¹ . Di ako neno gianena ace i malo, kame tie me aura kede adwong, imalaikan kanyaare kame oudo tie kede alola me ajikini; pien gin oudo kipong kede lilo ka Rubanga. ² v 2. Di ako neno gikame cal bala nam kame meny bala gilasi kame onyalo kede mac: kede jo kame oudo olo le kede cal mere, karacel kede anyut mere kede namba me nyinge, di kitie cungo inget nam me gilasi, di kitie mako adugun ka Rubanga ³ . Di gin oudo kitie wero wer ka Musa ngatic ka Rubanga, kede me Katin Romo be, Rwot Rubanga Won Twer; tice ni dongodongo doko kibedo me aura, yote nin tie me ateni kede kopoore; in Abaka me jo kopoore. ⁴ . Ngai kalikame bino lwori, okwe Rwot; kede mino deyo inyingi? Pien in keni ibedo ngat acil: pien atekerin dedede bino bino di kiko mini wor; pien kope nin me ateni otieko neno. ⁵ . Icen ngei man, di ango ako neno tempulo me eema me isikan tie i malo di koyabo. ⁶ . Di imalaikan kanyaare oko wok i tempulo, di kitie kede alola kanyaare, oudo kingapo igoen atar liamaliam, di kotweo kor gi kede ausin me saabu. ⁷ . Di acel ikom leini ongwon oko mino malaikan kanyaare bakulin kanyaare me saabu kame opong kede lilo ka Rubanga; ngat kame bedo nakanaka. ⁸ . Di do yiro kame wok ki deyo ka Rubanga kede awok itwer mere oko pongo tempulo, oudo likame tie dano moro kame twero donyo i tempulo, tuno alola kanyaare kame imalaikan oudo okelo otieko cobere.