¹ Kope gi Yesu oyamo, eko kiarao wange malo di eko waco be, "Papa, esawa oromo, mi wodi deyo me wek awobi da ko mini deyo." ² Bala kitekame in imie kede twer ikom kom dedede me tetekeny eki kuo kalika tiek but jo atot kame in imie. ³ Man en kuo kalikatiek, me mino gin ngeni Rubanga acel me ateni, kede Yesu Kristo kame in i cwao. ⁴ Atieko mini deyo ilobo, ango atieko timo tic kame imia timo. ⁵ Nan do okwe Papa, mia deyo in ikomi, epone deyo kame riki otie kede, wan kedi di pwodi lobo likame ocwere. ⁶ Ango atieko nyuto nyingi but jo kame in imia i lobo, gin oudo kibedo megi, in iko mino ango gin, gida kiko mako kop ni. ⁷ Nan do gin itieko ngeno be gi dedede kame in imia, gin kibedo jame nin. ⁸ Ango atieko mino gi kop kame in imia, gida kiko gamo, gin kiko niang ateni, be ango awok kibuti, gin itieko yei da be in en kame icwa ⁹ Ango alego pirgi, do likame pi lobo, do pir gin jo kame imia pien gin megi. ¹⁰ Doko, mega dedede, gin megi da obedo megada, doko audo deyo kibut gi. ¹¹ Nan do ango ali i lobo, do jogi pwodi odong i lobo, ango atie bino buti, Papa kacil, jo obino obuta gi gwok gi kede nyingi, me wek gida kibed jo acel, bala kite kame wan otie kedi acel. ¹² Di oudo ango pwodi atie kede gi i lobo, ango ako gwoko gi kede nyingi, jo kame imia agwoko gi, likame tie moro orwenyo, kwanyo kenekene atin me rwenyo, me tetekeny iwandik cobere. ¹³ Ango nan atie bino buti, kop gi ango ayamo i lobo, me wek ilel na cobere but gi. ¹⁴ Ango amio gi kop nin, lobo oko dagi gi, piento gin likame me lobo, bala kitekame ada likame me lobo. ¹⁵ Likame ango atie lego be ikwany gi tenge i lobo, do alego be in igwok gi igi karac. ¹⁶ gin likame jo me lobo, bala kitekame ango da likame me lobo. ¹⁷ Lony gi kede ateni ni, kop ni en ateni. ¹⁸ Bala kitekame in i ora kede i lobo, amanono da ada aoro gi i lobo. ¹⁹ Pir gi ango alonyere, me tetekeny gida ilonyere beo ii ateni. ²⁰ Likame alego pir gin kenekene, do pi jo oyaro yei ango beo i kop gin ²¹ me tetekeny gin dedede idok jo acel, bala kame Papa in itie ii ango, angoda atie iin, me wek gida kibed acel ii wan, me wek tetekeny lobo yei be in en icwa. ²² deyo kame in imia, ada amio gi, me wek gida ibed acel, bala kame wada otie kede acel. ²³ Ango atie ii gi, do in itie ii ango, me tetekeny ibed jo ko cwiny me bedo icel, me wek lobo ngei be, in en iora, kede ingei be, in imaro gi, bala kitekame in imara kede. ²⁵ Okwe Papa opoore, lobo likame ongei, do ango angei, do jo gi otieko ngeno be in en iora. ²⁶ Ango atuco ne gi nyingi, doko da pwodi ayaro medo yamo nyingi me wek amara kame in imara kede, bed but gi da, do ada atie ii gida.