¹ N'ayingira ate mu ikuŋaaniro; mwabbairemu omuntu eyabbaire n'omukono ogukalire. ² Ne bamulabirira oba yamuwonyerya ku lunaku lwa sabbiiti, era bamuloope. ³ N'akoba omuntu eyabbaire n'omukono ogwakalire nti Yemerera wakati awo. ⁴ Awo n'abakoba nti Niikyo ekisa ku lunaku lwa sabbiiti okukola okusa iba okukola kubbiibi? kuwonya bulamu iba kwita? Naye ne basirika busiriki. ⁵ Bwe yabetooloire amaiso n'obusungu, ng'anakuwaire olw'okukakaayala kw'emyoyo gyabwe, n'akoba omuntu ati Golola omukono gwo. N'agugolola: omukono gwe ne guwona. ⁶ Amangu ago Abafalisaayo ne bavaamu ne bateesia n'Abakerodiyaani ku iye, nga bwe bamuzikirizia. ⁷ Awo Yesu n'abayigirizwa be ne baaba ku nyanza, ebibiina bingi ne bimusengererya ebyaviire e Galiraaya n'e Buyudaaya ⁸ e Yerusaalemi ne Idumaya n'emitala wa Yoludaani, n'abaliraine e Ttuulo n'e Sidoni, ekibiina kinene, bwe baawuliire bye yakolere, ne baiza gy'ali. ⁹ N'akoba abayigirizwa be eryato eitono limubbanga kumpi ebibiina bireke okumunyigirirya; ¹⁰ kubanga yawonyerye bangi, n'okugwa abalwaire ne bamugwaku bamukwateku, bonabona Ababbaire balina ebibonyoobonyo. ¹¹ Dayimooni ababbiibi boona bwe baamuboine ne bagwa mu maiso ge ne bakakunga nga bakoba nti Iwe Mwana wa Katonda. ¹² N'abakuutira inu baleke okumwatiikirirya. ¹³ Awo n'aniina ku lusozi n'abeeta gy'ali b'ataka: ne baaba gy'ali. ¹⁴ N'ayawulamu eikumi n'ababiri okubbanga awamu naye, era abatumenga okubuulira, ¹⁵ n'okubba n'obuyinza okugobanga emizimu: ¹⁶ Simooni n'amutuuma eriina Peetero; ¹⁷ no Yakobo omwana wa Zebbedaayo, no Yokaana, mugande wa Yakobo; boona n'abatuuma amaina Bowanerege, amakulu gaalyo nti Baana bo kubwatuka: ¹⁸ no Andereya no Firipo, no Battolomaayo, no Matayo, no Tomasi, no Yakobo omwana wa Alufaayo, no Saddayo, no Simooni Omukananaayo, ¹⁹ no Yuda Isukalyoti, niiye yamuliiremu olukwe. N'aiza mu nyumba, ²⁰ ekibiina ne kikuŋaana ate, n'okusobola ne batasobola no kulya mere. ²¹ Awo ababe bwe baawuliire ne bafuluma okumukwata, kubanga bakobere nti Alalukire. ²² Awo abawandiiki abaaserengetere okuva e Yerusaalemi ne bakoba nti Alina Beeruzebuli, era nti Abbinga dayimooni ku bwo mukulu wa badayimooni. ²³ N'abeeta gy'ali, n'abakobera mu ngero nti Setaani asobola atya okubbinga Setaani? ²⁴ Obwakabaka bwe bwawukanamu bwo bwonka, obwakabaka obwo tebusobola kwemerera. ²⁵ N'enyumba bw'eyawukanamu iyo yoka, enyumba eyo terisobola kwemerera. ²⁶ Era oba Setaani yeegolokokeireku iye yenka, n'ayawukanamu, tasobola kwemerera, naye awaawo. ²⁷ Naye wabula muntu asobola okuyingira mu nyumba y'omuntu ow'amaani okunyaga ebintu bye, nga tasookere kusiba oyo ow'amaani, kaisi n'anyaga enyumba ye. ²⁸ Mazima mbakoba nti Abaana b'abantu balisonyiyibwa ebibbiibi byabwe byonabyona, n'obuvooli bwabwe bwe balivoola bwonabwona; ²⁹ naye oyo yenayena eyavoolanga Omwoyo Omutukuvu abula kusonyiyibwa emirembe n'emirembe, naye akolere omusango ogw'ekibbiibi eky'emirembe n'emirembe: ³⁰ kubanga bwatumula nti Alina dayimooni. ³¹ Awo maye na bagande ne baiza, ne bamutumira ne bamweta nga bemereire ewanza. ³² N'ekibiina kyabbaire kityaime nga bamwetooloire; ne bamukoba nti bona, mawo na bagande bo bali wanza bakusagira. ³³ N'abairamu ng'akoba nti Mawange niiye ani na bagande bange? ³⁴ n'abeetooloolya amaiso Ababbaire batyaime enjuyi gy'onagyona nga bamwetooloire n'akoba nti Bona, mawange na bagande bange! ³⁵ Kubanga buli muntu yenayena ayakolanga Katonda by'ataka, oyo niiye mugande wange, ye mwanyinanze, niiye mawange.