¹ Ango ako ngolaro, di ako neno atin romo di tie cungo iwi moru Sion. Di jo tutumia tol acel iyot ongwon iwie ongwon, kame owandiko nying papa itur nyim gi tie cungo kede. ² Di ango ako winyo dwan owok imalo, bala dwan me pii katot, di cal bala dwan me mwoc adwong. Di ako winyo dwan jo goc di tie gono adungu. ³ Di kitie wero wer anyen inyim kom me ajakanut, kede inyim gi acwea ongwon, kede inyim jo adongo. Do likame tie ngatamoro otwero pwonyo wer nono kwanyo jo tutumia tol acel iyot ongwon iwie ongwon, kame otieko lako ki piny. ⁴ Gin en jo kalikame oudo omunaun kede mon, pien gin kibedo jo kame lubo atin romo ikabedo kame en eoto iye lung. Gin en jo kame olako kibut jo, obedo anyakini me agege ibut Rubanga kede but atin romo. ⁵ Doko da dog gi likame oyamo gikarac, pien gin kibedo li kede raco moro inyim kom me ajakanut. ⁶ Ango ako neno malaika ace di tie por idiere diere me malo, di etie kede ejiri aperanaro pi tuco ne jo kame bedo piny, kede but atekerin, kede but abila me jo dedede, leb dedede kede jo dedede. ⁷ Di eyamo kede dwan amalo, "lwor unu Rubanga, di ikounu mino deyo bute, pien kare me ngol mere otuno da wor unu ngat kame otimo malo kede piny, kede nam, kede ariram me pii." ⁸ Kikano malaika ace bobo oko lubo, di eyamo be, "Babulon opoto, epoto, bomba adwong no, pien emio atekerin omato ebino me lilo pi tim me adote mere." ⁹ Di malaika me adek oko lubo gi, di eyamo kede dwan a malo be, "Kame ngatamoro omio wor but lee kede cal mere, di eko gamo alama mere itur nyime, amotoko icinge, ¹⁰ Dano nono da bino mato ebino me lilo ka Rubanga, kame oonyo iye i kopo me lilo abongo nyalo da. Do obino tidilo en kede mac kede salupa inyim imalaikan kacil, kede inyim atin romo. ¹¹ Di yiro me itidil gi bino ot malo naka naka, gin likame kibino wei iceng kede iwor da, jo kame oworo lee kede cal mere, kede ngata moro ogamo alama me nyinge. ¹² Mane en dire me jo kacil, magi en jo kame odaro cor ka Rubanga, kede yei Yesu" ¹³ Di ango ako winyo dwan imalo di yamo buta be, "Wandiko, winyo bed but jo kame too i Rwot geno nan ot inyime." "ee", di cuny yamo, "me wek gin ki wei ilole gi, di tice gi ko lubo gi." ¹⁴ Ango ako ngoloro, di ako neno polo atar. Ikom polo no tie dano abedo iye acal kede wot ka dano. Di etie kede ocoro me saabu iwie, di icinge emako pala abit. ¹⁵ Di malaika ace oko wok bobo i tempulo, di elelemo kede dwan amalo but ngat kame bedo ipolo di eyamo be, "cwai do pala ni, di iko kac, pien kare otuno pi in kac, pien kac me wi lobo ocek." ¹⁶ Dido ngat atie bedo iwi polo oko cwano pala iwi lobo, di eko kac. ¹⁷ Di malaika ace bobo oko wok ki tempulo ame tie malo, eda etie kede pala abit. ¹⁸ Malaika ace bobo oko wok iye alutari, kame tie kede twer ikom mac; di eko lelemo kede ilelem atek but mano kame tie kede pala kabit, di eyamo be, "Cwai pala ni abit, di iko coko abunge me olok iwi lobo, pien anyakini mege otieko cek kiber." ¹⁹ Di malaika oko cwano pala mere iwi lobo, en eko coko olok me wi lobo, di eko uco gi ibur adwong me lilo a Rubanga. ²⁰ Dido oko nyonyono olok ki ooko me bomba, pi bino di remo oko wok ikakame obiye iye nono kame imukurur mere romo puti kany, di alele mere da oko mol romo mairo tol are.