¹ Di ango ako neno malaika bino piny di wok kimalo, emako sumulito me bur kame ajikini me tuto mere likame tie, kede eriko kame tek icinge. ² Di en eko dong di emako twol, twol kariki a sek mere, kame obedo jwogi kede sitani, di eko tweno pi mwaka tutumia acel. ³ Di oko uce kibur katut kame ajikini mere li, di oko mwone kiye, di oko keto alama ikome me anyut, me wek kur bobo engal atekerin tuno kede ka mwaka tutumia acel oromo, di icen mere di oko jajaro en anonok pi kare moro. ⁴ Di ako neno ajakanut, di gin ki ko bedo ikom di oko ngolo negi kop, di ango ako neno tipo me jo kame riki kongolo wi gi pi mino ijura ikom Yesu, kede pi kop ka Rubanda, di likame kiworo le, amotoko cal mere, amotoko yei keto alama mere moto itur nyim gi, ara icing gi, di gin kiko bedo di kipugo kede Rwot pi mwaka tutumia acel. ⁵ Do jo atot oto likame oko dwogo ikuo tuno kede romo mwaka tutumia acel, manoni en kiyarun me agege. ⁶ Winyo kede cilo tie but jo oudo agege me ki yarun! kikom jogo pi to me are likame tie kede twer. Do gin kiyaro bedo jo saseredoti ka Rubanga kede me a Kristo, di kiko pugo kede en pi mwaka tutumia acel. ⁷ Di kame mwaka tutumia acel otiek, kobino gonyo sitani ki ot kol. ⁸ Di eko donyo oko ngalo atekerin kame opokopoko iya adulio ongwon me lobo, Gog kede Magog en oyaro coko gi pi yii, gin ki tot bala asinge me dog nam. ⁹ Di gin kiko ot isarakin kilobo, do kiko luko kabedo me jo kacil, kede bomba kame Rubanga maro. Di mac kobino imalo tuno piny ki but Rubanga Papa wa di ko muducaro gi. ¹⁰ Di sitani, kongalo gi nono, oko uce inam me mac kede salupa, kakame le kede inabin me angalo tie kiye. Di gin kiko bino neno can iceng kede iwor pi mwaka kede mwaka. ¹¹ Di ako neno twon kabedo atar me ajakanut, kede dano kobedo kiye. Kame inyime lobo kede malo oko rwenyo wir, dido kaketo gi okodoko li. ¹² Di ako neno jo oto, atino kede me awora, di ki cungo inyim Rubanga, di oko yabo itabun, di bobo oko yabo itabu ace, kame obedo itabu me kuo, di oko ngolo kop ne jo oto di olubo kop nogo kame kowandiko kiye itabun, di lubere kede tic angat acel acel. ¹³ Di nam adwong oko jalo jo oto kame oudo tie kiye, di to kede kabedo me jo oto da oko jalo jo oto kame oudo kitie kede, di oko ngolo ne gi kop, buli dano acel acel di lubo kede tic mere. ¹⁴ Di to kede kabedo me jo oto oko uco inam me mac kalikame too. Man obedo too me tien are - inam me mac. ¹⁵ Di ngat kalikame oudo kowandiko nyinge itabi me kuo, kouce inam me mac.