¹ Kakame Yesu otieko waco kede kope nogi, eko yai kede josiao mege di kiko ngolo aditot me Kideron kame oudo poto tiye iye di eko donyo iye kede josiao mege. ² Yuda, ngat kame bino rupeo en oudo ngeo kabedo nono. Pien Yesu oudo maro riamakin kede josiao mege kanono. ³ Dido Yuda oko upere kede ekodet me cuo kede jo tice adongo oyai ibut jo saserodotin kede iparisayon di kimako rau, toce kede jame me yii. ⁴ Yesu oudo ngeo gi dedede oyaro timere ne en eko ot riamakin kede gi, eko waco negi be, "Ngai kame un itienu mono?" ⁵ Gin kiko dwoko ne be, "Yesu me Nasaret." Yesu di ko waco negi be, "Ango en Ine." Yuda da ngat kobino rupao en oudo tiye cungo kede gi. ⁶ Cucuto kame en eko waco negi kede be, "Ango Ine," gin kiko dok cen di kiko popoto piny. ⁷ Di en eko medo penyo gi be, "Ngai kame un itienu mono?" do kiko waco ne be, "Yesu me Nasaret." ⁸ Yesu oko dwoko negi be, "Awaco neu be ango Ine." Kame un itienu mona, wekunu jo apat go ot, ot gi. ⁹ Man otimere pi cobo kop kame bin en ewaco be, "likame tie dano moro orwenyo ikom jo kame bin omia." ¹⁰ Kikanono Simoni Petero, ngat koudo tie kede pala epima, eko kwanyo eko tongo kede iit ngatic me esaserodot adwong paka ngolo tenge. Ngat nono bin nyinge Maliko. ¹¹ Yesu di ko waco ne Petero be, "dwok pala epima ni i akularu mere. Benyo ikopo kame Papa na omia kur amate?" ¹² Dido ikano ekodet me isirikalen ngadwong gi kede jo dongo me iyudayan oko etro Yesu di oko twene. ¹³ Di oko geno tere but Anas me agege pien oudo e tie papa me dako ka Kayapa ngat kame bin tie esaserodot adwong imwaka nono. ¹⁴ Kayapa nono en kame oudo bin omio iyudayan tam be eber ne dano acel to pi jo. ¹⁵ Simoni Petero oko lubo Yesu, en kede ngasiao ace, ngasiao ace nono oudo bin ngere kede esaserodot adwong omio en bin eko ot kede Yesu paka tuno idiakal me ngasaserodot adwong; ¹⁶ Do Petero oko dong cungo idog erute, di do ngasiao ame bin ngere kede ngasaserodot adwong nono oko dok oko. Di eko yamo kede nyako ame bin daro erute eko mine ekelo Petero da idiakal. ¹⁷ Nyako kame bin daro erute oko penyo Petero be, "Benyo in likame ibedo ngat acel ikon josiao me icuo ni?" Petero ko dwoko ne nyako nono be, "Liame ango." ¹⁸ Di do ipasoi kede jodongo kame bin tie cungo kuno oudo ki dopo mac pien piny oudo ngic omio kitie yono mac di Petero da tie cungo kede gi di eyo mac. ¹⁹ Di ngatel me jo saserodot oko penyo Yesu ikom josiao mege kede ikom pwony kame en epwonyo. ²⁰ Yesu di ko dwoko ne eb, "Ango awace ne lobo kop kakaler . Amaro da pwony ikacokeren kede itempulo kakame iyudayan maro riamakin iye. Lia tie gimoro ame ayamo imung. ²¹ Pinyo komio ipenyunu? Penyunu jo kame bin owinyo kop na igiame ango awaco negi pien gin kingeo giame ango awaco. ²² Kakame Yesu itoeko waco kede kop gi, ngat acel ikom jodongo oko bape ii cinge di ewaco ne be, "benyo, mano en epone kame in idwoko ne kede ngatel me josaserodot kopi?" ²³ Yesu oko dwoko ne be, "Kame di ango awaco kop arac, ebedo mujura me giarac, do kame di awaco kop aber pinyo omio ibapa?" ²⁴ Di Annas oko cwane but Kayapa obedo esaserodot adwong di kotwee. ²⁵ Kakame Simoni Petero tie cungo di eyo mac,. Gin kiko waco ne be, "Benyo in liame ibedo ngat acel kikom josiao mege?" En eko dagi di ewaci negi be, "Liame ango" ²⁶ Ngat acel ikom ipasoi me ngatel josaserodotin wad gi icuo kame Petero bin otongo ite, oko penye be, "Benyo liame ango anenou kede en di itienu ipoto?" ²⁷ Petero doko oko medo dagi cucuto nono; di tongweno oko kok. ²⁸ Di gin kiko kwanyo Yesukibut Kayapa dikiko tere iot kame ongolo iye kop. Odiko sek gin liame kiko donyo iot me ngolo kop pien bin kilworo be kur kipwokere pien gida kimito camo ebaga me kato. ²⁹ Pilato di oko donyo but gi oko di eko waco negi, "Pido nyo kame un ikelunu ikom icuoni?" ³⁰ Gin kikwo dwoko di kiwaco ne ebe, "Kame di koto oudo dano ni likame obedo ngatim tim areco, koto oudo wan liokele but." ³¹ Pilato di ko waco negi be, "un terenu di ikonu ngolo ne kop di lubere kede iswil wu." Iyudayan di ko waco ne be, iswil liame yei wan ngolo ne dano kop me to. ³² Man otimere pi mino kop kame Yesu bin owaco cobere kakare pi nyuto epone me to kame bini neke. ³³ Pilato doko oko donyo iot me ngolo kop eko lwongo Yesu di ewaco ne be, "Benyo in ibedo Abaka me iyudayan?" ³⁴ Yesu oko dwoko ne be, "Benyo in itie waco kop gi ikomi amoto tie jo ace owaco ni kop ikoma?" ³⁵ Pilato oko penye be, "benyo ango abedo dano me Yudaya wad wu? Ateker nin kede josaserodotin adongo en omiin buta, nyo kame in itimo?" ³⁶ Yesu oko dwoko be, "Ajakanut na liame me lobo kan, koto di oudo ebedo me lobo kan, koto ipasoi na oyii wek kur mia icing Iyudayan. Do ajakanut na liame me lobo kan." ³⁷ Kakame Pilato oko penye be "Benyo in do Abaka?" Yesu oko dwoko ne be, "In iwaco be ango Abaka pi kop noni en omio onywala, doko ginono omio abino ilobo wek abed mujura me ateni." ³⁸ Pilato oko penye be, "Ateni en nyo?" Kakame en etieko waco kede kop gi, eko do donyo oko but Iyudayan, di eko waco negi be, "Liame tie dub moro ame ango audo ikom icuo ni atwal. ³⁹ Do un itie nu kede itok ame waco be opore gonyo ne wu dano acel ikare me ebaga me kato. Pi mano imituni be agonge wu abak me Iyudayan?" ⁴⁰ Gin dedede kiko ilelem kede koko di kiwaco be , "Liame icuo ni, do gonyenu was Baranaba." Do Baranaba oudo obed ngayak.