omumateeka, eyatukkakkanga okwikiirya ebiragiro byaayo, niyajikomereire okumusaalaba ¹⁵ nikwo kweyayaambulire kimwei abafuzi n'ababuyiinza, n'abawemuura omulwattu, nabawaangura kaakimwei. ¹⁶ Nolwekyo tiwabbengewo muntu yeena akubasaara omusango omubyakulya oba omubyakunywa oba olwa mbagga oba olwa kweezi okwakaboneka oba olwa sabbiiti. ¹⁷ Kubanga ebyo kituuru kyeebyo ebikwakwiza; naye ekyamugaso niye Kristo. ¹⁸ Omuntu yeena tabanyagangaku mpeera yaanywe omu kwewuumbeeka kw'akwendya yenkai n'okuramyanga abamalaika, nga akugumira omwebyo byaboine, nga akwettumbirya bwerere omu magezi agamubiri gwamwei, ¹⁹ So nga tiyeekwaite mutwe, omuzwa omubiri gwoona, enyiingo n'ebiggumya nga bukuguletera era nga bikugugaitta amwei, nga gukukula n'okukulya kwa ²⁰ Nyamwanga.. Oba nga mwafwiirire amwei no Kristo okuleka emyoyo gyoona ejjansi, like yete kukweyakalya nkabakyafugibwa ebyansi? ²¹ nti "tokaatangaku, so tolekaangaku, so tokangaangaku," ²² ebyobyoona byaaliwaawo, era okwo tikubba kusegeerya biragiro nakwegesya kw'abantu? ²³ ebyo bikuboneka nka ebyamagezi omungire eyakuramya oNyamwanga abantu kwe bakweteerawo bonkwei, n'omukwewuumbeeka, n'omukubonyabonya omubiri; naye tebiriku kyebikugasa nakadooli omukufugga okwegoomba kwa mubiri.