¹ Ango do ako neno malo anyen kede lobo anyen, pien malo me agege kede lobo me agege oudo otieko rwenyo, doko nam da oudo do odoko li. ² Di do ango, Yokana, ako neno Yerusalem anyen, di tie bino piny di ewok imalo kibut Rubanga, di oike bala ateran kame otubuso pi cware. ³ Di ango ako winyo dwan amalo di ewok imalo di eyamo be, "Neningo!, paco ka Rubanga tie kede jo, en do eyaro bedo kede gi. Di gin do iko doko jo mege, Rubanga en ikome bino bedo kede gi di eko bedo Rubanga gi. ⁴ Di Rubanga ko weno tenge pige wang i wang gi acelacel, to do likame bobo bedo tie, akadi iturur, akadi koko, aramo da lika bobo bino bedo tie, pien jame alem tie otieko kato. ⁵ Di do en ngat koudo tie bedo ikom me ajakanut oko waco be, "Neningo! ango aloko jame dedede odoko nyen." Di en eko waco na be, "Wandiko, pien kope nogi obedo me ateni di igenere." ⁶ Di eko waco na be, "etieko timere! ango en Alpha kede Omege, agege kede ajikini. Ango abino mino pi me kuo me nono but ngat kame winyo orio pii. ⁷ Ngat kame bino lono bino udo jame dedede, di ango ako doko Rubanga mere, di en eko doko woda. ⁸ Do jo alwor, kalika yei, jo omunawun, jo nek, jo caro, jo jwogi, jo kame woro cal jwogi, kede jo angalo dedede bino udo kabedo gi inam kame liel kede mac kede salupa. Kobedo to me are." ⁹ Dido acel ikom imalaikan kanyare kame udo tie kede bakulin kanyare me egere me can kanyare me ajikini, oko bino buta di ewaco na be, "Bia, amito nyuto ni ateran, dako me atin romo." ¹⁰ Di eko tinga tenge i cuny iwi moru apire dwong di ebor malo, di eko nyuto na bomba adwong, Yerusalem kacil, di ewok i malo kibut Rubanga dwogo piny. ¹¹ Di etie kede deyo ka Rubanga , rienu mere oudo cal bala kidi me wel, bala kidi me jesipa, di emilimili bala akako. ¹² Di dokon etie kede twon apama abor malo kede irutei tomon kiwie are, kede malaikan tomon kiwie are iye irutei nogi, di owandiko nying ikom gi, kobedo nying me atekerin tomon kiwie are me idwe me Isiraeli. ¹³ Irutei adek tetu kide, irutei adek tetu malo, irutei adek tetu piny, kede irutei adek tetu tim. ¹⁴ Oudo apama me bomba tie kede acakini me gedo tomon kiwie are, do ikom gi oudo owandiko nying tomon kiwie are me joor me atin romo. ¹⁵ Do ngat oudo tie yamo keda oudo mako lilim me sabu pi pimo bomba, irutei mege, kede apama mere. ¹⁶ Osipo bomba ni di etie bad ongwon kame rorom dedede, boro mere rom aroma kede laco mere. Di eko pimo bomba kede lilim, mairon mege oudo tuno tutumia tomon kiwie are (boro mere, laco mere kede boro malo oudo dedede rorom). ¹⁷ Dido en eko pimo apama mere, kubitin tol acel i ot ongwon iwie ongwon, di lubere kede epone kame opimo kede, en obedo me ka malaika. ¹⁸ Oudo ogero apama mere kede jasipa, di bomba noni oudo obedo saabu ikokome, bala gilasi amilimili. ¹⁹ Oudo kotubuso acakini me apama me bomba ni kede kide apapat me wel amalo, acakini me gedo me agege oudo obedo me jasipa, me are oudo obedo sapir, me adek agate, me ongwon emeradi. ²⁰ Me kany onik, me kanyape saridia, me kanyare kirisolit, me kanyauni beril, me kanyangon topas, me tomon kiri sopures, me tomon kiwie acel jasinti kede me tomon kiwie are ametisit. ²¹ irutei tomon kiwie are oudo obedo kide tomon kiwie are me wel amalo. Erute acelacel ikom gi oudo obedo me kidi acel me wel amalo, do gudo me bomba oudo obedo me saabu acal bala gilasi icararai. ²² Do ango likame ako neno tempulo iiye, piento Rwot Rubanga won twer kede atin romo en obedo tempulo mere. ²³ Bomba ni oudo lika tie kede mit me ceng amoto duwe pi rieny iye, pien oudo deyo ka Rubanga rieny iye, atin romo en lero mere. ²⁴ Dido atekerin me jo koyei bino ot i lero mere. Di abakai me lobo ko kelo deyo kede wor gi iye. ²⁵ likame obino cego irutei gi iceng, di iwor likame bino bedo tie kuno ²⁶ Di gin iko kelo deyo kede wor me atekerin iye, ²⁷ Do likame tie epone kame gi kalikame cil donyo kede iye, amoto tim me emuna arabo kop me abe, do jogo kenekene kame owandiko nyingi itabu me kuo me atim romo.