¹ Mbanjulira Foyibe mwanyinaife, niiye muweereza w'ekanisa ey'omu Kenkereya: ² kaisi mumwanirizie mu Mukama waisu, nga bwe kigwaniire abatukuvu, era mumuyambe mu kigambo kyonakyona ky'alyetaaga gye muli: kubanga yeena mweene yayambire bangi, era nzeena omweene. ³ Musugirye Pulisika ne Akula abaakolera awamu nanze mu Kristo Yesu, ⁴ abaawaireyo eikoti lyabwe olw'obulamu bwange; abe nteebalya nze nzenka, era naye n'ekanisa gyonagyona egy'ab'amawanga: ⁵ era musugirye ekanisa ey'omu nyumba yaabwe. Musugirye Epayineeto, gwe ntaka, niikyo kibala eky'oluberyeberye eky'omu Asiya eri Kristo. ⁶ Musugirye Malyamu, eyabakoleire imwe emirimu emingi. ⁷ Musugirye Anduloniiko ne Yuniya, ab'ekika kyange, era abaasibiirwe awamu nanze, ab'amaani mu batume, era abansookere okubba mu Kristo. ⁸ Musugirye Ampuliyaato, gwe ntaka mu Mukama waisu. ⁹ Musugirye Ulubano, akolera awamu naife mu Kristo, ne Sutaku gwe ntaka. ¹⁰ Musugirye Apere aikirizibwa mu Kristo. Mubasugirye ab'omu nyumba ya Alisutobulo. ¹¹ Musugirye Kerodiyoni, ow'ekika kyange. Mubasugirye ab'omu nyumba ya Nalukiso, abali mu Mukama waisu. ¹² Musugirye Terufayina ne Terufoosa abaakola emirimu mu Mukama waisu. Musugirye Perusi omutakibwa, eyakolere emirimu emingi mu Mukama waisu. ¹³ Musugirye Luufo, eyalondeibwe mu Mukama waisu, no maaye, niiye mawange. ¹⁴ Musugirye Asunkulito, Fulegoni, Kerume, Patuloba, Keruma, n'ab'oluganda abali wamu nabo. ¹⁵ Musugirye Firologo no Yuliya, Nerewu no mwanyina, n'Olumpa, n'abatukuvu bonabona abali awamu nabo. ¹⁶ Musugiryagane n'okunywegera okutukuvu. Ekanisa gyonagyona egya Kristo gibasugiirye. ¹⁷ Era mbeegayiriire, ab'oluganda, mulingirirenga abo abaleeta eby'okwawukanya n'eby'okwesitazia, ebitali byo kwegeresya kwe mwayegere: mubakubbenga amugongo abo. ¹⁸ Kubanga abaliinga abo ti baidu ba Mukama waisu Kristo, naye be bida byabwe bonka; era n'ebigambo ebisa n'eby'okuloogya okusa babbeyabbeya emyoyo gy'abo ababula kabbiibi. ¹⁹ Kubanga okuwulira kwanyu kwatuukire mu bonabona. Kyenviire mbasanyukira imwe: naye ntaka imwe okubbanga abagezi mu busa, era abasirusiru mu bubbiibi. ²⁰ Era Katonda ow'emirembe alibetenta Setaani wansi w'ebigere byanyu mangu. Ekisa kya Mukama waisu Yesu Kristo kibbenga naimwe. ²¹ Timoseewo, akolera awamu nanze, abasugiirye; no Lukiyo no Yasooni no Sosipateri, ab'ekika kyange. ²² Nze Terutiyo, awandikire ebbaluwa eno, mbasugiirye mu Mukama waisu. ²³ Gayo, ansuzia nze n'ekanisa yonayona, abasugiirye. Erasuto, omuwanika w'ekibuga, abasugiirye, no Kwaluto, ow'oluganda. ²⁴ Ekisa kya Mukama waisu Kristo Yesu Kibbenga naimwe mwenamwena. Amiina. ²⁵ Era oyo asobola okubagumya ng'enjiri yange n'okubuulirwa kwa Yesu Kristo bwe biri, ng'ekyama bwe kibikwirwe ekyasirikiirwe okuva mu biseera eby'emirembe n'emirembe, ²⁶ naye atyanu kibonekere ne kitegeezebwa amawanga gonagona mu byawandiikibwa bya banabbi, nga bwe yalagiire Katonda atawaawo, olw'okuwulira okuva mu kwikirirya; ²⁷ Katonda ow'amagezi omumu Yenka aweebwenga ekitiibwa ku bwa Yesu Kristo emirembe egitawaawo.