¹ Awo enaku bwe gyabitirewo n'ayingira ate mu Kaperunawumu, ne kiwulirwa ng'ali mu nyumba. ² Ne bakuŋaana bangi, n'okutuukawo ne batatuukawo ate waire mu mulyango: n'ababuulira ekigambo. ³ Ne baiza abaaleeta omulwaire akoozimbire nga bamwetikire bana. ⁴ Naye bwe baalemereirwe okumusemberera olw'ekibiina, ne babikkula waigulu ku nyumba we yabbaire: ne bawumulawo ekituli ne bamwikirya ku kitanda akoozimbire kwe yabbaire agalamiire. ⁵ Yesu bwe yaboine okwikirirya kwabwe n'akoba akoozimbire nti Mwana wange, ebibbiibi byo bikutooleibweku. ⁶ Naye wabbairewo abawandiiki abamu nga batyaime nga balowooza mu myoyo gyabwe nti ⁷ Ono kiki ekimutumulya atyo? Avoola: yani ayinza okutoolaku ebibbiibi wabula mumu, niiye Katonda? ⁸ Amangu ago Yesu bwe yategeire mu mwoyo gwe nga balowooza batyo munda yaabwe n'akoba nti Kiki ekibalowoozesya ebyo mu myoyo gyanyu? ⁹ Ekyangu kiriwaina? okukoba akoozimbire nti Ebibbiibi byo bikutooleibweku; oba okukoba nti Golokoka, weetike ekitanda kyo oyabe? ¹⁰ Naye mumanye nga Omwana w'omuntu alina obuyinza ku nsi okutoolaku ebibbiibi n'akoba akoozimbire nti ¹¹ Nkukoba, Golokoka, weetikke ekitanda kyo, oireyo mu nyumba yo. ¹² N'agolokoka, ne yeetika amangu ago ekitanda, n'afuluma mu maiso gaabwe bonabona; awo ne beewuunya bonabona ne bagulumizia Katonda nga bakoba nti Tetubonangaku tuti. ¹³ N'avaawo ate n'ayaba ku lubalama lw'enyaza; ebibiina byonabyona ne baiza w'ali, n'abegeresya. ¹⁴ Awo bwe yabbaire ng'abita, n'abona Leevi omwana wa Alufaayo ng'atyaime mu gwoolezio, n'amukoba nti Bita nanze. N'agolokoka n'abita naye. ¹⁵ Awo bwe yabbaire ng'atyaime mu nyumba y'oyo ng'alya, abawooza bangi n'ababbaire n'ebibbiibi ne batyama wamu no Yesu n'abayigirizwa be; kubanga babbaire bangi, abaabire naye. ¹⁶ Abawandiiki ab'omu Bafalisaayo bwe baamuboine ng'alya wamu n'abalina ebibbiibi n'abawooza, ne bakoba abayigirizwa be nti Alya era anywira wamu n'abawooza n'abalina ebibbiibi. ¹⁷ Awo Yesu bwe yawuliire n'abakoba nti Abalamu tebeetaaga musawo, wabula abalwaire: tinaizire kweta batuukiriru wabula abalina ebibbiibi. ¹⁸ Awo abayigirizwa ba Yokaana n’ab’Abafalisaayo babbaire nga basiiba; ne baiza ne bamukoba nti Kiki abayigirizwa ba Yokaana n'abayigirizwa b'Abafalisaayo ekibasiibya, abayigirizwa bo nga tebasiiba? ¹⁹ Yesu n'abakoba nti Abaana b'obugole bayinza batya okusiiba akweire omugole ng'ali nabo? mu biseera byonabyona nga bali naye akweire omugole, tebasobola kusiiba. ²⁰ Naye enaku girituuka, akweire omugole lw'alibatoolebwaku: Kaisi basiiba ku lunaku olwo. ²¹ Wabula muntu atunga ekiwero eky'olugoye oluyaka ku kivaalo ekikaire; bwe kibba kityo kidi eky’oku kizibawo kikutula kidi, ekikaire ekiyaaka, ekituli ne kyeyongera. ²² Era wabula muntu afuka omwenge omusu mu nsawo egy'amawu enkaire: bwe kiba kityo omwenge gwabya ensawo egy'amawu, omwenge ne gufaafaagana n'ensawo egy'amawu gyoonooneka; naye omwenge omusu gufukibwa mu nsawo egy'amaliba enjaka. ²³ Awo Olwatuukire yabbaire ng'atambula mu nimiro ku lunaku lwa sabbiiti; abayigirizwa be ne batandika okwaba nga banoga ebirimba. ²⁴ Abafalisaayo ne bamukoba nti bona, kiki ekibakozesya eky'omuzizo ku lunaku lwa sabbiiti? ²⁵ N'abakoba nti Temusomangaku Dawudi kye yakolere, bwe yabbaire nga yeetaaga, n'alumwa enjala iye n'abo be yabbaire nabo? ²⁶ Bwe yayingiire mu nyumba ya Katonda, Abiyasaali bwe yabbaire nga niiye kabona asinga obukulu, n'alya emigaati egy'okulaga, egy'omuzizo okuliibwaku wabula bakabona, n'agiwa ne be yabbaire nabo? ²⁷ N'abakoba nti Sabbiiti yabbairewo ku lwo muntu, so omuntu ti ku lwa ssabbiiti: ²⁸ kityo Omwana w'omuntu niiye mukama wa sabbiiti yoona.