¹ Era ife abalina amaani kitugwaniire okwetikanga obunafu bw'abo ababula maani, so ti kwesanyusianga fenka. ² Buli muntu mu ife asanyusenga mwinaye mu busa olw'okuzimba. ³ Kubanga era no Kristo teyeesanyusianga yenka: naye, nga bwe kyawandiikibwe, nti Ebivumi byabwe abakuvumire byagwire ku niinze. ⁴ Kubanga byonabyona ebyawandiikiibwe eira, byawandiikiibwe kutwegeresya ife, kaisi tubbenga n'okusuubira olw'okugumiikiriza n'olw'okusanyusia kw'ebyawandiikiibwe. ⁵ Era Katonda w'okugumiikirizia n'okusanyusia abawe imwe okulowoozanga obumu mwenka na mwenka mu ngeri ya Kristo Yesu: ⁶ kaisi muwenga ekitiibwa Katonda, Itaaye wa Mukama waisu Yesu Kristo, n'omwoyo ogumu n'omunwa gumu. ⁷ Kale musembezaganyenga mwenka na mwenka, nga Kristo bwe yabasembezerye imwe, olw'ekitiibwa kya Katonda. ⁸ Kubanga ntumula nti Kristo yabbaire muweereza w'abakomole olw'amazima ga Katonda, okunywezia ebyasuubiziibwe eri bazeiza, ⁹ era ab'amawanga kaisi bawenga Katonda ekitiibwa olw'okusaasira; nga bwe kyawandiikiibwe nti Kye naavanga nkwatula mu b'amawanga, Era nayemberanga eriina lyo. ¹⁰ Era ate atumula nti Musanyukenga, imwe ab'amawanga, wamu n'abantu be. ¹¹ Era ate nti Mutenderezenga Mukama, imwe ab'amawanga mwenamwena; Era ebika byonabyona bimutenderezenga. ¹² Era ate Isaaya atumula nti Walibba ekikolo kya Yese, Era ayemerera okufuga ab'amawanga; Oyo ab'amawanga gwe balisuubira. ¹³ Era Katonda ow'okusuubirwa abaizulye imwe eisanyu lyonalyona n’emirembe olw'okwikirirya, imwe musukirirenga mu kusuubira, mu maani g'Omwoyo Omutukuvu. ¹⁴ Era nzeena nze ntegeereire dala ebyanyu, bagande bange, nga mweena mwizwire obusa, mwizwire okutegeera kwonakwona, nga musobola n'okubuuliriragana mwenka na mwenka. ¹⁵ Naye neeyongeire okuguma katono okubawandiikira, nga kubaijukirya n'olw'ekisa kye naweweibwe Katonda ¹⁶ nze okubbanga omuweereza wa Kristo Yesu eri ab'amawanga nga nkolera enjiri ya Katonda omulimu gwa kabona, sadaaka y'ab'amawanga kaisi esiimibwe ng'ekuzibwa Omwoyo Omutukuvu. ¹⁷ Kale okwenyumirizia ndi nakwo mu Kristo Yesu mu bya Katonda. ¹⁸ Kubanga tindyaŋanga kutumula kigambo kyonakyona wabula Kristo bye yankozeserye, olw'okuwulira kw'ab'amawanga, mu kigambo no mu kikolwa, ¹⁹ mu maani g'obubonero n’eby'amagero, mu maani g'Omwoyo Omutukuvu; kityo okuva mu Yerusaalemi n'okwetooloola okutuuka mu Iruliko, natuukirirya enjiri Kristo; ²⁰ naye nga ntaka ekitiibwa kino okubuuliranga enjiri, ti awayatulibwa eriina lya Kristo ndekenga okuzimba ku musingi gwa beene; ²¹ naye nga bwe kyawandiikiibwe nti Balibona abatabuulirwanga bigambo bye, Era abataawulira balitegeera. ²² Era kyenavanga nziyizibwa emirundi emingi okwiza gye muli; ²³ naye atyanu, kubanga tinkaali nina eibbanga mu nsi gino, era kubanga, okuva mu myaka mingi nabbaire ntaka okwiza gye muli, ²⁴ we ndyabira mu Esupaniya (kubanga nsuubira okubabona nga mbitayo, imwe mumperekereku okuntuukya eyo, bwe ndimala okubabonaku n'okusanyukiraku awamu naimwe); ²⁵ naye atyanu njaba e Yerusalemi, okuweereza abatukuvu. ²⁶ Kubanga ab'e Makedoni n'ab'e Akaya baasiima okusoloozerya ebintu abaavu ab'omu batukuvu abali Yerusaalemi. ²⁷ Kubanga basiima; era nga bababanja. Kuba oba ng'ab'amawanga baikiriryakimu n'ebyabwe eby'omwoyo, babanja okubaweereza ate eby'omubiri. ²⁸ Kale bwe ndimala ekyo, bwe ndibakwatisirya dala ebibala ebyo ndivaayo, okubita ewanyu okwaba e Supaniya. ²⁹ Era maite nga bwe ndiiza gye muli ndiiza mu mukisa gwa Kristo nga gutuukiriire. ³⁰ Era mbeegayirire, ab'oluganda, ku bwa Mukama waisu Yesu Kristo, n'olw'okutaka kw'Omwoyo, okufubiranga awamu nanze mu kunsabira Katonda; ³¹ kaisi mpone mu abo abatawulira mu Buyudaaya, n'okuweereza kwange kwe ntwala e Yerusaalemi kusiimibwe abatukuvu; ³² kaisi ngize gye muli n'eisanyu olw'okutaka kwa Katonda, mpumulire wamu naimwe. ³³ Era Katonda ow'emirembe abbenga naimwe mwenamwena. Amiina.