¹ . Di do iceng moro acel, kakame Yesu oudo tie kede pwonyo jo i tempulo kede di etuco ejiri, kame jodongo me josasedoti kede joangeo iswil karacel kede joadongo me adul oko bino bute, ² . kiko yamo kede di ki waco ne be, Wac ne wa, In itimo gigi kede akarinikin oyai ituai? doko ngai en komi akarinikin me timo gi no gi? ³ . En eko dwoko ne gi be, Ango da ayaro penyo wu gi acel; do idwokanu, ⁴ .ibatis kame bin Yokana otimo, obino kimalo arabo kibut jo? ⁵ . Gin kiko donyo poro kop ken gi ken gi di ki waco be, Kame wan owaco be ewok imalo, en eyaro waco be, Pinyo komio wun likame ikounu yei en? ⁶ . Do kame wan owaco be, Ewok kibut jo; jo dedede oyaro didipo wa, pien gin iyei be Yokana oudo obedo enabi. ⁷ . Di do gin kiko dwoko be, gin likame ingeo kakame ewok kiye. ⁸ . Yesu oko waco ne gi be, Ango da likame ayaro tuco ne wu kakame ango audo iye akarinikin me timo gigi. ⁹ . Di en eko cako yamo kede jo agole ni be, Bin dano moro oko pito poto me olok, di en eko pango ne jo pur icegun kame poro olok; en eko yai ot i piny abor pi kare abobor. ¹⁰ . Ikare kame olok cek kede, en eko cwano ngatic mere but jo kame en oudo emio pango poto; me wek imi eda anyakini moro owok ipoto; Do jo pur oko bunge di kiko riame tenge icinge nono. ¹¹ . Di bobo en eko cwano ngatic ace: gin bobo kiko bungo mano da, di kiko timo ne gi me lewic, kiko riame tenge icinge nono. ¹² . Bobo en eko cwano ngatic me adek: gin kiko udo ne mano awanon atek, di kiko uce oko me poto. ¹³ . Di do won poto me olok oko waco be, Abino timo benyo? Ayaro do cwano woda kame ango amaro, cengemogo kibino wore, kame gin kineno en. ¹⁴ . Do kakame jo kame oudo opango ne poto me olok oko nene kede, gin kiko winyere idyere gi ken gi ken gi di kiwaco be, Man en obedo musika mere, bia nu onekenu, me wek do poto me olok dok mer wan. ¹⁵ . Di do gin kiko uce ooko me poto me olok, kiko neke. Pi mano, nyo do kame won poto me olok bino timo ne gi? ¹⁶ . En eyaro bino di eko neko jo kame en emio gwoko poto me olok; di eko mino poto me olok mere but jo apat. Kakame gin iwinyo kede ni, gin kiko waco be, Mano likame twerere. ¹⁷ . Do Yesu oko ngoloro gi, eko waco be, Nyo ine kame owandiko be, Kidi me gedo kame jogedo odagi, en bobo oko doko kidi me esonda? ¹⁸ . Ngatamoro kenekene kame poto iwi kidi nono, bino tuturo en; do ngat kame kidi noni poto ikome, ebino ngingido en doko apua. ¹⁹ . Di do esawa nono jodongo me Josasedoti kede joangeo iswil, oko mito neke, do gin kiko lworo jo; pien gin oudo itie kede niang be Yesu oudo tie yamo agole noni pi gecao gin. ²⁰ . Gin kiko cako kine, kiko cwano jo pi kino kop me doge; kame oudo cukere bala jo kame beco, me wek gin i ud kop moro idoge, tetekeny gin iko make iko tere kete icing me ngapug. ²¹ . Gin kiko penye be, Ngadwong wan ongeo be in iyamo doko ipwonyo gi me ateni, doko in likame itie kede apokapoka, do ipwonyo kop me yongayo ka Rubanga i ateni. ²² . Iswil yei ne wan culo esolo but Kaisari arabo li? . ²³ . Do Yesu oko niang gikame gin oudo kitie mito, en eko waco ne gi be, pinyo komio itie nu tamo cunya? ²⁴ . Nyutanu ber sente akaya. Cal kede iwadik ka ngai en kame tie iye? Gin kiko dwoko di iwaco be, Me ka Kaisari. ²⁵ . En eko waco ne gi be, Pi mano miunu Kaisari jame kame poore mino Kaisari kede ikounu mino jame ka Rubanga da but Rubanga. ²⁶ . Do gin likame kiko twero udo kop moro idoge idyere me jo, kiko bedo kede ur i epone kame en edwoko kede peny, di do kiko ling. ²⁷ Di Isadukayon mogo oko bino bute, kame oudo dagi be iyarun me jo oto tie; gin kiko penye, ²⁸ . di kiwaco be, Ngadwong, Musa bin owandiko ne wan be, kame omime dano moro oto, kame tie kede dako, do en eko to eweko dako no abongo idwe, omimere myero ter dako nono, di eko nywalo idwe ne omimere. ²⁹ . Oudo riki tie imiegu mogo kanyaare, awobi me agege oko nyomo dako, en eko to di likame enywal. ³⁰ . Awobi me are oko tero dako nono doko mere, eda eko to abongo atin moro. ³¹ . Awobi me adek da oko tere bedo dako mere, i epone acel nono da awobe go dedede kanyaare oko bedo kede dako ni; gin kiko to di likame inywalo ne dako ni atin moro. ³² . Icen mere dako ni da oko to. ³³ . Pi mano iceng me iyarun dako ni do bino bedo me kangai? Pien cuo kanyaare nogi dedede obedo kede bala dako gi. ³⁴ . Yesu oko dwoko ne gi di ewaco be, Jo me lobo kan nyomere doko komio gi me anyoma; ³⁵ . Do jo kame oyaro maro pi bedo jo me lobo kame bino bino kede i iyarun me jo oto, likame nyomere doko likame obino mino gi me anyoma. ³⁶ . Doko gin likame ibino to atwal, pien gin irom aroma kede imalaikan; da kitie idwe ka Rubanga, kame tie idwe me iyarun ³⁷ . Nan bala kame jo oto bino yaruno kede, akadi Musa da bin onyuto ne i abum, kakame en elwongo kede nying Rwot, Rubanga ka Aburaamu, kede Rubanga ka Isaka kede Rubanga ka Yakobo. ³⁸ . Pien en likame ebedo Rubanga me jo oto, do me jo kame kuo pi en. ³⁹ . Di mogo ikom joangeo iswilia oko dwoko be, Ngadwong, iyamo kakare. ⁴⁰ . Ingei mago, likame bobo gin kiko kanyakino meedo penye kop moro. ⁴¹ . Yesu oko waco ne gi be, Benyo kame gin iyamo kede be Krisito obedo wot ka Daudi? ⁴² . Di Daudi da kikome bin oyamo i itabu me Sabuli be, Rwot Rubanga owaco ne Rwot na be, Bed ibada tetu cam, ⁴³ . paka tuno ango mini inyono jokwor ni piny i tieni. ⁴⁴ . Pi mano kame Daudo da olwonge be Rwot, benyo benyo kame en etwero bedo kede bobo wot ka Daudi? ⁴⁵ . Di en eko waco ne josiao mege di jo dedede tie winyo be, ⁴⁶ . Gwokere nu ikom jopwony me iswil, gin kimaro ot di kingapo ikanson, di kimito be di komoto gi i atalen kede bedo ikomini icelelei malo isinagogan, kede kimaro bedo kabedo me wor ika ibagai. ⁴⁷ . Gin jo kame camaro jame me apuserun, doko ilego ilaga oboco pi nyutere; jo nogi bino udo ngolokop atek.