¹ . Di en dokon eko waco ne ne josioa meege be, likame etwerere, do etie be gi kame mio jo poto ibal omito bino; do can but dano, kame gigonogo bino beo kibute! ² . Oudo koto ber twatwal me tweeno kidi me riego ingute di oko wuce icuny nam, ioo en miino ngat acel ikom idue katitino gi poto ibal. ³ . Gwokere nu itek; kame omini otimoni gi karac juke; kame eswilaro, time kisa. ⁴ . Dokon kame edubo buti tien kany kaare iiceng acel, di itien kany kaare ii ceng acel nono en elokere dokon edwongo buti di ewaco ni be, ango aswilaro, in poore itime kisa. ⁵ . Joor dido oko waco ne Rwot be, nyai do yei wada. ⁶ . Rwot oko waco be, koto di itieunu kede yei acal kede nyige me karadali, oudo itwerunu yaamo ne yat anyinge cukamoro ni be; putere dedede kede alias ni, di iko oot pitere icuny nam; di en eko bino wiinyo u. ⁷ . Do ngai ki komun, kame tie kede ngatic kame puro arabo kapito doke megge, di eko cobuno yamo ne naka naka, kame di en edwogo ii ebar be; Ape ioti ibed piny iko cam? ⁸ . Dodi likame ewaco ne be gei ber kong temuno kakame ango ayaro cam kiye, di iko ngapere me miino ango cam, paka kame ango atieko cam kede mat; icen mere, dido ii da iko cam di iko maato? ⁹ . Benyo en emito pwoono ngatic nono pien etimo gi kame ocikakino en pi tiimo? Ango ageno be li. ¹⁰ . Aso ecal kamanono butu da, kame di itiekunu tiimo gi dedede kame ocikakino u pi tiimo, yamunu be, wan obedo jo tic kame kony gi ii, wan otieko coobo tic kibecokina ne wan pi tiimo. ¹¹ . Dido mago oko bino diko kato, di en etie oot Iyerusalem, di eko beeno idiere diere me Samaria kede Galilaya. ¹² . Kakame en oudo etie donyo kede i adul moro, cuo tomon kame obedo jo dobini, oko cungo kaka abor; ¹³ . Di gin kiko kiararo dwan gi malo, di ki waco be, Yesu, Nyapwony, bed kede kisa ikom wa. ¹⁴ . Kakame en eneno gi kede, eko waco negi be, ootunu inyutere nu but Isaseredotin. Kame mago oko kato, dido gin ki tie oot, oko ioonyo gi. ¹⁵ . Kakame ngat acel ikom gi, oneno kede be en etieko lonyere, elokere edok cen, di etie miino deyo but Rubanga kede dwan amalo. ¹⁶ . Di en eko poto arieba cuny itiene, di emio pwoc bute; do en oudo ebedo nga Samaria. ¹⁷ . Yesu oko dwoko di ewaco be, likame oudo jo tomon en ko lonyere? do jo kany ka ngon tie tuai? ¹⁸ . Likame ngatamoro ikom gi oko dwogo pi miino deyo but Rubanga kwaanyo ngakum bor ni. ¹⁹ . Di en eko waco ne be, yai i ooti: yei ni otieko cangi. ²⁰ . Doko kakame Iparisayon openyo kede kibute di kimito ngeeno kare kame ajakanut ka Rubanga poore bino kede, en eko dwooko ne gi be, ajakanut ka Rubanga likame bino di ko tie neene. ²¹ . Amotoko nat jo yaamo be, nenunu , en ine! arabo, be, nenunu, en ica! piento niangunu be, ajakanut ka Rubanga tie ii wu. ²² . Dokon en eko waco ne jo siao be, cengere bino tuno kame un iyarunu miito neeno kede cenge ka wot ka dano, do likame iyarounu nene. ²³ . Dokon gin ki yaro waco neu be nenunu kane arabo nenunu kuca, kur iootunu kede gi arabo, lubo gi. ²⁴ . Pien bala kame epie kame meny ki malo tucel rieny dokon imalo tucel, aso wot kadano da oyaro bedo kamanono iceng mere. ²⁵ . Do ber kong eyaro benno ki can ka tot, di jo me atur ni ko bino dage. ²⁶ . Dokon bala kame bin ebedo kede icengere ka Nua, eyaro bedo cal kamanono da icengere ka wot adano. ²⁷ . Gin oudo kicamo, gin oudo ki mato, gin oudo ki nyomo mon, oudo ko miogi inyom, tuno kede ceng kame Nua diko donyo kede iye, di alele oko bino, oko neeko gi dedede. ²⁸ . Dokon ecal acala kede cengere ka lot da Gin kicamo, ki mato, ki wilo, ki cato, ki pito kodere, ki gero. ²⁹ . Do iceng acel nono kame lot ooto kede ooko me Sodoma en kame mac kede itongen oko cwei imalo di oko neeko gin dedede. ³⁰ . Eyaro bino bedo cal kamanono da iceng kame wot ka dano omito yabere kede. ³¹ . Iceng nono, dano kame tie iwi ot, dodi jame meege tie i ot, kur dokon ewok piny pi kwaanyo gi, dokon dano kame tie ipoto da, kur eda edwog cen. ³² . Yutunu nu dako ka lot. ³³ . Ngat kame bino moono pi laako kuo mere oyaro rwenye; dokon ngat kame bino rwenyo kuo mere oyaro gwooke. ³⁴ . Awaceu, iwor nnoca, jo are oyaro bino buto i itanda acel koyaro kwaanyo ngat ace di oko weeko. ³⁵ . Mon are oyaro bino riego karacel, ngat acel koyaro bino kwaanyo, di ngat acel oko bino weeko. ³⁶ . Cuo are oyaro bedo ipoto; koyaro kwaanyo ngat acel, di ngat acel oko bino weeko. ³⁷ . Gin kiko dwooko di ki waco ne be, Rwot, tuai inonono? Di en eko waco negi be, kakame kom jo tie iye, acut bino cokere iye.