¹ Naye atali munywevu mu kwikiriya mumusemberyenga, naye ti lw'okusala musango gwe mpaka. ² Ogondi aikirirya n'ogondi n'alya byonabyona: naye atali munywevu alya iva. ³ Alya tanyoomanga atalya; era atalya tasaliranga omusango alya: kubanga Katonda yamusembeirye. ⁴ Niiwe ani asalira omusango omuweereza wa beene? eri mukama we yenka ayemerera oba agwa. Naye alyemerera; kubanga Mukama waisu asobola okumwemererya. ⁵ Omuntu ogondi alowooza olunaku olumu okusinga olundi, ogondi alowooza enaku gyonagyona okwekankana. Buli muntu ategeererenga dala mu magezi ge yenka. ⁶ Alowooza olunaku, alulowooza ku bwa Mukama waisu: n'oyo alya, alya ku bwa Mukama waisu, kubanga yeebalya Katonda; n'oyo atalya, talya ku bwa Mukama waisu, era yeebalya Katonda. ⁷ Kubanga wabula muntu mu ife eyeebbeera omulamu ku bubwe yenka, era wabula eyeefiira ku bubwe yenka. ⁸ Kubanga bwe tubba abalamu, tubba balamu ku bwa Mukama waisu: oba bwe tufa, tufa ku bwa Mukama waisu: kale, bwe tubba abalamu, oba bwe tufa, tubba ba Mukama waisu. ⁹ Kubanga Kristo kyeyaviire afa n'abba omulamu, kaisi abbenga Mukama w'abafu era n'abalamu. ¹⁰ Naye iwe kiki ekikusalisia omusango mugande wo? oba weena kiki ekikunyoomesia mugande wo? kubanga fenafena tulyemerera mu maiso g'entebe ey'emisango eya Katonda. ¹¹ Kubanga kyawandiikiibwe nti Nga bwe ndi omulamu, bw'atumula Mukama, buli ikumbo lirinfukaamirira, Na buli lulimi lulyatula Katonda. ¹² Kale kityo buli muntu mu ife alibalirira omuwendo gwe yenka eri Katonda. ¹³ Kale tulekenga okusalira banaisu emisango ate fenka na fenka: naye waakiri musale omusango guno, obutaleeteranga wo luganda ekyesitalya oba enkonge. ¹⁴ Maite era ntegereire dala mu Mukama waisu Yesu, nga wabula kintu kyo muzizo mu buwangwa bwakyo: wabula eri oyo akirowooza nga kyo muzizo, kibba kyo muzizo. ¹⁵ Kuba oba nga omugande wo anakuwala olw'emere, nga tokaali otambulira mu kutaka. Tomuzikiririanga lw'emere yo oyo Kristo gwe yafiiriire. ¹⁶ Kale ekisa kyanyu kirekenga okuvumibwa: ¹⁷ kubanga obwakabaka bwa Katonda ti niikwo kulya n'okunywa, wabula butuukirivu n'emirembe n'eisanyu mu Mwoyo Omutukuvu: ¹⁸ Kubanga aweereza Kristo ati asanyusia inu Katonda, n'abantu bamusiima. ¹⁹ Kale kityo tusengereryenga eby'emirembe, n'eby'okuzimbagananga fenka na fenka. ²⁰ Toyonoonanga mulimu gwa Katonda lw'emere. Byonabyona bisa; naye kyabbanga kibbiibi eri oyo alya nga yeesitala. ²¹ Kisa obutalyanga nyama waire okunywanga omwenge, waire okukolanga byonabyona ebyesitalya mugande wo oba ebimunyiizia oba ebimunafuya. ²² Okwikirirya kw'olina, bbanga nakwo wenka mu maiso ga Katonda. Oyo alina omukisa ateesalira musango mu kigambo ky'asiima. ²³ Naye oyo abuusiabuusia akola omusango bw'alya, kubanga talya mu kwikirirya; na buli ekitava mu kwikirirya, niikyo ekibbiibi