¹ Ate n'atandiika okwegeresya ku lubalama lw'enyanza. Ekibiina kinene inu ne kikuŋaanira w'ali, n'okusaabala n'asaabala mu lyato, n'alinga mu nyanja; ekibiina kyonakyona ne kibba ku nyanza ku itale. ² N'abegeresya bingi mu ngero, n'abakoba mu kwegeresya kwe nti ³ Muwulire; bona, omusigi yafulumire okusiga: ⁴ awo olwatuukire bwe yabbaire ng'asiga, egimu ne gigwa ku mbali kwe ngira enyonyi ne giiza ne gigirya. ⁵ N'egindi ne gigwa awali enjazi awabula itakali elingi; amangu ago ne gimera, kubanga eitakali teyabbaire iwanvu ⁶ eisana bwe lyayakire, ne giwotookerera; era kubanga tegyabbaire n'emizi, ne gikala. ⁷ Engindi ne gigwa awali amawa, amawa ne galoka, ne gagizisia ne gitabala bibala. ⁸ Egindi ne zigwa ku itakali eisa, ne gibala ebibala ne bikula ne byeyongera; ne gizaala okutuusia asatu, era okutuusia enkaaga, era okutuusia ekikumi. ⁹ N'akoba nti Alina amatu ag'okuwulira, awulire: ¹⁰ Awo bwe yabbaire yeka, abo ababbaire bamwetooloire n'eikumi n'ababiri ne bamubuulya ku ngero egyo. ¹¹ N'abakoba nti Imwe mwaweweibwe ekyama ky'obwakabaka bwa Katonda: naye badi ab'ewanza, byonabyona bibabbeera mu ngero: ¹² bwe babona babone, ne bateetegerezia; era bwe bawulira bawulire, ne batategeera; koizi baleke okukyuka era, okusonyiyibwa. ¹³ N'abakoba nti Temumaite lugero luno? kale mulitegeera mutya engero gyonagyona? ¹⁴ Omusigi asiga kigambo. ¹⁵ Bano niibo b'okumbali kw'engira, ekigambo bwe kisigibwa; awo bwe bawulira, amangu ago Setaani n'aiza n'atoolamu ekigambo ekyasiigiibwe mu ibo. ¹⁶ Ne bano batyo niibo badi abasigibwa awali enjazi, abo, bwe bawulira ekigambo, amangu ago bakikirirya n'eisanyu; ¹⁷ ne batabba n'emizi mu ibo, naye bamala ekiseera kitono; awo bwe wabbaawo okubona enaku oba kuyiganyizibwa olw'ekigambo, amangu ago beesitala. ¹⁸ N'abandi niibo badi abasigibwa awali amawa; abo, bwe bawulira ekigambo, ¹⁹ awo emitawaana gy'ensi n'obubbeyi bw'obugaiga, n'okwegomba kw'ebindi byonabyona bwe biyingira bizisia ekigambo, ne kitabala; ²⁰ n'abo niibo badi abasigibwa awali eitakali eisa; abawuliire ekigambo, abakikirirye, abandi ebibala asatu, n'enkaaga, n'ekikumi. ²¹ N'abakoba nti Etabaaza ereetebwa okuteekebwa mukati mu kiibo, oba wansi w'ekitanda, n'eteteekebwa waigulu ku kikondo? ²² Kubanga wabula kigisibwa, naye kirimanyibwa; waire ekyagisiibwe, naye kiriboneka mu lwatu. ²³ Buli alina amatu ag'okuwulira, awulire. ²⁴ N'abakoba nti Mwekuume kye muwulira: mu kipimo mwe mupimira mweena mwe mulipimirwa: era mulyongerwaku. ²⁵ Kubanga, alina aliweebwa: n'abula alitoolebwaku n'ekyo ky'ali nakyo. ²⁶ N'akoba nti Obwakabaka bwa Katonda buli buti, ng'omuntu bw'amansia ensigo ku itakali; ²⁷ n'agona n'asituka obwire n'emisana, n'ensigo n'emeruka n'ekula, iye nga tamaite bw'emerukire. ²⁸ Ensi ebala yonka, okusooka kakoola, ate kirimba, ate ŋaanu enkulu mu kirimba. ²⁹ Naye emere bw'eyenga, amangu ago ateekaku ekiwabyo, kubanga okukungula kutuukire. ³⁰ N'akoba nti Twbufaananya tutya obwakabaka bwa Katonda? Oba twabunyonyolera ku kifaananyi ki? ³¹ Bufaanana ng'akampeke aka kaladaali, ako, bwe kasigibwa mu itakali, waire nga niiko katono okusinga ensigo gyonagyona egiri mu nsi, ³² naye bwe kasigibwa kakula, kabba kanene okusinga eiva lyonlyona, kasuula amatabi amanene kale era enyonyi egy'omu ibbanga ne gisobola okutyama wansi w'ekiwokyo kyagwo. ³³ N'abakoba ekigambo mu ngori nyingi ng'egyo, nga bwe basoboka okukiwulira: ³⁴ teyatumwire nabo awabula lugero: naye n'ategeezianga abayigirizwa be iye byonabyona mu kyama. ³⁵ Awo ku lunaku olwo bwe bwabbaire buwungeire, n'abakoba nti Tuwunguke tutuuke emitala w'edi, ³⁶ Bwe baalekere ekibiina, ne bamutwalira mu lyato, nga bwe yabbaire, Era n'amaato agandi gabbaire naye. ³⁷ Awo omuyaga mungi ne gwiza, amayengo ne gayiika mu lyato, n'eryato lyabbaire nga lyaba okuzula. ³⁸ Iye mwene yabbaire agonere mu kiwenda ku kigugu, ne bamuzuukya, ne bamukoba nti Omuyigiriza, tofaayo nga tufa? ³⁹ N'azuuka, n'abogolera omuyaga, n'akoba enyanza nti Sirika, teeka. Omuyaga ne gwikaikana, n'ebba nteefu inu. ⁴⁰ N'abakoba nti Kiki ekibatiisya? Mukaali kubba n'okwikirirya? ⁴¹ Ne batya entiisia nene, ne bakobagana nti Kale ono niiye ani, kubanga omuyaga n'enyanza bimuwulira?