¹ . Yesu oko tatamo negi agole kame pwonyo, be jo poore lego nakanakadi likame ki kwanyo cuny gi. ² . En ewaco negi be, “Bin tie ibomba moro ngangol kop kalikame woro Rubanga, di likame eparo pi dano moro da: ³ . Kede da oudo tie Apuserut moro ibomba nono, kame bole but ngangol kop nono di ebako doge be, okwe konya kede ngat kame ango atie pido kede. ⁴ . Likame eko yei pi kare moro do icen mere, eko yamo kene, akadi likame aworo Rubanga arabo aparo pi dano. ⁵ . Do apuserut ni ocobuno ango bino konye pien ka li lole mere buta bino oola. ⁶ . Dido Rwot oko waco be “Winyunu gi kame ngangol kop kame li kede poore waco. ⁷ . Benyo Rubanga likame bino konyo jo mege kame en eyero, kame kok bute iceng kede iwor benyo egal kede konyo gi? ⁸ . Awaco ne wu be ebino konyo gi awakawaka. Bed bala kamanono da ka wot ka dano odwogo ebino udo yei tie iwilobo? ⁹ . Yesu bobo oko waco agole ni but jo kame keto gen ikuo gi ken gi be gin kipoore di kicao jo icegun. ¹⁰ . Cuo are bin ooto donyo itempulo ilega, ngat acel oudo obedo ngaparisayo, do ngat oclu ngarar esolo. ¹¹ . Eparisayot oko yai malo, di eko ilega eliling icunye kene be, Rubanga Apwoyi, ango kara likame acal kede jo ace apat, bala nat jo yak, jo dubo, jo adote ara akadi bala ngarar esolo ni da. ¹² . Ango ari kec tien are buli sabiti acel, amio acel me tomon me gi dedede kame ango atie kede. ¹³ . Do ngarar esolo oko cungo kitenge, di likame eko tingo wange malo en eko bapo kore di ewaco be; Rubanga okwe tima kisa ango ngadubo. ¹⁴ . “Awaco ne wu, icuo ni ooto i ode di edoko dano kopoore lono ocelu; pien ngat kame tingere kene kobino dwoke piny, do ngat kame cone kobino tinge malo.” ¹⁵ . Kiko kelo ne idwe katino me wek eket cinge ikom gi, do kakame josiao mege oneno kede kamanono gin kiko donyo binano gi be kiweki. ¹⁶ . Do Yesu oko lwongo gi bute di eko waco be wekunu idwe katino bin buta kur igengunu gi; Pien Ajakanut ka Rubanga tie pi jo kame cal bala giri. ¹⁷ . Ateteni awaco ne wu be, ngat kalikame gamo Ajakanut ka Rubanga bala atin atitidi likame bino donyo iye. ¹⁸ . Bobo Ngatel moro oko penye di eyamo be, Apwony abr, atim nyo me wek aud kuo me nakanaka? ¹⁹ . Yesu oko penye be, pinyo komio in ilwonga ne ngat kame ber? Likame tie ngat kame ber, do kwanyo Rubanga kenekene. ²⁰ . Mam in ingeo cik gi, kur itimo adote, kur ineko, kur ikwalo kur imio ijura me abe, wor papa ni kede toto ni? ²¹ . En eko waco be, gigi dedede ango abedo Lubo cako di pwodi ango atin paka nan. ²² . Nan do kakame Yesu owinyo kede kope nogi, en eko waco ne be irem kede gi acel; cat gidedede kame itie kede iko popoko ne jo can sente kame iudo, di iko bino luba. ²³ . Do kakame ewinyo kede kop noni cunye oko nyoote pien oudo ebedo ngat kobaro twatwal. ²⁴ . Kakame Yesu oneno kede be cunye opong kede iturur, eko waco be etek tin benyo ne jo kobaro pi donyo iye Ajakanut ka Rubanga. ²⁵ . Pien eyoyot ne aguragura donyo iwang piso, kalamo ngabar donyo i Ajakanut ka Rubanga. ²⁶ . Dido jo kowinyo kope nogi oko waco be ngai do en kame karuno udo alako? ²⁷ . En eko waco be gi kalikame twerere kibut dano, twerere kibut Rubanga. ²⁸ . Di Petero oko waco be neningo wan otieko weko gidedede di oko Lubi. ²⁹ . Di eko waco negi be ateteni awaco ne wu, be likame tie ngat koweko ture ara jo nywal, ara imiegu ara dako ara idwe pi Ajakanut ka Rubanga kalikame. ³⁰ . Bino udo atot kibut Rubanga, ikare noni kede eko bino udo kuo kame bedo nakanaka ikare koyaro bino. ³¹ . Di en eko tero josiao mege tomon kiwie are, eko waco negi wan otienu oot paka Yerusalem, di gi dedede kame bin inabin owandiko ikom wot ka dano bino cobere. ³² . Pien kobino mine icing jo kalikame Iyudayan, di oko nyware oko timo ne tim me lewic kede da oko ngulo lau ikome. ³³ . Gin kibino dane, di oko neke da do iceng me adek en ebino yaruno. ³⁴ . Gin likame kiko niang gi kame en ewaco akadi acel. Kope nogi oudo okano negi, imio gin likame kiko niang gikame en ewaco. ³⁵ . Oko tuno esawa kame oudo enoko kede Yeriko icuo moro emuduk oudo tie bedo inget yongayo di ekware. ³⁶ . Kakame ewinyo kede ekodet me jo di tie beo, en eko penyere di emito ngeno gi kame tie timere. ³⁷ . Gin kiko waco ne be, Yesu me Nasaret tie beo. ³⁸ . Di eko kok, di ewaco be Yesu wot ka Daudi tima kisa. ³⁹ . Jo kame bin otelo anyim oko nunano en be elingi, do en eko medo nyalar kede koko okwe wot ka Daudi tima kisa. ⁴⁰ . Dido Yesu oko cungo di eko waco be kelenu buta kakame enoko kede en eko penye di ewaco. ⁴¹ . Imito be atim ni nyo? En eko waco be, Rwot amito be anen piny. ⁴² . Dido Yesu oko waco be neni yei ni olaki. ⁴³ . Iye sawa nono eko cako neno piny dido eko lube. Di emio Rubanga deyo, kakame ekodet oneno kede gi noni kiko pako Rubanga.