¹ Ne batuuka emitala w'enyanza mu nsi y'Abagerasene. ² Bwe yaviire mu lyato, amangu ago omuntu eyabbaireku dayimooni eyaviire mu ntaana n'amusisinkana, ³ eyagonaanga mu ntaana; nga wabula muntu asobola kumusiba, waire ku lujegere, ⁴ kubanga emirundi mingi yateekeibwe mu masamba, no mu njegere, enjegere n'agikutula, n'amasamba n'agamenyaamenya: ne watabba muntu wa maani okumusobola. ⁵ Naye bulijjo, obwire n'emisana, yakungiranga mu ntaana no ku nsozi, ne yeesala n'amabbaale. ⁶ Bwe yalengeire Yesu ng'akaali wala, n'airuka n'amusinza; n'akunga n'eidoboozi inene ⁷ ng'akoba nti Onvunaana ki, Yesu Omwana wa Katonda, Ali waigulu einu? Nkulayizia Katonda, tombonerezia. ⁸ Kubanga yamukobere nti Va ku muntu ono, iwe dayimooni. ⁹ N'amubuulya nti Eriina lyo niiwe ani? N'amukoba nti Eriina lyange Liigyoni; kubanga tuli bangi. ¹⁰ N'amwegayirira inu aleke okumubbinga mu nsi eyo. ¹¹ Awo ku lusozi wabbairewo eigana ly'embizi inene nga girya. ¹² N'amwegayirira, ng'amukoba nti Tusindike mu mbizzi tugiyingiremu. ¹³ N'amwikirirya, Dayimooni n'avaamu, n'ayingira mu mbizi: eigana ne lifubutuka ne liserengetera ku ibbanga mu nyanza, gyabbaire ng'enkumi ibbiri, ne zifiira mu nyanza. ¹⁴ Awo Ababbaire bagirunda ne bairuka, ne babuulira ab'omu kibuga, n'ab'omu byalo, ne baiza okubona ebibbairewo bwe biri. ¹⁵ Ne batuuka awali Yesu, ne babona eyabbaireku dayimooni ng'atyaime, ng'avaire nga alina amagezi, oyo eyabbaireku liigyoni; ne batya. ¹⁶ Abandi ne babanyonyola ebimubbaireku oyo eyabbaireku dayinooni, era n'eby'embizi. ¹⁷ Ne batandika okumwegayirira okuva mu nsalo gyabwe. ¹⁸ Awo bwe yabbaire ng'asaabala mu lyato, oyo eyabbaireku dayimooni n'amwegayirira abbe naye. ¹⁹ N'atamuganya, naye yamukobere nti Yaba eika mu babo, obakobere bwe biri ebikulu Katonda by'akukoleire, no bw'akusaasiire. ²⁰ N'ayaba, n'atandika okubuulira mu Dekapoli bwe biri ebikulu Yesu bye yamukoleire. Abantu bonabona ne beewuunya. ²¹ Awo Yesu bwe yawungukire ate mu lyato n'atuuka eitale, ebibiina bingi ne bikuŋaanira w'ali; iye ng'ali kumpi n'enyanza. ²² Omumu ow'oku bakulu b'eikuŋaaniro, eriina lye Yayiro, n'aiza; bwe yamuboine, n'avuunama ku bigere bye, ²³ n'amwegayirira inu ng'akoba nti Omuwala wange omutomuto ali kumpi okufa: nkwegayirira oize, omuteekeku emikono gyo, aire mu mbeera ye, alamuke. ²⁴ N'ayaba naye; ekibiina ekinene ne kimusengererya, ne bamunyigirirya. ²⁵ Awo omukali eyabbaire alwaire ekikulukuto ky'omusaayi emyaka ikumi naibiri, ²⁶ eyatengejere einu eri abasawo abangi, n'awangayo bye yabbaire nabyo byonabyona, so n'atabbaaku kimugasa, naye ne yeeyongeranga bweyongeri okulwala, ²⁷ bwe yawuliire ebigambo bya Yesu, n'aizira mu kibiina enyuma we n’akoma ku kivaalo kye. ²⁸ Kubanga yakobere nti Bwe nkomaku obukomi ku bivaalo bye, naawona. ²⁹ Amangu ago ensulo ey'omusaayi n'ekala, n'ategeera mu mubiri gwe ng'awonyezeibwe ekibonyoobonyo kye. ³⁰ Amangu ago Yesu bwe yategeire mukati mu iye amaani agamuviiremu, n'akyuka mu kibiina n'akoba nti Yani ankwaite ku bivaalo byange? ³¹ Abayigirizwa be ne bamukoba nti Obona ekibiina bwe bakunyigirirya, n'okoba nti Yani akukwaiteku? ³² Ne yeetooloolya amaiso okubona oyo akolere ekigambo ekyo. ³³ Naye omukali ng'atya ng'atengera, ng'amaite ky'abbaire, n'aiza n'afukamira mu maiso ge, n'amukobera eby'amazima byonabyona. ³⁴ N'amukoba nti Muwala, okwikirirya kwo kukuwonyery; weyabire n'emirembe, owonere dala ekibonyoobonyo kyo. ³⁵ Awo bwe yabbaire nga akaali atumula, abaaviire ew'omukulu w'eikuŋaaniro ne baiza, nga bakoba nti Omuwala wo afiire; oteganyirya ki ate Omwegeresya? ³⁶ Naye Yesu n'atatekakaku mwoyo ku kigambo ekitumwirwe, n'akoba omukulu w'eikuŋaaniro nti Totya, ikirirya bwikiriri. ³⁷ N'ataganya muntu kwaba naye wabula Peetero no Yakobo, no Yokaana, mugande wa Yakobo. ³⁸ Ne batuuka ku nyumba y'omukulu w'eikuŋaaniro, n'abona okwazirana, n'abakunga, n'abakubba ebiwoobe ebingi. ³⁹ Awo bwe yayingiire n'abakoba nti Kiki ekibaiziranya n'ekibakungisya? omuwala tafiire, naye agonere bugoni. ⁴⁰ Ne bamusekerera inu. Naye bwe yabafulumirye bonabona, n'atwala Itaaye w'omuwala no maye naabo Ababbaire naye, n'ayingira omuwala mw'ali. ⁴¹ Awo n'akwata omukono gw'omuwala, n'amukoba nti Talusa kumi okutegeezebwa kwakyo nti muwala, nkukoba nti Golokoka. ⁴² Amangu ago omuwala n'agolokoka, n'atambula; kubanga yabbaire yaakamala emyaka ikumi n'aibiri. Amangu ago ne bawuniikirira okuwuniikirira kunene. ⁴³ N'abakuutira inu buli muntu yenayena aleke okukimaaya ekyo: n'alagira okumuwa eky'okulya.